2 AŋKɔrenth 6 - Ȧŋlemrȧnɛ Ȧfu

¹ Ɔwa ma sə pantnɛ yi kɔn ka mȧpanth-e, sə nɛmthɛnɛ nu kȧmȧ nə te sɔthɔ ȧŋboŋa ŋa Kuru kətiŋ.

² (kotȧy-e ɔ pa, Ka alɔkɔ ȧfɔy tȧy i po sua mu ɛləns, Dɛ yi i po mar mu ka ȧŋrey ŋa kəkisi; Kəla, ka-ake ŋə yi ȧŋlɔkɔ ȧfɔy tȧy, Kəla, ka-ake ŋə yi ȧŋrey ŋa kəkisi).

³ Sə yɔ hɛ tȧy o tȧy ȧtȧ mə yɔ wuni ɔ pənthbəla, kȧmȧ a te thɛkɛ kayɔna kȧsu;

⁴ kɛrɛ ka mɔtai bɛ mɔ ɛbɔy ya Kuru sə mɛm tə kəkolonɛ ka kəmuyu kəbɔli, ka ɛsɔmpanɛ, ka amɔnɛ, ka kəkɛthanɛ,

⁵ ka kəsapəth, ka tərəŋka, ka ɛtotok, ka məpanth məbaki, ka kəsɔkɔ, ka kəwop ɛsum;

⁶ ka kəgbəransnɛ, ka kətara tȧy, ka kəmuyu kəlele, ka məthɔth, ka ɔYina məsəm, ka mabɔthər ma təteŋ,

⁷ ka ȧrim ra təteŋ, ka aŋfɔsɔ ŋa Kuru, ka ɛyɛt ɛtima ya məlompi ka kȧdiyɔ yi ka kȧmɛrɔ,

⁸ ka ayiki dɛ yi məlap, ka ŋes aləs yi ka ŋes afinɔ; mɔ afəm atɔns tȧy, halisa sə yi təteŋ;

⁹ mɔ mə a te su tȧrȧ, kɛrɛ a tȧrȧ su finɔ; mɔ mə sə yema fi-e, kɛrɛ kəla, sə ba ŋesəm; mɔ mə a thalər su-e, kɛrɛ a dif hɛ su;

¹⁰ mɔ mə sə saŋ ɛmɔl-e, kɛrɛ sə sel məbɔnɛ; mɔ amɔnɛ, kɛrɛ sə naŋfas afəm agbȧthi; mɔ mə sə te ba koko-e, kɛrɛ sə sɔthɔ mȧtȧy bɛ.

¹¹ Nia aKɔrinth, ȧsim ta su tə yi ta ȧtȧ nu, ɛmerȧ ɛ su ɛ po kanthɛ nu.

¹² Saŋ sə thiŋkanɛ hɛ nu, niaŋ nə thiŋkanɛ gbo ɛyɛthɛ ɛ nu.

¹³ Tiyȧŋ tə kəkala məlompi, (i fɔf mɔ ka aŋwuth a mi), yɔ kȧmȧ ɛmerȧ ɛ nu ɛ bondȧ sɔ.

¹⁴ Te pantnɛ ka ante lanɛ, ȧtesoma-e ko məmanɛ mə yi kətɔŋ ka məlompi yi mələs-e? Thalɔm ko məmanɛ mə yi kətɔŋ ka ɔwaŋ yi asum-e?

¹⁵ Ama ko məmanɛ mə gbəli yi kətɔŋ ka Kraystȧŋ yi Beliɛl-e? Thalɔm ko ȧgbȧp ulanɛ ɔ ba yi ute lanɛ-e?

¹⁶ Ta a pa ras ko asekəranɛ ȧŋseth ŋa Kuru aŋ ba yi ɛyɛt ɛrɔŋ-e? Kotȧy-e saŋ sə yi ȧŋseth ŋa ɔKuru ukəli, mɔ mə Kuru ɔ pa, I ti yirȧ kətɔŋ ka ŋaŋ, ɔwa i ti kɔth kətɔŋ ka ŋaŋ; ɔwa i ti yi ɔKuru ka ŋaŋ, dɛ yi ŋaŋ aŋ tə yi aŋfəm a mi.

¹⁷ Tiyȧŋ, Wur nu kətɔŋ ka ŋaŋ, ɔwa yi nu agbaskɛ, ɔMarki ɔ pa, Te gboŋ rəka o rəka rəyifa; Ɔwa i ti malanɛ nu,

¹⁸ I ti yi uKas do rɔnu, dɛ yi naŋ nə tə yi aŋwuth a mi aruni yi aŋwuth a mi abɛra, ƆKuru ka aŋfɔsɔ bɛ ɔ pa.