Mȧyɔs ma aŋsom 10 - Ȧŋlemrȧnɛ Ȧfu

¹ Ɔwa ulaŋgba ulɔm ɔ yi ri ro Sisaria, ȧŋes ŋɔŋ ŋə yi Kɔrniliɔs, ukaptin ka akobali ka aŋItalian.

² Wuni bȧtho Kuru wɔŋ ɔwe nesa Kuru yi kabɔr kɔŋ bɛ, ɔ sɔŋ ɛboya ɛgbathi ka aŋfəm, ɔwa ɔ ramnɛ Kuru lɔkɔ o lɔkɔ.

³ Ɔwe-e, ɔ nənk umaleka ka Kuru rə mənəŋk gbəraŋ mɔlɔ ma ka aŋhawa aŋa bekȧ tȧmthərɛŋanlɛ ka ȧŋrey, ɔ wɔŋ ɔ pa, Kɔrniliɔs.

⁴ Ɔwa kɔnɔŋ, ma ɔ kəli kɔ təŋ-e, ɔ nesa ɔ pa, Pa, ko rəka-e? kɔ pa ro ŋɔŋ, Taramnɛ ta mu yi ɛboya ɛ mu ɛ po bek ka Kuru ta ananɛ ta ȧtȧ mu.

⁵ Ɔwa ka-ake, som afəm ro Yɔpa kȧmȧ aŋ kɔ tela Saymɔnȧŋ, ɔwe ba ȧŋgbȧnthir ŋa Pita;

⁶ ɔ yianɛ ka Saymɔn ɔkaraŋke, ɔwa ȧŋseth ŋɔŋ aŋ yi ro baŋ rayɛr.

⁷ Ɔwa ma ɔmaleka ɔwe fɔfȧnɛ kɔ ɔ po kɔnɛ-e, ɔ tela ɛbɔy yɔŋ ŋarəŋ, yi utim ɔwe nesa Kuru ka kətɔŋ ka ŋaŋ aŋa yɔna kɔ alɔkɔ o lɔkɔ.

⁸ Ma ɔ po kanɛ ŋa mȧtȧy ame bɛ-e, ɔ som ŋa ro Yɔpa.

⁹ Ɔwa ȧŋrey alɔm maŋ yi ro roŋ-e, ɔwa aŋ fatər kȧpet, Pitaŋ ɔ gbep ro seth rokɔm tə kəramnɛ ka aŋhawa aŋa bekȧ tamthərukin:

¹⁰ ka dor rə wop kɔ kɔ fela tə kədi, kɛrɛ mɔ mɔ kar haŋ a toŋ-e, mərey mə wop kɔ.

¹¹ kɔ nənk ȧkȧriyana kə kanthɛ, ka rəka mɔ kotha kə abana ȧke a kotər ka ɛkoŋ yanlɛ kə thor ro thɔf.

¹² Ɔwa ɛsɛm aŋa ba tatək tanlɛ ŋa tətəp bɛ ɛyɛt ɛwɔrka ya ȧŋthɔf yi ɛbȧmp ya rokɔm bɛ aŋ yi ri rokor kati.

¹³ Ka rim rə der ro ŋɔŋ, rə pa, Pita, yokanɛ, fai, mə sɔm.

¹⁴ Kɛrɛ Pitaŋ ɔ pa, Yi thahɔ Pa, kotȧy-e i la hɛ di rəka o rəka ara te yi rəsəm thalɔm ara yi rəyifa.

¹⁵ Ka ȧrim rə der ro ŋɔŋ sɔ bekȧ mȧrəŋ, rə pa, Ara Kuru ɔ po fethər-e, te tela ri rəyifa.

¹⁶ A po yɔ ȧte haŋ məsas, ɔwa ka ɔlɛmp wati a ŋata akotha ka ȧkȧriyana.

¹⁷ Ɔwa ma pə sɔkanɛ Pitaŋ ta aŋlokthi ŋa manəŋk ame, kəla, aŋlaŋgba aŋa Kɔrniliɔs ɔ som, maŋ po yif ta ȧŋseth ŋa Saymɔn-e, aŋ təmȧ ro dare,

¹⁸ aŋ tela, aŋ yif bepi Saymɔn ɔwe a bont Pita ɔ yianɛ ri.

