Mȧyɔs ma aŋsom 16 - Ȧŋlemrȧnɛ Ȧfu

¹ Pɔlȧŋ ɔ der sɔ ro Dabi yi ro Listra. Ɔwa kəla, ukarande ulɔm ɔ yi ri, ȧŋes ŋɔŋ ŋə yi Timɔthi, ɔwan runi ka uYuda ubɛra ɔwe lanɛ, kɛrɛ ɔkas kɔŋ ɔ yi uKrik.

² Ɔwe, ɔ ba ŋes afinɔ ka aŋwɔnt aŋa yi ro Listra yi ro Ikoniɔm.

³ Ka Pɔlȧŋ ɔ yema kȧmȧ ɔ paya kɔ ka ȧŋbiyas ŋɔŋ tiyȧŋ ɔ birons kɔ salata aŋYuda aŋa yi ka mȧgbȧp mati, kotȧy-e ŋa bɛ aŋ tȧrȧ kəpa ɔkas kɔŋ ɔ yi uKrik.

⁴ Ɔwa maŋ gbəkinɛ tapet-e, aŋ laŋklia ŋa magbək ama aŋsom yi aŋbȧki aŋa yi ro Yerusalɛm aŋ po gbək.

⁵ Ɔwa ɛchɔch ɛ bȧr sɔthɔ afɔsɔ ka kȧlanɛ, yi kagbath ka ŋaŋ kə bȧrnɛ ȧrey o rey.

⁶ Ɔwa maŋ po gbəkinɛ ro Frikia yi ro Kaletia-e, ɔYina məsəm ɔ bɛnt ŋa kətɔri ȧrim ro Asia.

⁷ Maŋ po bek ka ɔlomanɛ wa ro Misia-e, aŋ mɛm tə kəkɔ ro Bithiniya, kɛrɛ ɔYina ka Yisɔs ɔ selɔ hɛ.

⁸ kaŋ thas ro Misia, aŋ thor ro Troas.

⁹ Ka Pɔlȧŋ ɔ nənk mənəŋk tȧtȧk; ulaŋgba ka ro Masidoniya ɔ təmȧ, ɔ nɛmthɛnɛ kɔ, ɔ pa, Fəsi ro Masidoniya, mə mar su.

¹⁰ Ma ɔ po nənk manəŋk ame-e, ka ɔlɛmp wati sə thɛns roŋ tə kəkɔ ro Masidonya-e, ma sə lanɛ yathi kəpa ɔMarki ɔ tela su tə kətɔri ȧkɛra kəfinɔ ro rɔŋaŋ.

¹¹ Tiyȧŋ sə bȧkȧ ka abil ro Troas, sə kɔ toloŋ ro Samothresi, ɔwa ka ȧŋrey ȧtandȧ, ro Niapolis.

¹² Kəwur ri sə kɔ ro Filipay, ȧke yi kȧpet kətɔtɔkɔ ka ȧŋgbȧp ŋa ro Masidoniya, ȧŋbomp ŋa ro Rom; ka sə yirȧ ka kȧpet kati ta mərey məlɔm.

¹³ Ɔwa ka aŋsabath sə wur ro pet, sə kɔnɛ ro baŋ dayɛr ro sə nanɛ a gbanɛ tə kəramnɛ; rə sə yirȧ, sə fɔfȧnɛ aŋfəm abom aŋa gbanɛ ri.

¹⁴ Ka ubɛra ulɔm, ȧŋes ŋɔŋ ŋȧ yi Lidya, uthila totha təyim-e, ɔ yi ka kȧpet ȧke a bont Thiatira, ɔwe bȧtho Kurɔŋ; kɔnɔ təlȧ su. Ɔwa ɔMarki ɔ kanthi ȧŋmerȧ ŋɔŋ kȧmȧ ɔ botər ȧmerȧ ta mȧtȧy ama Pɔlȧŋ ɔ fɔf.

¹⁵ Ma a po baftays kɔ yi kabɔr kɔŋ-e, ɔ nɛmthɛnɛ su ɔ pa, Bepi nə gbək kəpa minɛ i yi ubɔthi lanɛ ka ɔMariki-e, der nu ka ȧŋseth a mi, nə yianɛ ri. Kɔ kithinɛ su.

¹⁶ Ka pə re yi ma sə kɔnɛ ka ɔdɛr ɔramnɛ-e, uwath bɛra ulɔm ɔwe ba ukərəfi ka kȧthupəs ɔ bəp su, ɔwa ɔmarki kɔŋ ɔ la sɔthɔ amunafa afinɔ ka kathupəs kɔŋ.

¹⁷ Ɔwe-əŋ, ɔ tȧŋ Pɔlȧŋ yi saŋ rə kəsel ɛrɔŋ kəpa, Afəm aŋe aŋ yi ɛbɔy ya ɔKuru ɔwe yi rokɔm kɔm, aŋa mə tɔri nu aroŋ ra kȧkisi.

¹⁸ Ɔ po yɔ ȧte ta mərey məgbȧthi gbȧthi, kɛrɛ ma pə kɛtha Pɔl rə amera-e, ɔ lafthɛ ɔ pa ka ɔkərəfi, I yamari mu ka ȧŋes ŋa Yisɔs Krayst, wur ka ɔwath ubɛra. Kɔ wur ka ɔlɛmp wati.

