1 Pitar 1 - Ȧŋlemrȧnɛ Ȧfu

¹ Pita usom ka Yisɔs Krayst, ka anthith aŋa po sakanɛ ro Pɔntɔs, ro Kaletia, ro Kapadosia, ro Asia yi ro Bithiniya,

² aŋa pə yi Kuru ɔKas ɔ thith tə kəsəməs kətȧŋȧnɛ ka ɔYina kȧmȧ aŋ sanɛ ka Yisɔs Krayst dɛ yi a wɔnsir ŋa ka mȧtir mɔŋ. Ta aboŋa yi məthɔfəl ɛ bȧrnɛ ro rɔnu.

³ Ta aruba aŋ yi ka Kuru ɔKas ka ɔMarki kȧsu Yisɔs Kraystȧŋ. Ka ȧŋney ŋɔŋ abana ɔ po kom su ɔfu tə kəba kəgbak ȧmerȧ ȧke yi kəkəli salata kakal yokanɛ ka Yisɔs Krayst ka aŋfi,

⁴ dɛ yi tə kəsɔthɔ kɛŋ kəthəbana, kəgbəraŋ ȧke mə te gbəŋkɛ, ȧke a bɛnɛ ro riyana ta ȧtȧ nu,

⁵ aŋa a po bɛnɛ ka aŋfɔsɔ ŋa Kuru asabu ŋa kəlanɛ kəkɔ ka kakisi ȧke a yi tə kəŋaibi ka marey mələpsɔ.

⁶ Te ba ti nə ba məbɔnɛ məbana, hali pə yi ka-ake ta alɔkɔ agbut ɛmerȧ ɛ nu ɛ lela salata ɛgbɔns tətəp tətəp.

⁷ Soma aŋlanɛ a nu-e, aŋa yi abȧki mɔlɔ pəthasi məbɔŋɔ, (ama pə yi-e, hali mə tə dinɛ, a mɛmər ma ka anant), a tə thekthek ŋi kȧmȧ aŋ gbəli wurɔ kəthɔkəs, yi kəkolo, dɛ yi kəyikis ka kaŋaibinɛ ka Yisɔs Kraystȧŋ.

⁸ Hali ma nə te tha nənk kɔ-e, nə bɔthər kɔ, ɔwa hali ma nə te tha gbɛnthas kɔ-e, nə lanɛ yi məbɔnɛ ama nə gbəli hɛ lɔm, yi ayiki alasər,

⁹ kəsɔthɔ ɔtand wa aŋlanɛ a nu, ɔwe yi kakisi ka rafəm ra nu.

¹⁰ Aŋnȧbi aŋa seri ta ȧŋboŋa aŋa nə yi tə kəsɔthɔ-e, aŋ gbɛŋgbɛŋ, ɔwa aŋ thekthek salata kakisi ake;

¹¹ kaŋ thɛns ko wuni, thalɔm ko alɔkɔ ɔYina ka Krayst rokor ka ŋaŋ ɔ tɔri ma ɔ ŋaibi ɛsɔmpanɛ ya Krayst dɛ yi aŋyiki aŋa mə tanda.

¹² Ka a tɔri ŋa kəpa pə yi hɛ aŋ yɔnanɛ, kɛrɛ aŋ yɔna su salata mȧtȧy mati ama a po lɔma nu ka-ake, kətȧŋȧnɛ ka ŋaŋ aŋa kawandi nu ȧkɛra kəfinɔ ka ɔYina məsəm kəwur ro riyana. Ɔwa aŋmȧleka aŋ fela tə kəsɔthnɛ mȧtȧy ame.

¹³ Tiyȧŋ bȧksər nu ɛmerȧ ɛ nu, ɔwa yi nu kəthɛgbɛ; kȧl gbakər ȧmerȧ ɔgbenthis ka ȧŋboŋa aŋa yi ta ȧtȧ nu ka kaŋaibinɛ ka Yisɔs Kraystȧŋ.

¹⁴ Mɔ awuth arusəma, te nu taŋanɛ mafela ma nu məbaŋ ama nə la taŋanɛ ka ȧŋlɔkɔ ŋa kate tȧrȧ ka nu thəpaŋ.

¹⁵ Kɛrɛ mɔ kɔn ɔwe tela nu ɔ yi usəm-e, naŋ sɔ nə yi tə kəyi asəm ka mayi ma nu bɛ;

¹⁶ kȧbi a gbal hɔ kəpa, Yi nu asəm, ȧtesoma-e minɛ i yi usəm.

¹⁷ Ɔwa bepi nə tela ka ɔKas ɔwe thonkas mȧyɔs ma wuni o wuni kəte ba agbȧy-e, kɔth nu ȧŋbiyas a nu nɔru yi rənes.

¹⁸ Ȧtesoma-e nə tȧrȧ kəpa a bani hɛ nu yi ɛyɛt ɛyɛ ba kələsȧ, mɔ akala ȧferȧ dɛ yi məbɔŋɔ, kəwur ka mayi ma nu məyay ama nə sɔthɔ kəwur ka aŋbemba-a nu;

¹⁹ kɛrɛ salata mȧtir məkɛŋ ma Kraystȧŋ, mɔ kəlɔmɛ kəfɛth ɔwe te ba apora bɛ.

²⁰ Tɛntɛnɛ a thith kɔ yeŋka ɔtəmsər wa ȧdȧru, kɛrɛ a ŋaibi kɔ ka marey mələpsɔ ame ta ȧtȧ nu.

²¹ Ro rɔŋɔŋ nə lanɛ Kuru Məsaba ɔwe yokas kɔ ka rȧfi, ɔwe sɔŋ kɔ yiki, soma kȧlanɛ yi kagbak ȧmerȧ ka nu kə gbəli yi ka ȧŋgbȧp ŋa Kuru.

²² Ɔwa ma nə poŋ thɔŋ gbəransnɛ rə kəsanɛ ka tȧteŋ kəkɔ rə məbɔthər məgbenthis mȧ rȧwɔnt, kətȧŋ ka ɔYina məsəm, kəli nu kȧmȧ nə bɔthərȧnɛ asɔbɛ rə ȧmerȧ ȧferȧ,

²³ ma pə yi ti-e a kom nu ɔfu, pə yi hɛ ka mater ama ba kəthey, kɛrɛ ka mater ama te ba kəthey thȧnkȧŋ, salata ȧrim ra Kuru ara ba kəyi haŋ thȧnkȧŋ thəbana.

²⁴ kotȧy-e, Madɛr bɛ mə yi mɔ kereŋ, Ɔwa aŋyiki ŋa wuni kəpet bɛ aŋ yi mɔ malɛŋi ma akereŋ. Akereŋ kə tə wela, yi malɛŋi mati mə tə poŋ.

²⁵ Kɛrɛ ȧrim ra ɔMarki rə yi thəbana. Ɔwa ȧrim are rə yi ȧkɛra kəfinɔ ȧke a taməsa nu.