Mȧyɔs ma aŋsom 12 - Ȧŋlemrȧnɛ Ȧfu

¹ Ka ȧŋlɔkɔ ŋati Hɛrɔdȧŋ ɔbȧy ɔ təp tə kəsɔmpa alɔm ka aŋchɔch.

² kɔ dif Yeməs ɔwɔnt ka Yɔnȧŋ yi aŋgbathɔ.

³ Ɔwa ma ɔ nənk kəpa pə thesanɛ aŋYuda-e, ɔ gbip Pita sɔ. Ɔwa marey ma kabo kəpaŋi ɛgbith miyaŋ.

⁴ Ma ɔ po wop kɔ-e, ɔ bot kɔ ka ȧŋseth ŋa tərəŋka, kɔ lȧnki kɔ ka atim tɔfɔt tamthərukin tə kəbumər kɔ; kɔ nanɛ tə kəwura kɔ ka aŋfəm kədarəŋ ka amet ma kapainɛ.

⁵ Tiyȧŋ a bɛnɛ Pita ka ȧŋseth ŋa tərənka, kɛrɛ aŋchɔch aŋ tey hɛ kənɛmthɛnɛ Kuru ta atɔŋ.

⁶ Ma Hɛrɔdȧŋ ɔ yema wurɔ kɔ, ka rȧtȧtȧk rati gbeŋ-e, Pitaŋ ɔ dirȧ kətɔŋ ka atim ŋarəŋ, a sekəranɛ kɔ tɔrɛntha tərəŋ; ɔwa ȧŋbumər aŋ yi ka kadare rodi tə kəbumər ȧŋseth ŋa tərəŋka.

⁷ Ɔwa kəla wurɔ ka ɔMarki ɔ təmȧ rayɛr kɔŋ, ɔwa kəwalɛ kə gbɛntha ka ȧŋkonko; kɔ gbantha Pitaŋ ka aŋfuthəl, ɔ thəmi kɔ, ɔ pa, Yokanɛ lɛmp lɛmp. Ka atɔrɛntha tə wur ka mȧta mɔŋ.

⁸ Ka ɔmaleka ɔ pa ro ŋɔŋ, Senɛ, ɔwa sek ɛkɔftha ɛ mu. Kɔ yɔ yi. Kɔ pa ro ŋɔŋ, Gbankthanɛ aruma ra mu, mə tȧŋ mi.

⁹ kɔ wur, ɔ tȧŋ kɔ, kɛrɛ ɔ tɛ hɛ kəpa ȧtȧ ɔmaleka ɔ yɔ tə yi təteŋ, ɔ nanɛ ɔ nənk mənəŋk.

¹⁰ Ɔwa maŋ po thas ȧŋbumər ȧtɔtɔkɔ, yi aŋa bekȧ marəŋ-e, aŋ bek ka kadare ka ɛfȧt ȧke kanthi ro pet; ake kə kanthinɛ ro rɔŋaŋ. Kaŋ wur, aŋ thas roŋ din, ka ɔlɛmp wati ɔmaleka ɔ tey kɔ ɔ kɔnɛ.

¹¹ Ɔwa ma pə tərmɛ Pitaŋ, ɔ pa, Ka-ake i tȧrȧ kəpa tɛntɛnɛ ɔMarki ɔ po som ɔmaleka kɔŋ kȧmȧ ɔ tafi mi ka kȧta ka Hɛrɔd, yi ka ɛnanɛ ya aŋYuda.

¹² Ma ɔ po tȧmtȧmnɛ ȧte-e, ɔ der ka ȧŋseth ŋa Meri, ɔkara ka Yɔnȧŋ, ɔwe ba ȧŋgbȧnthir ŋa Mark, ro afəm agbȧthi aŋ po gbanɛ tə kəramnɛ.

¹³ Ma ɔ gbȧtgbȧt ka kadare ka ȧŋkunk-e, wath ubɛra ȧŋes ŋɔŋ ŋə yi Roda-e, ɔ der tə kəre su ɛləns.

¹⁴ Ma ɔ tȧrȧ ȧrim ra Pitar-e, ɔ kanthi hɛ kadare ta mȧbɔnɛ, kɛrɛ ɔ gbukɛ tə kəkanɛ ŋa kəpa Pitaŋ ɔ təmȧ ro dare rokaŋ.

¹⁵ kaŋ pa ro ŋɔŋ, Mun pəŋk. Kɛrɛ kɔnɔ ɔ bȧksər kəpa ya pə yi. Kaŋ pa, Ɔmaleka kɔŋ, kɔnɔŋ.

¹⁶ Kɛrɛ Pitaŋ ɔ tey hɛ kəgbȧtgbȧt; ɔwa maŋ po kanthi kadare-e, aŋ nənk kɔ, kaŋ kabanɛ.

¹⁷ Kɛrɛ ɔ mɛthmɛth ŋa kȧmȧ aŋ taŋk, kɔ kanɛ ŋa to ɔMarki ɔ wurɔ kɔ ka ȧŋseth ŋa tərəŋka. Kɔ kanɛ ŋa tə kətɔri mȧtȧy ame ka Yeməs yi ka aŋwɔnt. Kɔ wur, ɔ kɔnɛ dɛr ɔlɔm.

¹⁸ Ɔwa ma pə sɔk-e, ayagba athȧn tha aŋ yi kətɔŋ ka antim ta ȧtȧ yɔnɛ Pita.

¹⁹ Ɔwa ma Hɛrɔd ɔ thɛns kɔ, kɛrɛ ɔ fir hɛ kɔ-e, ɔ gbɛŋgbɛŋ ȧŋbumər, kɔ yamari kȧmȧ a difəth ŋa. Kɔ wur ro Yuda ɔ kɔ ro Sisaria, kɔ yirȧ ri.

²⁰ Ka pə bansȧnɛ Hɛrɔdȧŋ ta ŋaŋ aŋa yi ro Tair yi ro Sidon, kɛrɛ aŋ der ro ŋɔŋ rə ȧmerȧ ŋin; ɔwa ma aŋ po səki Blastɔs, ȧŋbɔy ŋa ɔbȧy, uyathki ka ŋaŋ-e, aŋ thola məthɔfəl, pəkasifɛ ȧŋthɔf ŋaŋ aŋ sɔthɔ yɛt ɛdi kəwur ka ȧŋthɔf ŋa ɔbȧy.

²¹ Ɔwa ka ȧrey alemranɛ, Hɛrɔd ɔ wɔŋ ȧsuma ta rȧbȧy, kɔ yirȧ ka kawaŋ ka rȧbȧy, ɔ fɔfȧnɛ ŋa.

²² Ka aŋfəm aŋ sɔŋkɔ, aŋ pa, Ȧrim ra Kuru raŋ, ȧrim ra wuni thahɔ.

²³ Ka ɔlɛmp wati wurɔ ka ɔMarki ɔ gbantha kɔ ȧtesoma-e ɔ sɔŋ hɛ Kuru aŋyiki. Ka ɛbiloŋ aŋ sɔm kɔ, kɔ ternɛ.

²⁴ Kɛrɛ ȧrim ra Kuru rə bȧrnɛ, rə sabathi.

²⁵ Ɔwa Banabasȧŋ yi Sɔl-əŋ aŋ kȧlanɛ kəwur ro Yerusalɛm maŋ po gbenthis mapanth maŋ, kaŋ kera Yɔnȧŋ ɔwe ba ȧŋgbȧnthir ŋa Mark.