¹⁹ Ɔwa ma amarki ŋɔŋ aŋ nənk kəpa ȧŋsabu ŋa kamunafa ka ŋaŋ aŋ poŋ-e, aŋ wop Pɔlȧŋ yi Sailas-əŋ, aŋ kera ŋa ka ɔdɛr ɔthila rodi ka aŋgbəka.

²⁰ Ɔwa maŋ kȧrȧ ŋa ka aŋbȧy aŋ pa, Aŋfəm aŋe, maŋ yi aYuda, aŋ bora kəsɔmpa kȧpet kȧsu,

²¹ ɔwa aŋ thəksa ɛsiraŋ ɛyɛ sə te gbəli malanɛ, thalɔm wop, ma sə yi aRom.

²² Ka ȧruniya rə yokar ŋa, ka aŋbȧy aŋ bus ȧsuma taŋ rə kəpiməs ti, kaŋ yamari kȧmȧ a sapa ŋa təsɛthɛ.

²³ Maŋ po sap ŋa-e, aŋ bot ŋa ka ȧŋseth ŋa tȧrəŋka, kaŋ yamari ɔbumər kȧmȧ ɔ bɛnɛ ŋa ɔbaksər.

²⁴ Ɔwa kɔnɔ-e, ma ɔ po sɔthɔ ayamari awunɔŋ-e, ɔ bot ŋa ka ȧŋkonko rokor, ɔ tand ŋa ka ȧŋkuy.

²⁵ Kɛrɛ mɔlɔ ma kəren datɔŋ Pɔl yi Sailas aŋ ramnɛ aŋ lensir Kuru rə məleŋ, ɔwa antɛndɛbira aŋ təlȧ ŋa.

²⁶ Ɔwa ka ɔlɛmp wati ȧŋthɔf aŋ yɛr kəyɛr kəbana haŋ ɔtəma wa ȧŋseth ɔ yiŋkthanɛ. Ka ɔlɛmp wati tadare bɛ tə kanthɛ, ɔwa məsekəranɛ ma wuni o wuni mə səlɛ.

²⁷ Ɔwa ma ɔbumər ɔ thəmɛ-e, ɔ nənk tarare ta ȧŋseth ŋa tȧrəŋka bɛ tə kanthɛ, kɔ tali aŋgbathɔ ŋɔŋ, ɔ yema difnɛ pəkasifɛ ɔ nanɛ kəpa atɛndɛbira aŋ po toŋk.

²⁸ Kɛrɛ Pɔlȧŋ ɔ ŋata rim ɔ pa, Te yɔnɛ ɔbaŋ, kotȧy-e saŋ bɛ sə yi nɔ.

²⁹ kɔ tela ta amotha, ɔ wɔŋ, ɔ gbəpsa rodi ka Pɔl yi Sailas-əŋ yi kəyɛr,

³⁰ kɔ wurɔ ŋa rokaŋ, ɔ pa, Pa-ŋaŋ, to mə i yɔ kȧmȧ i kisi-e?

³¹ kaŋ pa, Lanɛ ka ɔMarki Yisɔs Krayst, ɔwa mə tə kisi, munɔŋ yi kabɔr ka mu bɛ.

³² kaŋ fɔfȧnɛ kɔ ȧrim ra ɔMarki, yi ŋaŋ bɛ aŋa yi ro seth kɔŋ.

³³ Ɔwa ka aŋhawa ŋati gbeŋ ka tȧtȧk, ɔ gbasi ŋa, kɔ yak tȧsam taŋ, ka a baftays kɔ yi aŋfəm ŋɔŋ sɛŋk.

³⁴ Kərarəŋ kati ɔ kȧrȧ aŋsom ro seth kɔŋ, ɔ bot ɛyɛt ɛdi rodi ka ŋaŋ, kɔ sel məbɔnɛ yi kabɔr kɔŋ bɛ, ma ɔ po lanɛ Kuru.

³⁵ Kɛrɛ ma pə po sɔk-e, aŋbȧy aŋ som ɛbɔy yaŋ tə kəpa, Ter aŋfəm aŋaŋ kȧmȧ aŋ kɔnɛ.

³⁶ Ka ɔbumər ɔ kanɛ Pɔlȧŋ, aŋbȧy aŋ som tə kəter nu nə kɔnɛ, tiyȧŋ wur nu, kɔnɛ nu yi məthɔfəl.

³⁷ Kɛrɛ Pɔl ɔ pa ro rɔŋaŋ, Aŋ po sap su gbafəth kəte fɔf ȧŋpa a su, ma sə yi aRom, kaŋ bot su ka ȧŋseth ŋa tərəŋka. Ɔwa ka-ake aŋ yema wurɔ su gbo sɔi-i? Yi thahɔ. Thambe ŋaŋ gbeŋ aŋ der wurɔ su.

³⁸ Ka ɛbɔy aŋ kanɛ aŋbȧy ȧsim ȧte, ɔwa aŋ nesa maŋ təl kəpa aŋ yi aRom.

³⁹ kaŋ der aŋ nɛmthɛnɛ ŋa, ɔwa maŋ po wurɔ ŋa aŋ yif ŋa kȧmȧ aŋ wur ka kȧpet.

⁴⁰ Ma Pɔlȧŋ yi Sailas-əŋ aŋ wur ka ȧŋseth ŋa tərəŋka-e, aŋ wɔŋ ka ȧŋseth ŋa Lidia. Ɔwa maŋ po nənk aŋwɔnt-e, aŋ bɛfəth ŋa, kaŋ kɔnɛ.