Mȧyɔs ma aŋsom 13 - Ȧŋlemrȧnɛ Ȧfu

¹ Ɔwa anȧbi yi akarmɔkɔ alɔm aŋ yi ka aŋchɔch ŋa ro Antiɔk, Banabasȧŋ yi Simiyɔnȧŋ ɔwe a bont Nikər, yi Lusiɔsȧŋ ɔwe ro Sirini yi Manɛnȧŋ ɔwe a rusəm yi Hɛrɔd ɔTɛtrark, yi Sɔlȧŋ.

² Ɔwa mɔ mə aŋ bȧtho ɔMarki, aŋ kȧl wop asum, ɔYina məsəm ɔ pa, Gbaski Banabasȧŋ yi Sɔlȧŋ ta ȧtȧ mi ta mapanth ama i tela ŋa.

³ Maŋ po wop asum-e, ɔwa aŋ ramnɛ, aŋ rens ŋa mȧta maŋ, kaŋ ter ŋa aŋ kɔnɛ.

⁴ Ɔwa, ma ɔYina məsəm ɔ po som ŋa-e, aŋ thor ro Silusiya, ro aŋ bȧkȧ rə abil, aŋ kɔnɛ ro Saiprɔs.

⁵ Ɔwa, maŋ yi ro Salamis-e, aŋ taməs ȧrim ra Kuru ka ɛseth ɛgbanɛ ya aŋYuda; aŋ ba sɔ Yɔnȧŋ tə kəmar ŋa.

⁶ Ɔwa maŋ po kɔth kɔth ka aŋyel bɛ-e, aŋ bek ro Pafɔs, kaŋ bəp ri uthupəs ulɔm, unabi uyem, uYuda wɔŋ, ȧŋes ŋɔŋ ŋə yi Ba-Yisɔs.

⁷ Ɔ yi ka Sakiyɔs Pɔlɔs, ɔsanthiki, wuni tȧrȧ tȧy, ɔwe som kətela Barnabas yi Sɔl, ɔ thɛns tə kətəl ȧrim ra Kuru.

⁸ Kɛrɛ Elimas ɔthupəs (kotȧy-e ya a tepa ȧŋes ŋɔŋ) ɔ təmɔnɛ ŋa, ɔ mɛm tə kəlafthi ȧŋmerȧ ŋa ɔsanthiki kəwur ka kȧlanɛ.

⁹ Kɛrɛ Sɔl-əŋ ɔwe a bont sɔ Pɔl, ɔ la ɔYina məsəm, kɔ kəli kɔ təŋ, ɔ pa,

¹⁰ O munɔ, mə la ɛyaŋfa bɛ yi mələs bɛ, munɔ ɔwan ka Sethani, utheranɛ ka məlompi bɛ, mə tey hɛ kəlafthi lȧfthi asoŋ təlompi ta ɔMariki-i?

¹¹ Ɔwa ka-ake kȧta ka ɔMarki kə rensa mu, ɔwa mə tə yi ufith kəte nənk aret ta alɔkɔ. Ka ɔlɛmp wati kȧbi yi asum ɛ wop kɔ, kɔ thɛns wuni tə kəwopa kɔ kȧta.

¹² Ka ɔsanthiki, ma ɔ nənk ȧtȧ po yɔnɛ-e, ɔ lanɛ, ɔ kabanɛ ka kathəksa ka ɔMarki.

¹³ Ɔwa Pɔlȧŋ yi akobali kɔŋ aŋ wur ro Pafɔs rə abil, aŋ der ro Paka ȧke yi ro Pamfiliya; ka Yɔnȧŋ ɔ tey ŋa, ɔ kȧlanɛ ro Yerusalɛm.

¹⁴ Kɛrɛ maŋ wur ro Paka-e, aŋ der ro Antiɔk ȧke yi ro Pisidia. Kaŋ wɔŋ ka ȧŋseth agbanɛ ka ȧŋrey ŋa aŋsabath, aŋ yirȧ.

¹⁵ Ɔwa maŋ po karaŋ ȧŋthɔ yi mȧgbal ma Aŋnȧbi, aŋgbəka ŋa ȧŋseth agbanɛ aŋ som ro rɔŋaŋ, aŋ pa, Wɔnt a su, bepi nə ba kɛra tə kəmaŋ aŋfəm, fɔf nu.

¹⁶ Ka Pɔlȧŋ ɔ yokanɛ, ɔ mɛthmɛth ŋa, ɔ pa, Afəm aruni ŋa Isrɛl, yi naŋ aŋa nesa Kuru, sua nu ɛləns.

