2 Timɔthi 4 - Ȧŋlemrȧnɛ Ȧfu

¹ Tiyȧŋ i maŋ mu ka kȧbəprȧnɛ ka Kuru, yi ka ɔMarki Yisɔs Krayst ɔwe yi tə kəthoŋkas aŋkəli yi aŋfi ka kȧder kɔŋ yi rȧbȧy rɔŋ.

² Taməs ȧrim ra Kuru. Bȧsər tɔri ri lɔkɔ o lɔkɔ. Ŋal ɔwa maŋ, ɔwa bȧksər rə kəmuyu kəte thamrɔ,

³ ȧtesoma-e ȧŋlɔkɔ aŋ tə bek maŋ te sɔ gbəli muyu kəthəksa ka tȧteŋ, kɛrɛ aŋ tə yema gbo təl ȧtȧ yi təbɔthi təl, ɔwa aŋ tə fir akarmɔkɔ agbȧthi aŋa yi abeki ŋa.

⁴ Aŋ tə bȧr tȧteŋ kəmuth, ɔwa aŋ tə fəlɛ ka tȧyem.

⁵ Kɛrɛ munɔ mə yi tə kəbum ka tȧy o tȧy, ɔwa muyu ɛsɔmpanɛ, yɔ mapanth ma ukawandi, sɔŋ məseri məfinɔ salata mapanth ma mu.

⁶ kotȧy-e minɛ i təmȧ mɔ sathka təfak, ɔwa ȧŋlɔkɔ ŋa kakɔnɛ kȧmi aŋ po fat.

⁷ I po tim katim kəfinɔ, i po gbanthi ȧŋbara a mi, i po bɛnɛ kȧlanɛ.

⁸ Tiyȧŋ ȧniyɔ ŋa mȧlompi aŋ yi ta ȧtȧ mi, aŋa ɔMarki, ɔThoŋkas ulompi, ɔ tə sɔŋ mi ka ȧŋrey ŋati; ɔwa pə yi hɛ ta ȧtȧ mi gbo son-e, kɛrɛ ta ȧtȧ ŋaŋ bɛ aŋa bɔthər kȧder kɔŋ.

⁹ Bȧsər kȧmȧ mə yeŋk der ro rɔmi,

¹⁰ kotȧy-e Dimas ɔ po tey mi ma ɔ bɔthər ȧdȧru are, ɔ poŋ thɔŋ kɔnɛ ro Thɛsalonika, Krɛsɛns ro Kaletia, Taytɔs ro Dalmetiya.

¹¹ Luk son ɔ yi yi minɛŋ. Ma nə der-e, tela Mak-əŋ kȧmȧ ɔ der yi munɔ, pəkasifɛ ɔ yi umar ufinɔ ta ȧtȧ mi ka mapanth.

¹² I po somra Tikikɔs ro Ɛfisɔs.

¹³ Ma mə der-e, kȧrȧ aruma ra mi ara i tey ro Troas ka ȧŋseth ŋa Kapɔs, yi ȧtȧfȧ sɔ, dɛ yi pə tha gbethi ɛreka.

¹⁴ Alɛksanda ɔkabi ɔ bora yɔ mi ɔləs; ɔMarki ɔ tə ram kɔ mɔlɔ ma mȧyɔs mɔŋ mə yi.

¹⁵ Ɔwa munɔ sɔ bumnɛ kɔ, pəkasifɛ ɔ bora kətim akawandi kȧsu.

¹⁶ Ka kathoŋka kȧmi kətɔtɔkɔ i ba hɛ wuni o wuni tə kətəma mi rayɛr; ŋa bɛ aŋ poŋ tey mi. I nɛmthɛnɛ Kuru kȧmȧ aŋ te sɔthɔ ti məthɛkɛ.

¹⁷ Kɛrɛ ɔMarki ɔ təmȧ mi rayɛr, kɔ bȧksər mi, kȧmȧ pə yi ȧŋsabu a mi, tȧbona təlɔm bɛ aŋ tə təl ȧkɛra kəfinɔ ka Kuru; kɔ kathi mi ka kȧsəŋ ka ȧŋsoyila.

¹⁸ ƆMarki kɔnɔŋ ɔ tə kisis mi ka mȧləs bɛ, ɔwa ɔ tə bɛnɛ mi ka rȧbȧy rɔŋ rəsəm. Ta kɔn yi ayiki haŋ thȧnkȧŋ thəbana. Amina.

¹⁹ Kori Prisila yi Akwila, yi kabɔr ka Onisifɔrɔs.

²⁰ Irastɔs ɔ yi ro Kɔrinth, kɛrɛ i tey Trofimɔs ro Mɛlita, ɔ tu.

²¹ Bȧsər kȧmȧ mə der yeŋka ɔtaŋk ɔ wɔŋ. Yubulɔs ɔ kori mu yi Pudɛns, yi Linɔs, yi Klɔdiya dɛ yi aŋwɔnt bɛ.

²² Ta ɔMarki ɔ yi ka aŋyina a mu. Ta aboŋa aŋ yi ro rɔmu. Amina.