2 AŋKɔrenth 8 - Ȧŋlemrȧnɛ Ȧfu

¹ Pə thas ri, awɔnt sə yema tɔri nu ta ȧŋboŋa ŋa Kuru aŋa a sɔŋ ka aŋlanɛ ŋa Yisɔs Krayst ro Masidoniya,

² tə kəyi, hali kətɔŋ ka kəmɛmər ka kəsɔmpanɛ kəbana-e, kəwur ka ɔlasər wa mabɔnɛ dɛ yi amɔnɛ ma ŋaŋ məbana-e, aŋ sɔŋ ɛboya ɛfonsiri.

³ Ɔwa minɛ i seri ti kəpa mɔ mə aŋfɔsɔ ŋaŋ aŋ yi, yao pəthas ras aŋfɔsɔ ŋaŋ, aŋ sɔŋ kəmar rə məselɔ məfinɔ.

⁴ Ɔwa aŋ nɛmthɛnɛ su finɔ salata ȧŋboŋa aŋe kȧmȧ ŋaŋ aŋ gbəli pantnɛ ka kamar ka aŋsəm.

⁵ Ya aŋ yɔ, pə yi hɛ mɔ mə sə po nanɛ gbo-e, kɛrɛ aŋ mɔtha sɔndnɛ ka ɔMarki, dɛ yi do rɔsu kətaŋ ka mȧselɔ ma Kuru,

⁶ haŋ sə gbisəŋa Taytɔs kəpa ye, mɔ mɔ po təp mapanth ame-e, ɔ tə pons sɔ ȧŋboŋa aŋe ro rɔnu.

⁷ Tiyȧŋ, ma pə yi nə ba tȧy o tȧy ɔgbenthis-e, pə yi mɔ-e kəlanɛ-o, kəgbəli fɔf-o, kətara tai-o, yi məyasyas bɛ-o, dɛ yi mabɔthər ma nu ta ȧtȧ su, botər ti nu ȧmerȧ kȧmȧ nə fui ka ȧŋboŋa aŋe sɔ.

⁸ I fɔf hɛ ti mɔ ayamari, i fɔf gbo tə kəgbɛŋgbɛŋ ɔfera wa mabɔthər ma nu asabu ŋa mayasyas ma alɔm.

⁹ kotȧy-e nə tȧrȧ ȧŋboŋa ŋa ɔMarki kȧsu Yisɔs Kraystȧŋ, kəpa hali ma ɔ yi uyola-e, salata nu ɔ səkɛ umɔnɛ, kȧmȧ naŋ kətaŋ ka amɔnɛ mɔŋ-e, nə gbəli səkɛ ayola.

¹⁰ Kɛrɛ ka ȧtȧy ȧte i tɔri nu ananɛ a mi, tə kəpa ye, pə tha yi ɔfisa ta ȧtȧ nu bepi nə gbenthis ka-ake ȧtȧ nə təp dendis kəyo; pə yi hɛ kəyɔ gbo kɛrɛ nə yema yɔ ti yathi;

¹¹ kȧmȧ mɔ mə nə la ba ȧmerȧ abɛnɛnɛ-e, yaŋ sɔ nə tə gbenthis ti mɔlɔ ma aŋfɔsɔ a nu aŋ yi.

¹² kotȧy-e, bepi ȧŋmerȧ abɛnɛnɛ ŋati aŋ yi ri-e, a malanɛ ŋi kətȧŋȧnɛ mɔ mə wuni mɔ ba, pə yi hɛ mɔ mɔ te ba.

¹³ Ȧtesoma-e i pa hɛ ti kȧmȧ a gbəŋki akothe ka alɔm tə kədeŋ nu ki,

¹⁴ kɛrɛ kȧmȧ pə yi ɔthənanɛ, kȧmȧ kaba ka nu ka-ake kə gbəli yɔna kate ba ka ŋaŋ, dɛ yi kaba ka ŋaŋ kə gbəli yɔna kate ba ka nu; kȧmȧ ɔthənanɛ ɔ yi,

¹⁵ mɔ mə a gbal kəpa, Ɔwe po thoŋklanɛ ɔgbȧthi ɔ tianɛ hɛ koko, rɛ yi ɔwe po thoŋklanɛ ɔthan ɔ paŋ hɛ.

¹⁶ Kɛrɛ ta Kuru ɔ ba ȧmɔmɔ ma ɔ bot aŋfela abana ŋin ŋati ka ȧŋmerȧ ŋa Taytɔs ta ȧtȧ nu.

¹⁷ kotȧy-e tə tɛntɛnɛ ɔ malanɛ ȧŋmȧŋ a su; kɛrɛ ma ɔ yi uyasyas ka aŋyɛthɛ ŋɔŋ sɔ-e, ɔ kɔnɛ ro rɔnu ka mȧselɔ mɔŋ gbeŋ.

¹⁸ Ka sə somra yi kɔn ɔwɔnt ɔwe ɛchɔch bɛ ɛ kolo salata mayasyas mɔŋ ka kataməs ȧkɛra kəfinɔ ka Kuru.

¹⁹ Ka pə thas ri sɔ-e, ɛchɔch ɛ thith ɔwuni kati tə kəpaya su ma sə kera ȧŋboya afinɔ aŋe-e aŋa mə sɔŋ ɔMarki ayiki, ɔwa aŋ kȧl lasər mȧselɔ ma su.

²⁰ Ɔwa sə thaŋka ȧte, kȧmȧ wuni o wuni ɔ tə thɛkɛ su ka ȧŋpa ŋa ȧŋboya abana aŋe aŋa sə kɔ sɔŋ;

²¹ kotȧy-e sə thɛns mȧtȧy məmari, pə yi hɛ gbo ka kakəli ka Kuru, kɛrɛ ka kakəli ka afəm a kəpet sɔ.

²² Ɔwa sə po som dɛ yi ŋaŋ ɔwɔnt su ɔwe sə po mɛm ɔgbȧthi, ka sə fir kɔ ubɔthi lanɛ ka mȧtȧy məlai, pə tha gbethi ka-ake salata kapələnɛ kəbana ȧke ɔ ba ka ȧŋgbȧp a nu.

²³ Bepi a yif ta Taytɔsȧŋ, ɔ yi upantnɛ kȧmi dɛ yi ukos a mi ka mapanth ta ȧtȧ nu; thalɔm bepi a yif ta aŋwɔnt a su-e, ŋa yi aŋsom ŋa ɛgbanɛ ya Yisɔs, ɔwa ŋa yi sɔ aŋfəm ŋa aŋyiki ŋa Krayst.

²⁴ Tiyȧŋ tɔri ŋa nu ro der kədi ka ɛgbanɛ ya Yisɔs, maseri ma mabɔthər ma nu, dɛ yi maseri ma kagbak kȧsu ɛyonka ta ȧtȧ nu.