¹⁷ ƆKuru ka aŋfəm ŋa Isrɛl, ɔ thith aŋkas a su, kɔ bondəs aŋfəm maŋ yirȧ rətik ka ȧŋthɔf ŋa Iyipt, yi ɔ wurɔ ŋa ri rə kȧta ka afɔsɔ.

¹⁸ kɔ muyu mȧyɔs maŋ mɔlɔ ma təren təgba tərəŋ ro wula.

¹⁹ Ma ɔ po dim tȧbona tȧmthədɛrəŋ ka ȧŋthɔf ŋa ro Kenan-e, ɔ sɔŋ ŋa ȧŋthɔf a ŋaŋ ta kɛŋ, mɔlɔ ma təren tɛmɛ tanlɛ təgba tərəŋ tɔfɔt.

²⁰ Kədarəŋ ka mȧtȧy ame ɔ sɔŋ ŋa ȧthonkas haŋ ka Samuɛl ɔnȧbi.

²¹ Kədarəŋ kati aŋ yif ta ubȧy, ka Kuru ɔ sɔŋ ŋa Sɔl-əŋ ɔwan ka Kis, ulaŋgba ka ȧŋbɔnshɔ ŋa Bɛnyamin, mɔlɔ ma təren təgba tərəŋ.

²² Ɔwa ma ɔ po wurɔ kɔ ka matəma mɔŋ-e, ɔ təmər Debid tə kəyi ɔbȧy ka ŋaŋ, ta ɔwe ɔ seri sɔ kəpa-e, I po fir Debid ɔwan ka Yɛsi, ɔwuni ɔwe i bɔthər, ɔwe mə yɔ mȧselɔ ma mi bɛ.

²³ Ɔwa Kurɔŋ mɔ mɔ po lahiri, ɔ sɔŋ Isrɛl ka rȧkomra ra ɔwuni ɔwe, uKisis, Yisɔs.

²⁴ Ɔwa Yɔnȧŋ, yeŋka kȧder kɔŋ-e, ɔ po mɔtha taməs ka aŋfəm ŋa Isrɛl ȧŋbaftisəm ŋa kathupi.

²⁵ Ɔwa ma Yɔnȧŋ ɔ yema pons mapanth mɔŋ-e, ɔ pa, To nə nanɛ kəpa minɛ i yi-e? I yi hɛ kɔnɔ, kɛrɛ ukin ɔ tə der kədarəŋ kȧmi, ɔwa i bek hɛ tə kəsəli ɛkɔftha ya ȧtȧtək tɔŋ.

²⁶ Awɔnt a mi, aŋwuth ŋa rȧkomra ra Ebraham, yi ŋaŋ aŋa nesa Kuru kətɔŋ ka nu-e, a som ȧrim ra kakisi ake ro rɔsu.

²⁷ kotȧy-e ŋaŋ aŋa yirȧ ro Yerusalɛm, yi aŋgbəka ŋaŋ, maŋ te tȧrȧ kɔ-e, thalɔm ȧsim ta Aŋnȧbi ȧtȧ a karaŋ asabath o sabath, aŋ lasər ti maŋ sɔŋ kɔ mətheri.

²⁸ Hali maŋ te fir kɔ ubeki dif-e, aŋ nɛmthɛnɛ Paylet kȧmȧ a dif kɔ.

²⁹ Ɔwa maŋ po lasər mȧtȧy bɛ ama a gbal ta atɔŋ-e, aŋ thora kɔ ka aŋənt, kaŋ bot kɔ ka ȧŋpȧli.

³⁰ Kɛrɛ Kurɔŋ ɔ yokas kɔ ka aŋfi,

³¹ kɔ tɔrinɛ mərey məlai ka ŋaŋ aŋa der yi kɔnɔ ro Yerusalɛm kəwur ro Kalili, aŋa yi thɔŋ maseri mɔŋ ka aŋfəm.

³² Ɔwa saŋ sə kȧrȧ nu ȧkɛra kəfinɔ ka aŋlahiri ȧke a sɔŋ aŋkas a su,

³³ kəpa Kuru ɔ po lasər ŋi ka aŋwuth a su ma ɔ yokas Yisɔsȧŋ; mɔ mə a gbal ti sɔ ka ȧŋSam aŋa bekȧ yɛrəŋ, Munɔ mə yi ɔWan kȧmi uruni; ka ȧŋrey aŋe kə i kom mu.

