2 AŋKɔrenth 4 - Ȧŋlemrȧnɛ Ȧfu

¹ Tiyȧŋ ma pə yi ti-e, sə ba kabȧtho ake, mɔ mə sə po thɔŋ sɔthɔ ȧney-e, sə thamrɔ hɛ;

² ka sə po ter mȧtȧy məmaŋknɛ ma məlap, sə kɔth hɛ rə məsɔth, sə kianɛ hɛ ȧrim ra Kuru rə kəpəŋis, kɛrɛ rə kətɔri tȧteŋ gbafəth-e, sə kolonɛ ka ȧŋmerȧ ŋa wuni o wuni rodi ka Kuru.

³ Bepi pə yi ȧkɛra kȧsu kəfinɔ kə ba kumafele-e, kə ba gbo kumafele ka aŋa mə dinɛ.

⁴ Ka ȧŋgbȧp a ŋaŋ ɔkuru ka ȧdȧru are ɔ po fithəs ɛmerȧ ya ante lanɛ kȧmȧ ɔwaŋ wa mapa məfinɔ ma aŋyiki ŋa Krayst ɔwe yi mȧbȧlȧnɛ ma Kurɔŋ ɔ te gbɛnthar ŋa.

⁵ Ȧtesoma-e, sə taməsnɛ hɛ, kɛrɛ sə tam Krayst Yisɔs ɔMarki, dɛ yi saŋ mɔ ɛbɔy ɛ nu salata Yisɔsȧŋ

⁶ kotȧy-e Kuru ɔwe yamari kȧmȧ ɔwaŋ ɔ gbɛntha kəwur ka ȧŋsum-e, kɔnɔ po gbɛntha ka ɛmerȧ ɛ su tə kəsɔŋ ɔwaŋ wa kȧtȧrȧ ka anyiki ŋa Kuru ka ader ra Yisɔs Kraystȧŋ.

⁷ Kɛrɛ sə bɛnɛ akɛŋ ake ka ɛbɔl ya ɛyɔftha ɛyɛ yi madɛr ma su, kȧmȧ aŋyiki ŋa aŋfɔsɔ abana aŋ gbəli yi ka Kuru son, aŋ wur hɛ do rɔsu hali.

⁸ Sə ba asɔmpanɛ dɛr o dɛr, kɛrɛ sə yi hɛ ka ɔgbɛkanɛ. Sə kɛthanɛ, kɛrɛ sə paŋ hɛ kəgbak ȧmerȧ.

⁹ A bȧl su, kɛrɛ a tey hɛ su fu. A napəs su ro thɔf, kɛrɛ a dim hɛ su.

¹⁰ Sə tɔrinɛ dɛr o dɛr ka madɛr ma su, kafi ka ɔMarki Yisɔs, kȧmȧ aŋesəm sɔ ŋa Yisɔs aŋ gbəli tɔrinɛ ka madɛr ma su.

¹¹ Ȧtesoma-e, saŋ aŋa yi akəli, a sɔnd su lɔkɔ o lɔkɔ ka rəfi salata Yisɔs kȧmȧ aŋesəm sɔ ŋa Yisɔs aŋ ŋaibinɛ ka madɛr ma su.

¹² Tiyȧŋ rəfi rə yɔ məpanth do rɔsu, kɛrɛ ŋesəm do rɔnu.

¹³ Kɛrɛ ma sə ba ayina ŋin ŋa kȧlanɛ dɛ yi kɔn ɔwe gbal kəpa, I lanɛ te ba ti i fɔf; tiyȧŋ saŋ sɔ sə lanɛ, te ba ti sə fɔf sɔ,

¹⁴ kȧbi sə tȧrȧ kəpa kɔn ɔwe yokas ɔMarki Yisɔs ka rəfi-e, ɔ tə yokas su sɔ kətȧŋȧnɛ ka Yisɔs, ɔwa ɔ tə kȧrȧ su yi naŋ ka kȧbəprȧnɛ kɔŋ.

¹⁵ kotȧy-e mȧtȧy bɛ mə yi ta salata nu, kȧmȧ mɔ mə ȧŋboŋa aŋ bȧr gbo bek ka afəm agbȧthi-e, kamuti mɔmɔ kə tə bȧrnɛ sɔ salata aŋyiki ŋa Kuru.

¹⁶ Tiyȧŋ sə thamrɔ hɛ, hali ma madɛr ma su ma rokaŋ mə dinɛ, halisa a kȧl fus ɛmerȧ ɛ su ɛyɛ yi rokor ȧrey o rei.

¹⁷ kotȧy-e kasɔmpanɛ kȧsu kəfəŋf, ȧke yi gbo ta alɔkɔ agbut, kə mə bȧr yɔna su ayiki alel ɔthasər ta thəbana;

¹⁸ pəkasifɛ sə kəli hɛ ka mȧtȧy ama a nəŋka rəfɔr-e, kɛrɛ ka mȧtȧy ama a te nəŋka rəfɔr. Ȧtesoma-e mȧtȧy ama a nənk mə yi gbo ta alɔkɔ agbut; kɛrɛ mȧtȧy ama a te nənk mə yi ta thȧnkȧŋ thəbana.