¹⁹ Ɔwa ma Pitaŋ ɔ tȧmtȧmnɛ salata manəŋk ame-e, ɔYina ɔ pa ro ŋɔŋ, Kəlo, afəm asas aŋ thɛns mu.

²⁰ Tiyȧŋ yokanɛ, mə thor, mə kɔnɛ yi ŋaŋ kəte ba asikɛ ȧtesoma-e minɛ som ŋa.

²¹ Ka Pitaŋ ɔ thor ka aŋfəm, ɔ pa, Minɛ yi ɔwe mə nə thɛns: kɔyɛŋ nə der-e?

²² kaŋ pa, Kɔrniliɔs ɔkaptin, wuni wɔŋ ɔwe nesa Kuru, ɔwe ba sɔ ŋes afinɔ kətɔŋ ka ȧŋbona ŋa aŋ Yuda bɛ, umaleka usəm ɔ maŋ kɔ tə kəsom ro rɔmu kȧmȧ mə kɔ ro seth kɔŋ, kȧmȧ ɔ təl ȧsim ȧte mə ba tə kətɔri kɔ.

²³ Ka Pitaŋ ɔ kanɛ ŋa kȧmȧ aŋ wɔŋ, kɔ yia ŋa. Ɔwa ka ȧŋrey alɔm ɔ kɔ yi ŋaŋ, ka aŋwɔnt alɔm ro Yɔpa aŋ paya kɔ.

²⁴ Ɔwa ka ȧŋrey alɔm aŋ wɔŋ ro Sisaria. Ka Kɔrniliɔs ɔ kar ŋa, ɔ po kofəth rȧkomra rɔŋ yi aŋyathki ŋɔŋ.

²⁵ Ma Pitaŋ ɔ wɔŋ-e, Kɔrniliɔs ɔ gbans kɔ, kɔ fumpɔ ka ȧtȧtək tɔŋ, ɔ bȧtho kɔ.

²⁶ Kɛrɛ Pitaŋ ɔ gbasi kɔ ɔ pa, Yokanɛ; min minɛnɛ, min wuni kəpet wɔŋ.

²⁷ Ma ɔ fɔfȧnɛ kɔ-e, ɔ wɔŋ, kɔ bəp afəm agbȧthi aŋ po gbanɛ.

²⁸ kɔ kanɛ ŋa, Naŋ gbeŋ, nə tȧrȧ kəpa pə lomp hɛ ta uYuda tə kəkulunɛ thalɔm tə kəkɔ rə wuni ka abona alɔm; kɛrɛ Kuru ɔ tɔri mi kəpa i yi hɛ tə kəpa ta wuni o wuni ɔ yi hɛ usəm, thalɔm ɔ yi uyifa.

²⁹ Tȧsom i der kəte fɔfəthanɛ ma a som kətela mi. Tiyȧŋ i yif, kɔyɛŋ nə som ta ȧtȧ mi-e?

³⁰ Ka Kɔrniliɔs ɔ pa, Mərey manlɛ thɔŋ ka aŋhawa aŋe, i bɔ ramnɛ karamnɛ ka aŋhawa aŋa bekȧ tȧmthərɛŋanlɛ ka ȧŋseth a mi; ɔwa kəla, ulaŋgba ɔ təmȧ rodi kȧmi, ɔ wɔŋ ɛlopra ɛgbɛntha,

³¹ kɔ pa, Kɔrniliɔs, a təlȧ karamnɛ ka mu, ɔwa Kurɔŋ ɔ nanɛ ɛboya ɛ mu.

³² Tiyȧŋ som ro Yɔpa kətela Saymɔn ɔwe ba ȧŋgbȧnthir ŋa Pita. Ɔ yianɛ ka ȧŋseth ŋa Saymɔn ɔkaraŋke ro baŋ dayɛr.

