2 Yɔn 1 - Ȧŋlemrȧnɛ Ȧfu

¹ Ɔbaki ka ɔwuni bom uthith yi awuth ŋɔŋ, aŋa i bɔthər ka tȧteŋ; ɔwa pə yi hɛ gbo minɛ son, kɛrɛ ŋa bɛ aŋa po tȧrȧ tȧteŋ;

² salata tȧteŋ ȧtȧ yianɛ ro rɔsu, ɔwa ȧtȧ yi yi saŋ thəbana.

³ Ta aboŋa, yi ȧney, yi məthɔfəl mə yi ro rɔnu kəwur ka Kuru ɔKas, yi ka Yisɔs Krayst, ɔWan ka ɔKas, ka tȧteŋ yi ka məbɔthər.

⁴ I ba məbɔnɛ məbana ma i fir kəpa awuth a mu alɔm aŋ kɔth ka tȧteŋ, mɔ mə sə po sɔthɔ ayamari kəwur ka ɔKas.

⁵ Ɔwa ka-ake i nɛmthɛnɛ mu, yȧŋ, pə yi hɛ mɔ i gbalər mu ayamari afu, kɛrɛ aŋa sə po sɔthɔ kȧbi ka ɔtəpɛr, kȧmȧ sə bɔthərȧnɛ.

⁶ Mabɔthər mi ame, kȧmȧ sə kɔth kətȧŋȧnɛ ka ɛyamari yɔŋ. Ɔwa aŋyamari ŋi aŋe, hali mɔ nə po təl kȧbi ka ɔtəpɛr, kȧmȧ nə kɔth ri.

⁷ kotȧy-e afəm ayaŋfa agbȧthi aŋ po wɔŋ ka ȧdȧru, hali ŋaŋ aŋa te gbithanɛ kəpa Yisɔs Krayst ɔ po der ka madɛr. Ɔwe ɔ yi uyaŋfa yi ukraist uyem.

⁸ Bumnɛ nu, kȧmȧ nə te dim ȧtȧ nə po yɔ kɛrɛ kȧmȧ nə sɔthɔ ȧrȧm agbenthis.

⁹ Wuni o wuni ɔwe mə təmȧ kəri, ɔwa ɔ bȧkər hɛ ka mathəksa ma Kraist-e ɔ ba hɛ Kuru. Kɛrɛ kɔn ɔwe bȧkər ka mathəksa ma Krayst, ɔkati ɔ ba ɔKas yi ɔWan sɔ.

¹⁰ Bepi wuni o wuni ɔ der ro mu ɔwe te kȧrȧ mathəksa ame, te malanɛ kɔ;

¹¹ kotȧy-e kɔn ɔwe mə kori kɔ ɔ ba ani ka mapanth mɔŋ maləs.

¹² Ma i ba tȧy təgbȧthi tə kəgbalər mu, i yema hɛ gbal ti rɔ areka yi ruba, kɛrɛ i bot ȧmerȧ tə kəder ro mu, kȧmȧ sə gbəli fɔf der yi derȧŋ, kȧmȧ mabɔnɛ ma su mə yi məgbenthis.

¹³ Aŋwuth ŋa ɔwɔnt mu ubɛra uthith, aŋ kori mu. Amina.