1 Timɔthi 2 - Ȧŋlemrȧnɛ Ȧfu

¹ Tiyȧŋ kə tɔtɔkɔ bɛ, i maŋ kȧmȧ kənɛmthɛnɛ, yi təramnɛ, yi təmuti mɔmɔ ɛ gbəli yi ta wuni o wuni;

² ta abȧy, yi ta ȧtȧ ŋaŋ bɛ aŋa ba afɔsɔ, kȧmȧ sə gbəli yirȧ rȧ məthɔfəl bɛm rə kənesa Kuru Məsaba ka tȧteŋ bɛ.

³ kotȧy-e ȧte tə yi təfinɔ yi təlompi ka kakəli ka Kuru ɔKisis kȧsu;

⁴ ɔwe yema kȧmȧ afəm bɛ aŋ kisi, yi kȧmȧ aŋ sɔthɔ kȧtȧrȧ ka tȧteŋ.

⁵ kotȧy-e ɔKuru ukin ɔ yi, yi uKasa ukin kətɔŋ ka Kuru yi afəm. Ɔwuni ɔwe kɔn ɔ yi Yisɔs Krayst,

⁶ ɔwe sɔndnɛ tə kəbani afəm bɛ, ka a seri ti ma ȧŋlɔkɔ ŋati aŋ bek.

⁷ Ȧtesoma-e a po thith mi tə kəyi ukawandi yi usom, (i fɔf tȧteŋ ka Krayst, rəyem thahɔ); dɛ yi ukarmɔkɔ ka tȧbona təlɔm ka kȧlanɛ yi tȧteŋ.

⁸ Tiyȧŋ i yema kȧmȧ afəm aruni dɛr o dɛr aŋ ramnɛ, kȧmȧ aŋ ŋata məta məsəm ka Kuru, kəte ba rəbaŋ thalɔm asikɛ.

⁹ Bom-ŋaŋ sɔ, i yema kȧmȧ aŋ lopra gbɛt, tə kəyi ŋa kəthɛgbɛ yi kətemp; kȧmȧ aŋ te yesi aŋfon ŋaŋ tə kəlafthɛ ɛfɔr ya afəm, ta a pa ras aŋ yesinɛ yi məbɔŋɔ thalɔm məsar məkɛŋ, thalɔm ɛlopra ɛbaki mɔlɔ;

¹⁰ kɛrɛ ta aŋ yesinɛ yi məyɔs məfinɔ ama mar afəm abom aŋa nesa Kuru Məsaba.

¹¹ Ɔwuni bom ɔ yi tə kəthəkəs rə məthɔfəl yi kəsanɛ bɛ.

¹² Kɛrɛ minɛŋ i selɔ hɛ ɔwuni bom ɔ thəksa thalɔm ɔ ba afɔsɔ rokɔm ka ɔruni, kɛrɛ ɔ yi tə kətaŋk.

¹³ kotȧy-e a mɔtha bɛmpa Adȧm, rodarəŋ kati a bɛmpa Ma Hawa.

¹⁴ A tɔns hɛ Adȧm, kɛrɛ a tɔns ɔrani kɔŋ, kɔ fumpɔ ka ahakɛ.

¹⁵ Kɛrɛ ɔwuni bom ɔ tə kom ka kəpantay, bepi aŋ bȧkər ka kəlanɛ, yi məbɔthər dɛ yi ka məsəm rə kətemp.