2 AŋKɔrenth 12 - Ȧŋlemrȧnɛ Ȧfu

¹ Thambe i kolonɛ, hali pə yi kə mar hɛ wuni, kɛrɛ i ti der ka mənənk dɛ yi təŋaybinɛ ta ɔMarki.

² I tȧrȧ wuni ka Krayst təren tɔfɔt tanlɛ ȧtȧ po thas, (bepi ɔ yi ka andɛr-e, i tɛ hɛ; bepi ɔ yi hɛ ka andɛr-e, i tɛ hɛ. Kuru ɔ tȧrȧ). Ɔwuni wunɔŋ a sɛmpi kɔ haŋ ka kȧriyana ȧke bekȧ məsas.

³ Ka i tȧrȧ wuni ɔwe, (bepi ɔ yi ka andɛr-e, thalɔm ɔ yi hɛ ka ȧŋdɛr-e, minɛ i tɛ hɛ; Kuru ɔ tȧrȧ),

⁴ a sɛmpi kɔ lɛɔ ro Paradais, kɔ təl təfɔf ȧtȧ te yi ta wuni kəpet tə kəfɔf.

⁵ I ti kolonɛ salata ɔwuni wunɔŋ, kɛrɛ ta minɛ gbeŋ i ba hɛ tə kəkolonɛ, thambe ka rayay ra mi.

⁶ kotȧy-e hali pə yi i yema kolonɛ-e, i pəŋisnɛ hɛ; ȧtesoma-e i ti fɔf tȧteŋ; kɛrɛ i tank thɔŋ, ta thani wuni o wuni ɔ nanɛ ta ȧtȧ mi pəthas ȧtȧ ɔ nənkȧ mi, thalɔm ȧtȧ ɔ təl kəwur do rɔmi.

⁷ Ɔwa ta thani i ŋatanɛ ɔthasər-e, salata manəŋk məbana ame-e, a sɔŋ mi kəbȧnk ka ȧŋdɛr, pə yi mɔ ɔsom ka Sethani tə kəsɔmpa mi, kȧmȧ i te ŋatanɛ ɔthasər.

⁸ Ta ȧtȧy ȧte i po nɛmthɛnɛ ɔMarki haŋ məsas kȧmȧ kə gbəli gbapɛ mi.

⁹ Kɛrɛ ɔ pa ro rɔmi, ȧŋboŋa a mi aŋ yi abeki mu, kotȧy-e aŋfɔsɔ a mi aŋ yi agbenthis ka mȧrȧnt. Tiyȧŋ pə bɔnɛ mi tə kəkolonɛ ka mȧrȧnt ma mi, kȧmȧ aŋfɔsɔ ŋa Kraystȧŋ aŋ rensa mi.

¹⁰ Tiyȧŋ i ba məbɔnɛ də rəyai-o, rə tənal-o, rə mɔnɛ-o, rə təsɔmpanɛ-o, dɛ yi rə məkɛthanɛ salata Kraystȧŋ, kotȧy-e ma i yi urant-e, ȧŋlɔkɔ ŋati i yi ubaki mədɛr.

¹¹ I po yɔ apənk, kɛrɛ naŋ nə korakora mi; ɔwa pə yi nə yi naŋ tə kəkolo mi, kotȧy-e minɛ i yi hɛ roȧarəŋ ka aŋsom abana bana ta koko bɛ, hali ma i te yi koko.

¹² Tə tɛntɛnɛ i po yɔ ɛmisali ya usəm utəteŋ kətɔŋ ka nu rə kəmuyu bɛ, ka ɛmisali-e, ka mȧtȧy məkabanɛ-e, yi ka məyɔs ma kȧgbəli tȧy.

¹³ Ta ko rəka naŋ a yɔ nu nə yi rodarəŋ ka ɛchɔch ɛlɔm-e, thambe pə yi kəpa minɛ i yi hɛ kothe ta ȧtȧ nu-e? Tera mi ȧtȧy tələs ȧte!

¹⁴ Kəla, ȧŋlɔkɔ aŋa bekȧ məsas ŋi aŋe i po pay tə kəder ro rɔnu; ɔwa i ba hɛ tə kəyi kothe ta ȧtȧ nu; ȧtesoma-e i thɛns hɛ ɛyɛt ɛ nu, kɛrɛ niaŋ mə i thɛns; kotȧy-e aŋwuth aŋ yi hɛ tə kəgbompanɛ ɛyɛt ta salata aŋkomra ŋaŋ, kɛrɛ aŋkomra ŋa yi tə kəgbompanɛ ɛyɛt ta aŋwuth.

¹⁵ Minɛ i ti ləsər ɛyɛt ɛ mi bɛ rə məbɔnɛ məbana, ɔwa i ti sɔndnɛ ta ȧtȧ nu; bepi i bȧr bɔthər nu-e, naŋ nə tə gbəŋki mabɔthər ma nu-i?

¹⁶ Ɔwa ta pə yi yaŋ, min minɛnɛ i reŋ hɛ nu kothe; kɛrɛ nə pa i ba məsɔth, ka i gbip nu ka masɔth mati.

¹⁷ Minɛ i la yɔ nu yaŋfa ka hali ukin ka aŋa i som ro rɔnu-i?

¹⁸ I nɛmthɛnɛ Taytɔs tə kəkori nu, ka i som ɔwɔnt yi kɔn. Taytɔs ɔ yɔ nu aharamu-i? Saŋ sə kɔth hɛ ka ɔYina ukin kati-i? Saŋ sə kɔth hɛ ka mani min mati-i?

¹⁹ Nə nənɛ hɔ sə katanɛ kɛrɛ gbo ta ȧtȧ nu ȧŋlɔkɔ aŋe bɛ. Rodi ka Kuru sə fɔf Krayst; kɛrɛ sə yɔ mȧtȧy bɛ, abɔthər, kȧmȧ sə mar nu.

²⁰ Ȧtesoma-e i soli ta thani bepi i der-e, i ti bəp nu mɔ mə i te yema, ɔwa naŋ sɔ nə tə fir mi mɔ mə nə te yema, ta thani pə tə yi ɛgbal-o, kȧtut-o, mȧbaŋ-o, ɛpeskɛnɛ-o, kȧforthanɛ-o, kȧfɔflanɛ-o, kȧbondəsnɛ-o, dɛ yi ɛtotok;

²¹ ɔwa kȧmȧ pə te yi ma i der sɔ-e, ɔKuru kȧmi ɔ tə thora mi rodi ka nu, ɔwa i ti bok ta ȧtȧ ŋaŋ aŋa po la yɔ ahakɛ, kɛrɛ aŋ te tha thupi ta katayanɛ yi kərəp tətəp tətəp ȧtȧ aŋ po yɔ.