2 AŋKɔrenth 2 - Ȧŋlemrȧnɛ Ȧfu

¹ Ka i botəs ti ka ȧŋmerȧ a mi kȧmȧ i te der kori nu sɔ rə akori abaŋ.

² kotȧy-e bepi i yɔ nu nə nimsa-e, kanɛ mə bɔnɛs mi-e, thambe ŋaŋ aŋa i po bansəs-e?

³ Ɔwa i po gbal ȧte gbeŋ ta thani ma i der-e, i ti ba ɔnɔsinɛ salata ŋaŋ aŋa yi naŋ tə kəbɔnɛs mi; kotȧy-e i po gbak ȧmerȧ a mi yathi kəpa mabɔnɛ ma mi mə yi mabɔnɛ ma nu bɛ sɔ.

⁴ kotȧy-e i gbalər nu rə kəsɔmpanɛ kəbana yi asoli rə ȧmerȧ dɛ yi mantər məgbathi; pə yi hɛ tə kəyɔ nu nə nimsa-e, kɛrɛ kȧmȧ nə gbəli tȧrȧ mabɔthər məbana ama i ba ta ȧtȧ nu.

⁵ Kɛrɛ bepi wuni ɔ po yɔ ȧtȧy ȧtȧ mə sɔŋ kənimsa-e, pə yi hɛ ka minɛŋ gbeŋ mɔ yɔ ti, kɛrɛ ɔ yɔ ti ɔthan ka naŋ bɛ. I yema hɛ bondəs ȧŋpa ɔthasər.

⁶ Ta ɔwuni wunɔŋ-e, kathalər ȧke agbȧthi aŋ sɔŋ kɔ-e, ta kə bek kɔ.

⁷ Tiyȧŋ ka-ake pə fisa thɔŋ nə tera kɔ, ɔwa nə bɛfəth kɔ, bepi pə yi hɛ ti thani, ɔ dinɛ ratha ka ɔnɔsinɛ ɔbana.

⁸ Te ba ti i nɛmthɛnɛ nu kȧmȧ nə kȧl bȧksər mabɔthər ma nu ta atɔŋ.

⁹ Ta asabu aŋe i gbalər nu, kȧmȧ i tȧrȧ tɛntɛnɛ bepi nə selɔ tə kəwop rim o rim.

¹⁰ Bepi naŋ nə tera wuni tȧy o tai-e, minɛ sɔ i tera kɔ, kotȧy-e bepi i po tera wuni tȧy o tai-e, i yɔ ti ta ȧtȧ nu ka kȧbəprȧnɛ ka Kraystȧŋ;

¹¹ ta thani Sethani ɔ sɔthɔ afɛrɛ tə kətham su. Fɔtha sə tȧrȧ masɔth mɔŋ.

¹² Ma i bek ro Troas tə kəkawandi ȧsim təfinɔ ta Kraystȧŋ, hali ma ɔMarki ɔ kanthɛ mi kədare-e,

¹³ i sɔthɔ hɛ kəfothanɛ ka ȧŋmerȧ a mi, pəkasifɛ i bəp hɛ Taytɔs ɔwɔnt mi; tiyȧŋ ma i po lemnɛ ŋa-e, i wur ri kəkɔ ro Masidonia.

¹⁴ Kɛrɛ i muti Kuru mɔmɔ, ɔwe mə kera su lɔkɔ o lɔkɔ rə katham ka Kraist-e, dɛ yi ɔwe mə sakthi ȧŋbɔnt abɔthi ŋa kȧtȧrȧ kɔŋ dɛr o dɛr ka kȧta kȧsu.

¹⁵ Ȧtesoma-e, sə yi ȧŋbɔnt afɔlfɔl ŋa Krayst ka Kurɔŋ salata ŋaŋ aŋa po kisi, dɛ yi ŋaŋ sɔ aŋa mə dinɛ.

¹⁶ Ka aŋe sə yi ȧŋbɔnt ŋa rəfi kəkɔ ka rəfi; ɔwa sɔ-e, ka aŋlɔm sə yi ȧŋbɔnt ŋa ŋesəm kəkɔ ka ŋesəm. Ɔwa kanɛ yi ubeki ta mȧtȧy ame? Siaŋ.

¹⁷ kotȧy-e sə yi hɛ mɔ agbȧthi aŋa mə ləsər ȧrim ra Kuru, kɛrɛ sə fɔf ta Krayst rɛ ȧmerȧ ȧferȧ mɔ anthith ŋa Kuru ka kȧbəprȧnɛ kɔŋ.