1 Yɔn 5 - Ȧŋlemrȧnɛ Ȧfu

¹ Wuni o wuni ɔwe mə lanɛ kəpa Yisɔs ɔ yi ɔKrayst a kom kɔ ka Kuru: ɔwa wuni o wuni ɔwe mə bɔthər ɔkomra ɔ bɔthər sɔ kɔn ɔwe ɔ po kom.

² Ka ȧte sə tȧrȧ kəpa sə bɔthər aŋwuth ŋa Kuru, ma sə bɔthər Kuru, ɔwa sə wop ɛyamari yɔŋ.

³ Mabɔthər ma Kuru mi ame, kȧmȧ sə wop ɛyamari yɔŋ: ɔwa ɛyamari yɔŋ ɛ yi hɛ ɛtui wop.

⁴ kotȧy-e wuni o wuni ɔwe a po kom ka Kuru ɔ tham ȧdȧru: ɔwa katham ȧke mə tham ȧdȧru ki ake, kə yi kȧlanɛ kȧsu.

⁵ Kanɛ mə tham ȧdȧru, thambe kɔnɔ ɔwe mə lanɛ kəpa Yisɔs ɔ yi ɔWan ka Kuru-e?

⁶ Ɔwa Yisɔs Kraystȧŋ kɔnɔ der rə mȧnt yi mətir; pə yi hɛ rə mȧnt gbo son, kɛrɛ rə mȧnt yi mətir.

⁷ Ka ɔYina ɔ sɔŋ məseri, pəkasifɛ ɔYina ɔ yi tȧteŋ.

⁸ kotȧy-e asas aŋ yi aŋa mə sɔŋ məseri, ɔYina-o, ȧmȧnt-o, yi mȧtir-əŋ, ŋa asas aŋ yi dim din.

⁹ Bepi sə malanɛ maseri ma wuni kəpet, maseri ma Kuru mə thas: kotȧy-e maseri ma Kuru mə yi ȧtȧ ɔ seri ta ɔWan kɔŋ.

¹⁰ Ɔwe po lanɛ ka ɔWan ka Kuru ɔ ba maseri ka ȧŋmerȧ ŋɔŋ: kɛrɛ ɔwe te lanɛ Kuru ɔ sɔki kɔ uyem; pəkasifɛ ɔ lanɛ hɛ maseri ama Kuru ɔ sɔŋ ta ɔWan kɔŋ.

¹¹ Maseri meme, kəpa Kuru ɔ po sɔŋ su aŋesəm thəbana, ɔwa aŋesəm aŋe aŋ yi ka ɔWan kɔŋ.

¹² Kɔnɔ ɔwe ba ɔWan ɔ ba aŋesəm; ɔwa kɔnɔ ɔwe te ba ɔWan ka Kuru ɔ ba hɛ aŋesəm.

¹³ Mȧtȧy ame i po gbalər nu na alanɛ ka ȧŋes ŋa ɔWan ka Kuru kȧmȧ nə tȧrȧ kəpa nə ba aŋesəm thəbana.

¹⁴ Ɔwa kamintha ȧke sə ba ro ŋɔŋ ki ake, kəpa, bepi sə yif tȧy o tȧy ka mȧselɔ mɔŋ, ɔ təlȧ su.

¹⁵ Ɔwa bepi sə tȧrȧ kəpa ɔ təlȧ su, tȧy o tȧy sə yif, sə tȧrȧ kəpa sə sɔthɔ ara sə yif kɔ.

¹⁶ Bepi wuni o wuni ɔ nənk ɔwɔnt kɔŋ ɔ yɔ ahakɛ aŋa te yi ka rəfi, ta ɔ yif, ɔwa Kuru ɔ tə sɔŋ kɔ aŋesəm ta ŋaŋ aŋa te yɔ ahakɛ ka rəfi. Ahakɛ aŋ yi ka rəfi: i pa hɛ kȧmȧ ɔ nɛmthɛnɛ ta ŋi.

¹⁷ Tȧy o tȧy ȧtȧ te yi təlompi tə yi ahakɛ: kɛrɛ ahakɛ aŋ yi aŋa te yi ta rəfi.

¹⁸ Sə tȧrȧ kəpa wuni o wuni ɔwe a po kom ka Kuru ɔ yɔ hɛ ahakɛ; kɛrɛ ɔwe a po kom ka Kuru ɔ bumərnɛ, ɔwa Sethani ɔ gboŋ hɛ kɔ.

¹⁹ Saŋ sə tȧrȧ kəpa sə yi ka Kuru, yi ȧdȧru bɛ rə yi ka aŋfɔsɔ ŋa Sethani.

²⁰ Ɔwa sə tȧrȧ kəpa ɔWan ka Kuru ɔ po der, kɔ po sɔŋ su kəsɔthnɛ, kȧmȧ sə gbəli tȧrȧ kɔ ɔwe yi təteŋ, ɔwa saŋ sə yi ka kɔn ɔwe yi təteŋ, hali ka ɔWan kɔŋ Yisɔs Kraystȧŋ. Kɔnɔ yi ɔKuru utəteŋ, yi aŋesəm thəbana.

²¹ Awuth alɔl, bumnɛ nu ka ɛyɛt ɛbumərnɛ.