1 Timɔthi 4 - Ȧŋlemrȧnɛ Ȧfu

¹ ƆYina məsəm ɔ tɔri ti finɔ kəpa ka marey mələpsɔ-e, afəm alɔm aŋ tə bȧrȧ kəmuth ka kȧlanɛ, rə kəsu ɛləns ka ɛyina ɛyem, yi mapa ma makərəfi,

² ta salata tȧyem ta aŋfəm abaŋ dəbuth, aŋa pəyi a ləsər aŋsɔŋ ŋaŋ yi afat asȧnk.

³ Aŋ gbinda afəm tə kənantȧ, kaŋ kithinɛ afəm tə kətey ɛdi ɛlɔm ɛyɛ Kuru ɔ bɛmpa kȧmȧ aŋlanɛ aŋa mə tȧrȧ tȧteŋ aŋ di yi rə kəmuti mɔmɔ.

⁴ kotȧy-e koko bɛ ara Kuru ɔ bɛmpa rə yi rəfinɔ, ɔwa a ba hɛ tə kəpɛnsa koko bepi a malanɛ ri yi kəsɔŋ mɔmɔ.

⁵ Ȧtesoma-e a səməs ri yi ȧrim ra Kuru dɛ yi kəramnɛ.

⁶ Bepi mə tɔri mȧtȧy ame ka aŋwɔnt-e, mə tə yi ȧbɔy ŋa Yisɔs Krayst ubɔthi lanɛ, urusəm ka ȧsim ta kȧlanɛ yi ka mathəksa ma ȧkɛra kəfinɔ ȧke mə poŋ thɔŋ wop.

⁷ Ɔwa gbapɛ ɛmump ɛləs ya aŋya abȧki; kɛrɛ rusəmnɛ ka ranes ra Kuru Məsaba.

⁸ kotȧy-e kȧthanthəsnɛ ka mədɛr kə naŋfas ɔthan gbo, kɛrɛ marusəmnɛ ame ka Kuru Məsaba-e mə mar rə tȧy o tȧy, ma pə yi mə ba alahiri ŋa aŋesəm ŋa ka-ake, dɛ yi ŋa aŋa mə der.

⁹ Apa abɔthi lanɛ ŋaŋ, ɔwa aŋ yi amari malanɛ bɛ.

¹⁰ Ȧtesoma-e ta ȧte sə bȧsər bulɔ, sə bȧsər sulnɛ, pəkasifɛ sə poŋ gbak ɛmerȧ ɛ su ka ɔKuru ukəli, ɔwe yi ɔKisis ka afəm bɛ, pə tha gbethi ka ŋaŋ aŋa yi ka kȧlanɛ.

¹¹ Tɔri mȧtȧy ame, ɔwa thəksa ma.

¹² Te yɔ kȧmȧ afəm aŋ farki rafɛth ra mu; kɛrɛ yi amɔl ta aŋlanɛ salata kȧfɔf, yi mȧyɔs, yi mȧbɔthər, yi kȧlanɛ, yi kȧba ȧmerȧ ȧferȧ.

¹³ Sɔŋ ȧŋmerȧ a mu ɔbaksər tə kəkaraŋ, yi tə kəmaŋ, dɛ yi tə kəthəksa haŋ i der.

¹⁴ Te pənɛ ȧŋboya aŋa yi mu, ama mə poŋ sɔthɔ salata maseri ma Aŋnȧbi, ma aŋbȧki ŋa aŋchɔch aŋ reŋ mu mȧta maŋ.

¹⁵ Sɔndnɛ ka mȧtȧy ame, ɔwa tȧmtȧmnɛ ma sɔbɛ, kȧmȧ afəm bɛ aŋ gbəli nənk ma mȧ mə kɔ kədi.

¹⁶ Bumnɛ mun munɔnɛ yi mathəksa ma mu; bȧsər ka mȧtȧy ame, kotȧy-e bepi mə yɔ ti, mə tə kisis aŋyɛthɛ mu, dɛ yi ŋaŋ aŋa mə təlȧ mu.