Mȧyɔs ma aŋsom 1 - Ȧŋlemrȧnɛ Ȧfu

¹ Magbal ma mi mətɔtɔkɔ mə tɔri O Thiɔfilɔs, ta ȧte Yisɔsȧŋ ɔ təp tə kəyɔ dɛ yi tə kəthəksa bɛ,

² haŋ ȧŋrey aŋa a ŋata kɔ rokɔm, kədarəŋ kɔ po sɔŋ aŋyamari ka aŋfɔsɔ ŋa ɔYina məsəm ka aŋsom aŋa ɔ po thith.

³ Ka aŋa sɔ ɔ tɔrinɛ ukəli kədarəŋ ka kanakasi kɔŋ, rə məseri məgbəraŋ məgbathi rə ɛlɔkɔ ɛgbaskɛ, ka mərey təgba tərəŋ-e, ɔwa ɔ fɔf ta rȧbȧy ra Kuru.

⁴ Ɔwa ma ɔ yi yi ŋaŋ-e, ɔ maŋ ŋa kȧmȧ aŋ te wur ro Yerusalɛm, kɛrɛ kȧmȧ aŋ kar aŋlahiri ŋa ɔKas, aŋa ɔ pa, I la tɔri nu kəpa-e,

⁵ Tə tɛntɛnɛ Yɔnȧŋ ɔ po baftays yi mȧnt, kɛrɛ yeŋka mərey məgbathi mə thas-e, a tə baftays nu yi ɔYina məsəm.

⁶ Tiyȧŋ maŋ po thoŋklanɛ dɛr rɔkin-e, aŋ yif kɔ, aŋ pa, ƆMariki mə tə kala rȧbȧy ro Isrɛl ka ȧŋlɔkɔ aŋe-i?

⁷ kɔ pa ro ŋaŋ, Pə yi hɛ ta ȧtȧ nu tə kətara ɛsibri thalɔm ɛlɔkɔ ɛyɛ ɔKas ɔ po bot ka aŋfɔsɔ ŋɔŋ gbeŋ.

⁸ Kɛrɛ nə tə sɔthɔ afɔsɔ ma ɔYina məsəm ɔ derər nu; ɔwa nə tə yi maseri ma mi ro Yerusalɛm-o, ro Yudia bɛ-o, ro Samaria-o, ɔwa haŋ ka ɔthalnɛ wa ȧdȧru.

⁹ Ma ɔ po pa mȧtȧy ame-e, a ŋata kɔ rokɔm rodi ka ɛfɔr yaŋ, ka kərənt kə maŋk kɔ ka kakəli ka ŋaŋ.

¹⁰ Ɔwa mɔ mə aŋ kəli təŋ rokɔm mɔ mɔ kɔnɛ-e, kəla, alaŋgba ŋarəŋ aŋ təmȧ rayɛr ka ŋaŋ rə ɛlopra ɛfera,

¹¹ aŋ pa, Naŋ alaŋgba ŋa ro Kalili, kɔyɛŋ mə nə təmȧ nə kəli rokɔm-e? Yisɔsȧŋ ɔkin ɔwe-e, ɔwe a nɔy nu a ŋata ro riana-e, ya mɔ kȧl sɔ der mɔ mə nə nənk kɔ ɔ kɔnɛ ro riyana.

¹² kaŋ kȧlanɛ ro Yerusaləm kəwur ka kateŋ ka Ɔlif, ȧke yi amayl ŋin kəwur ro Yerusalɛm.

¹³ Maŋ bek-e, aŋ wɔŋ ka ȧŋkonko rokɔm, ro aŋ yirȧ; Pitaŋ-o, Yeməsȧŋ-o, Yɔnȧŋ-o, Andrɔŋ-o, Filipȧŋ-o, Thɔmɔsȧŋ-o, Barthɔlɔmiyuȧŋ-o, Mathyɔŋ-o Yeməsȧŋ ɔwan ka Alfiɔs-o, Saymɔnȧŋ ɔSelɔt-o, yi Yudasȧŋ ɔwɔnt ka Yeməsȧŋ.

¹⁴ Aŋe bɛ rə ȧmerȧ ŋin aŋ bȧsər kəramnɛ thuŋ, yi aŋfəm abom, yi Merɛŋ ɔkara ka Yisɔsȧŋ yi aŋwɔnt ŋɔŋ aruni.

¹⁵ Ɔwa ka marey ame Pitaŋ ɔ təmȧ ɔ fɔf kətɔŋ ka aŋsom, (aŋ yi ri afəm mɔlɔ ma kɛmɛ kin kəgba) ɔ pa,

¹⁶ Awɔnt mi, mȧgbal mə yi tə kəlasər ama ɔYina məsəm ka kȧsəŋ ka Debid ɔ fɔf ta Yudas, ɔwe yi ɔtəma kədi ta ŋaŋ aŋa bət Yisɔsȧŋ.

¹⁷ kotȧy-e a lɔmanɛ kɔ yi saŋ, kɔ sɔthɔ ȧŋni ŋɔŋ ka mapanth ame.

¹⁸ (Ka-ake ɔlaŋgba ɔwe ɔ sɔthɔ ȧkay ka ȧŋrȧm ŋa maləs mɔŋ, kɔ fumpɔ bəm, kɔ gbayanɛ ratɔŋ, ka anumpa ŋɔŋ bɛ nə wur.

¹⁹ Ka aŋfəm bɛ aŋa yi ro Yerusalɛm aŋ tȧrȧ ti haŋ a bont ɔdɛr wati ka akənt ka ŋaŋ, Ro Akɛldama, ŋə yi kəpa, Akɔr ka Mətir).

²⁰ Ȧtesoma-e a gbal ti ka ȧkȧfȧ ka ȧŋSams, Ta mayira mɔŋ mə yi məyeŋ, Ɔwa, ta wuni ɔ te yirȧ ri; ɔwa Ta ulɔm ɔ gbasi mapanth mɔŋ.

²¹ Tiyȧŋ ka aŋfəm aŋa yi yi saŋ alɔkɔ bɛ ma ɔMarki Yisɔs ɔ wɔŋ ɔwa ɔ wur kətɔŋ kȧsu,

²² kətəp ka ȧŋbaftisəm ŋa Yɔn, haŋ kəkɔ ka ȧŋrey aŋa a gbasir su kɔ-e, ɔwa a ŋata kɔ ro riyana, kətɔŋ ka aŋe-e, ukin ɔ yi tə kəsəkɛ məseri yi saŋ ta kȧyokanɛ kɔŋ.

²³ kaŋ təmər ŋarəŋ, Yosɛf-əŋ ɔwe a bont Basabas, ɔ ba sɔ ȧŋes ŋa Yustus; yi Mathayas-əŋ.

²⁴ kaŋ ramnɛ, aŋ pa, Munɔ ɔMarki, mə tȧrȧ ɛmerȧ ya afəm bɛ, tɔri su ɔreke ka aŋarəŋ aŋe mə po thith,

²⁵ tə kəgbasi matəma ka mapanth ame yi aŋsom aŋa Yudasȧŋ ɔ thamrɔ kȧmȧ ɔ kɔnɛ ka ɔdɛr wɔŋ.

²⁶ kaŋ sɔŋ məthəŋ kətɔŋ ka ŋaŋ; ka mathəŋ mə wop Mathayas-əŋ. Ɔwa aŋ lɔmanɛ kɔ ka aŋsom tɔfɔt ukin.