2 AŋKɔrenth 3 - Ȧŋlemrȧnɛ Ȧfu

¹ Saŋ sə ba kəkal sɔ təp kəkolonɛ-i? Thalɔm saŋ, mɔ alɔm mə aŋ yɔ-e, sə yi sɔ kəba ɛreka ya kətɔrinɛ kəkɔ do rɔnu, ama-e, kəwur do rɔnu-i?

² Naŋ gbeŋ nə yi ȧŋreka a su aŋa mə a gbal ka ɛmerȧ ɛ su, aŋa afəm bɛ aŋ tȧrȧ, ɔwa aŋ karaŋ.

³ kotȧy-e a tɔri ti gbafəth kəpa nə yi ȧŋreka ŋa Kraystȧŋ aŋa a po maŋkər su, aŋa a te gbal rə aruba, kɛrɛ rə ɔYina ka ɔKuru ukəli; pə yi hɛ ɛwalka ɛ məsar, kɛrɛ ɛwalka ya ɛmerȧ ya afəm a kəpet.

⁴ Ɔwa kapələnɛ kəwunɔŋ ȧke sə ba ka Kuru salata Kraystȧŋ, ki ake.

⁵ Pə yi hɛ kəpa sə yi abeki tə kəgbək koko ka ɛyɛthɛ ɛ su, kɛrɛ mȧbeki ma su mə wur ka Kuru;

⁶ kɔnɔ sɔ ɔ po yɔ su saŋ abeki tə kəyi ɛbɔy ya aŋlemranɛ afu; pə yi hɛ ka asikra, pə yi ka ɔYina; kotȧy-e asikra, ŋə mə dif, kɛrɛ ɔYina kɔnɔ mə sɔŋ ŋesəm.

⁷ Kɛrɛ bepi kabȧtho ka ȧŋsiraŋ ŋa rəfi ȧke a gbal ka məsar kə ba ayiki haŋ aŋwuth ŋa Isrɛl aŋ gbəli hɛ kəli ader ra Mosis tǝŋ, salata kagbɛntha ka ader rɔŋ, kəgbɛntha gbo ȧke mə thas;

⁸ pə tha gbethi kabȧtho ka ɔYina kə tha ba ayiki-i?

⁹ kotȧy-e, bepi kabȧtho ȧke sɔŋ mətheri kə ba ayiki-e, pə tha gbethi kabȧtho ka mȧlompi kȧa tha ba ayiki.

¹⁰ kotȧy-e tə tɛntɛnɛ ȧke la ba ayiki kə ba hɛ ayiki ka ȧŋgbȧp aŋe, asabu ŋa aŋyiki aləpsɔ maŋ thas ŋi.

¹¹ Pəkasifɛ bepi ȧke po thas kə la ba ayiki-e, pə tha gbethi ȧke mə tiyȧ tha ba ayiki abana.

¹² Tiyȧŋ ma sə ba kagbak ȧmerȧ awunɔŋ-e, sə gbəli fɔf rə kəmintha.

¹³ Sə yɔ hɛ mɔ Mosisȧŋ, ɔwe gbəpər ader rɔŋ rə kumbafele kȧmȧ aŋwuth ŋa Isrɛl aŋ te kəli ɔthalnɛ wa aŋyiki maŋ bɔ thas.

¹⁴ Kɛrɛ ɛmerȧ yaŋ gbeŋ ɛ yi ɛfith kotȧy-e, haŋ thonɔŋ a tha gbəpəri hɛ akumbafele kati ka kakaraŋ ka ŋaŋ ka aŋlemranɛ akur; pəkasifɛ kətaŋ ka Krayst son a tə gbəpəri ki.

¹⁵ Haŋ thonɔŋ bepi a karaŋ mȧgbal ma Mosis-e, akumbafele kə gbəpər ɛmerȧ yaŋ,

¹⁶ kɛrɛ ma ɔwuni mɔ lafthɛ ka ɔMariki-e, akumbafele, a tɔŋa ki.

¹⁷ Ɔwa ɔMarki kɔnɔ yi ɔYina; ɔwa ro ɔYina ka ɔMarki ɔ yi, di rəwaŋkom rə yi.

¹⁸ Kɛrɛ saŋ bɛ, rə aser ta su təgbəpəri-e, sə tɔri aŋyiki ŋa ɔMarki mɔ ɛmɛmnɛ, ɔwa a səki su ka mȧbȧlȧnɛ mɔŋ gbeŋ, rɛ ayiki rokɔm ka ayiki, hali mɔ mə kəwur ka ɔMarki ɔYina.