3 Yɔn 1 - Ȧŋlemrȧnɛ Ȧfu

¹ Ɔbaki ka Kayəs, ɔwe i bɔthər ka tȧteŋ.

² Ɔyathki kȧmi ufinɔ, i fela kȧmȧ mə sabathi ka kəyeŋk mədɛr, mɔ mə aŋesəm a mu aŋ sabathi.

³ kotȧy-e i ba məbɔnɛ məbana ma aŋwɔnt aŋ der aŋ seri ta tȧteŋ ta mu, mɔ mȧ mə kɔth ka tȧteŋ.

⁴ I ba hɛ məbɔnɛ ama mə thas ame tə kətəl kəpa aŋwuth a mi aŋ kɔth ka tȧteŋ.

⁵ Ɔyathki ufinɔ, tȧy o tȧy ȧtȧ mȧ mə yɔna aŋwɔnt atik, mə yɔ ri məpanth məfinɔ:

⁶ aŋa po seri rodi ka aŋchɔch ta mabɔthər ma mu: ɔwa mə yɔ ɔfinɔ bepi mə mar ŋa ka ȧŋbiyas ŋaŋ mɔ mə mamanɛ ma mu mə yi ka Kuru.

⁷ Pəkasifɛ aŋ po kɔnɛ salata ȧŋes ŋɔŋ, kəte nɔy koko ka tȧbona təlɔm.

⁸ Tiyȧŋ sə yi tə kəmar afəm mɔ aŋe kȧmȧ sə yi akump amar ka tȧteŋ.

⁹ I po gbalər aŋchɔch kɛrɛ Diotrefes, ɔwe bɔthər tə kətəma kədi kətɔŋ ka ŋaŋ, ɔ malanɛ hɛ su.

¹⁰ Tiyȧŋ, bepi i der-e, i ti kala ȧmerȧ ka mȧyɔs mɔŋ yi mafɔf mɔŋ məyai kəŋamnɛ su: ɔwa ȧte tə be hɛ kɔ, kɛrɛ kɔnɔ ɔ selɔ hɛ tə kəmalanɛ aŋwɔnt, ɔwa aŋa yema yɔ yi ɔ bɛnt ŋa, ɔ wurɔ ŋa ka aŋchɔch.

¹¹ Ɔbɔthər kȧmi, te tansanɛ mələs, kɛrɛ tansanɛ məfinɔ. Ɔwe mə yɔ ɔfinɔ ɔ yi ka Kuru: kɛrɛ ɔwe mə yɔ ɔləs ɔ tha nənk hɛ Kuru.

¹² Demetriɔs ɔ ba ȧŋes afinɔ kətɔŋ ka aŋfəm bɛ, yi ka tȧteŋ sɔ: saŋ sɔ sə seri ti; ɔwa mə tȧrȧ kəpa maseri ma su mə yi təteŋ.

¹³ I ba tȧy təgbȧthi tə kəpa ro rɔmu, kɛrɛ i yema hɛ gbalər mu rə ruba yi rə kəthaŋkɛ.

¹⁴ Kɛrɛ i bot ȧmerȧ kəpa sə tə yeŋk nəŋkanɛ, ɔwa sə tə fɔf der yi derȧŋ.

¹⁵ Ta məthɔfəl mə yi ro rɔmu. Aŋyathki a su aŋ kori mu. Kori aŋyathki bɛ kin o kin.