1 Timɔthi 3 - Ȧŋlemrȧnɛ Ȧfu

¹ Mapa ame mə yi təteŋ, Bepi wuni ɔ fela yi ugbəka-e, ɔ fela məpanth məfinɔ.

² Ugbəka ɔ yi tə kəyi wuni paŋitȧy ka mayi mɔŋ, ɔwos ka urani ukin, uyɔ kəthɛgbɛ, utempi, ɔwe ba asɔŋ afinɔ, ɔwe bɔthər kəfantha atik-e, yi ɔwe gbəli thəksa.

³ Ta ɔ te yi wuni mun məber, thalɔm wuni sɔŋkɔ sɔŋkɔ, ta ɔ te ba rədir ta akala-e; kɛrɛ ta ɔ yi umuyu, uthɔfəl, ɔwe te fela rəka ra wuni lɔm;

⁴ ɔwe mə gbəka kabɔr kɔŋ gbeŋ ɔlompi, kɔ rusəm rȧkomra rɔŋ finɔ.

⁵ kotȧy-e bepi wuni ɔ tɛ hɛ tə kəgbəka ȧŋseth ŋɔŋ gbeŋ-e, to mɔ gbəli kəlianɛ aŋchɔch ŋa Kuru Məsaba-e?

⁶ Ɔ yi hɛ tə kəyi ufɛth ka kȧlanɛ ta thani ɔ wɔŋ kəbonɛ tȧy, kɔ fumpɔ ka matheri ma Sethani.

⁷ Pəthas ri, thambe ɔ ba ŋes afinɔ ka ante lanɛ; ta thani ɔ wɔŋ ka mathɛkɛ yi magbət ma Sethani.

⁸ Akeliya sɔ aŋ yi tə kəyi atempi, aŋ yi hɛ tə kəba təmer tərəŋ, aŋ yi hɛ tə kəmun məber məgbathi, ɔwa aŋ yi hɛ tə kəba rədir ta akala ȧferȧ,

⁹ kaŋ yi tə kəwop aŋgbundu ŋa kȧlanɛ rə ȧmerȧ ȧferȧ.

¹⁰ Ɔwa ta a mɔtha mɛmər ŋa sɔ, tiyȧŋ, ma a po fir ŋa kəte ba məthɛkɛ-e, aŋ gbəli tɛn yɔ mapanth ma rȧkȧlia.

¹¹ Arani ŋaŋ sɔ aŋ tə yi atempi, aŋa mə te ləsər ŋes ŋa wuni, aŋ bɔthər hɛ kəyɔ məgbati, ka aŋ yi abɔthi lanɛ ta tȧy o tȧy.

¹² Ukȧlia ɔ tə yi ɔwos ka urani kin, ɔ yi tə kərusəm aŋwuth ŋɔŋ yi kabɔr kɔŋ finɔ.

¹³ Tiyȧŋ ŋaŋ aŋa poŋ wop mapanth ma rȧkelia finɔ-e, aŋ tə sɔthɔnɛ ɔtəma wa ayiki, yi təbuth təbaki ka kȧlanɛ ȧke yi ka Krayst Yisɔsȧŋ.

¹⁴ I gbalər mu mȧtȧy ame, ma pə yi-e i gbak ȧmerȧ i ti der ro rɔmu lɛmp.

¹⁵ Kɛrɛ bepi tȧy o tȧy tə kali kali mi-e, i yema kȧmȧ mə gbəli tȧrȧ to mə ba naŋ tə kəkɔth kətɔŋ ka kabɔr ka Kuru, pə yi mɔ-e, aŋchɔch ŋa ɔKuru ukəli aŋa yi mȧkər yi ɔtəmər wa tȧteŋ.

¹⁶ Ɔwa tɛntɛnɛ kəte ba ȧthonka, aŋgbundu abɔlɔŋ ŋa andina a su ŋe yi abana; Kuru ɔ tɔrinɛ ka ȧŋdɛr ŋa wuni kəpet, ka ɔYina məsəm ɔ sɔŋ kɔ məmari, ka amaleka aŋ nənk kɔ, ka a kawandi ȧkɛra kɔŋ ka tȧbona təlɔm, ka a lanɛ kɔ ka ȧdȧru, ka a kȧl malanɛ kɔ rokɔm rə ayiki abana.