³³ Tiyȧŋ i som lɛmp ro rɔmu; ɔwa mə po yɔ ɔfinɔ ma mə der. Saŋ bɛ sə bəpər nɔ ka kakəli ka Kuru tə kətəl mȧtȧy bɛ ama Kuru ɔ po yamari mu.

³⁴ Ka Pitaŋ ɔ təp tə kəfɔfanɛ ŋa, ɔ pa, Ka tȧteŋ i nənk kəpa Kurɔŋ, ɔ ba hɛ agbȧy,

³⁵ kɛrɛ rə abona o bona aŋa mə nesa kɔ, ɔwa aŋa mə yɔ ɔlompi, ɔ tə malanɛ ŋa.

³⁶ Ȧrim ara ɔ som ka aŋwuth ŋa Isrɛl ara tɔri ȧkɛra kəfinɔ ka məthɔfəl ka kȧta ka Yisɔs Kraystȧŋ (kɔnɔ yi ɔMarki ka bɛ);

³⁷ ȧrim rati, naŋ nə tȧrȧ, ara a gbanthɛnɛ ro Yudia bɛ, kətəp ro Kalili kədarəŋ ka ȧŋbaftisəm aŋa Yɔnȧŋ ɔ taməs.

³⁸ Rə tɔri kəpa Kurɔŋ ɔ reŋ Yisɔsȧŋ ɔwe ro Nasarɛth ɔYina məsəm yi afɔsɔ; ɔ kɔth kɔth dɛr o dɛr kəyɔ ɔfinɔ, ɔ yenkəs aŋfəm bɛ aŋa Sethani mɔ sɔmpa, kotȧy-e Kurɔŋ ɔ yi yi kɔn.

³⁹ Saŋ sə yi maseri salata mȧtȧy bɛ ama ɔ po yɔ ka ȧŋthɔf ŋa aŋYuda yi ro Yerusalɛm. Kɔnɔ sɔ-e, aŋ dif kɔ, kəgbak kɔ ka aŋənt.

⁴⁰ Ka Kuru ɔ yokas kɔ ka ȧŋrey aŋa bekȧ məsas, ɔwa ɔ tɔri kɔ gbafəth,

⁴¹ pə yi hɛ ka aŋfəm bɛ kɛrɛ ka maseri ama Kurɔŋ ɔ mɔtha po thith, hali ka saŋ aŋa po di, dɛ yi aŋa po mun yi kɔnɔ kədarəŋ ka ma ɔ yokanɛ kətɔŋ ka aŋfi.

⁴² kɔ yamari su tə kətaməs ka aŋfəm, yi tə kəseri kəpa ɔwe-e, kɔnɔ Kuru ɔ bot tə kəyi uThoŋkas ka aŋkəli yi ka aŋfi.

⁴³ Aŋnȧbi bɛ aŋ seri ta atɔŋ, kəpa wuni o wuni ɔwe mə lanɛ kɔ ɔ tə sɔthɔ katerɔ ka ɛhakɛ yɔŋ salata ȧŋes ŋɔŋ.

⁴⁴ Ma Pitaŋ ɔ yi ka kafɔf ȧsim ȧte-e, ɔYina məsəm ɔ thorər ŋa bɛ aŋa təl ȧrim.

⁴⁵ kaŋ Yuda alanɛ bɛ aŋa paya kɔ aŋ kabanɛ ta ma tȧbona təlɔm tə sɔthɔ sɔ ȧŋboya ŋa ɔYina məsəm.

⁴⁶ Pəkasifɛ aŋ təlȧ ŋa aŋ fɔf tənt tətel, aŋ thɔkəs Kuru. Ka Pitaŋ ɔ lasi, ɔ pa,

⁴⁷ Wuni ɔ gbəli bɛnt mȧnt tə kəbaptais aŋe, aŋa po sɔthɔ ɔYina məsəm mɔ saŋ-i?

⁴⁸ kɔ yamari kȧmȧ a baftays ŋa ka ȧŋes ŋa Yisɔs Krayst. Kaŋ nɛmthɛnɛ kɔ kȧmȧ ɔ yirȧ yi ŋaŋ ta mərey məlɔm.