³⁴ Ɔwa, kəpa ɔ yokas kɔ ka aŋfi tə kəte sɔ kȧlanɛ rə kəthei, ɔ fɔf yaŋ, I ti sɔŋ nu ɛlahiri ɛsəm ɛte siŋkar ya Debid.

³⁵ Tiyȧŋ ka ȧŋSam alɔm ɔ pa Mə sɔŋ hɛ ɔSəm ka mu kȧmȧ ɔ nənk kəthei.

³⁶ Ȧtesoma-e Debidȧŋ, ma ɔ po yɔ mȧselɔ ma Kuru ka ȧŋlɔkɔ ŋɔŋ-e, ɔ kɔ rə mərey, ka a bot kɔ yi aŋkas ŋɔŋ, kɔ thei.

³⁷ Kɛrɛ kɔnɔŋ, ɔwe Kuru ɔ yokas-e, ɔ thei hɛ.

³⁸ Tiyȧŋ awɔnt a su, tȧrȧ nu kəpa kətȧŋȧnɛ ka ɔlaŋgba ɔwe a taməs nu katerɔ ka ɛhakɛ;

³⁹ ɔwa ka kȧta kɔŋ wuni o wuni ɔwe lanɛ ɔ sɔthɔ məmari ka mȧtȧy bɛ-e, ka ama nə te gbəli sɔthɔ məmari ka ȧŋthɔ ŋa Mosis.

⁴⁰ Tiyȧŋ botnɛ nu ta thani ȧtȧ Aŋnȧbi aŋ pa tə bəp nu,

⁴¹ Kəla naŋ afarki tȧy, Kabanɛ nu ɔwa dinɛ nu; kotȧy-e i yɔ apanth ka marey ma nu, Apanth aŋa mə nə te lanɛ rə roŋ o roŋ, Hali wuni ɔ kanɛ nu ŋi.

⁴² Maŋ wur-e, aŋ nɛmthɛnɛ kȧmȧ a fɔfȧnɛ ŋa ȧsim ȧte ka aŋsabath alɔm.

⁴³ Ɔwa ma aŋgbanɛ aŋ sakanɛ-e, aŋYuda agbȧthi yi ŋaŋ aŋa po lafthɛ ka kȧlanɛ aŋ tȧŋ Pɔlȧŋ yi Banabasȧŋ, kaŋ fɔfȧnɛ ŋa kȧmȧ aŋ bȧsər ka ȧŋboŋa ŋa Kuru.

⁴⁴ Ɔwa ka aŋsabath alɔm pə bun yi kȧpet bɛ kə gbanɛ tə kətəl ȧrim ra Kuru.

⁴⁵ Kɛrɛ ma aŋYuda aŋ nənk ȧsuniya-e, aŋ la kətut, kaŋ pɛnsa ȧtȧ Pɔlȧŋ ɔ pa, aŋ fɔf ɔləs.

⁴⁶ Ka Pɔl yi Banabasȧŋ aŋ fɔf yi kəmintha, kaŋ pa, Pə ba kəyi kəpa a mɔtha tɔri nu ȧrim ra Kuru; kɛrɛ ma nə pɛnsa ri-e, nə gbək ti kəpa nə bek hɛ tə kəsɔthɔ aŋesəm thəbana-e, sə tə lafthɛ ka tȧbona təlɔm.

⁴⁷ kotȧy-e ya ɔMarki ɔ yamari su, ɔ pa, I po təmər mu tə kəyi amotha ta tȧbona təlɔm, Kama mə yi ta kakisi haŋ ka ɔthalnɛ wa ȧdȧru.

⁴⁸ Ɔwa ma tȧbona təlɔm aŋ təl ȧte-e, pə bɔnɛ ŋa, kaŋ yikis ȧrim ra Kuru; ɔwa ŋaŋ aŋa a bot tə kəsɔthɔ aŋesəm thəbana, aŋ lanɛ.

⁴⁹ Ka ȧrim ra Kuru rə gbanthɛnɛ ka ȧŋthɔf ŋati bɛ.

⁵⁰ Kɛrɛ aŋYuda aŋ pər aŋfəm abom abȧtho-e aŋa ba yiki, yi aŋfəm aruni abana ŋa kȧpet, kaŋ fak asɔmpa abana tə kəŋamnɛ Pɔl yi Banabasȧŋ, kaŋ bȧl ŋa kəwur ka ȧŋgbȧp ŋaŋ.

⁵¹ Kɛrɛ ŋaŋ, aŋ koŋkoŋ kabof ka ȧtȧtək taŋ, kaŋ der ro Ikoniɔm.

⁵² Ka aŋkarande aŋ la məbɔnɛ yi ɔYina məsəm.