1 Yɔn 3 - Ȧŋlemrȧnɛ Ȧfu

¹ Kəla, ko məbɔthər məbana ɔKas ɔ ba ta ȧtȧ su, kəpa a tela su awuth ŋa Kuru; ɔwa ya sə yi mən. Tȧsom ȧdȧru rə te su tȧrȧ, pəkasifɛ rə tɛ hɛ kɔ.

² Abɔthər, ka-ake sə yi awuth ŋa Kuru, ɔwa a tha tɔri hɛ su to sə ba kə re yi: kɛrɛ sə tȧrȧ kəpa ma Krayst ɔ kȧl der, sə tə yi mɔ kɔnɔ; pəkasifɛ sə tə nənk kɔ mɔ mɔ yi.

³ Ɔwa wuni o wuni ɔwe ba kabot ȧmerȧ ake ɔ tə gbəransnɛ, mɔ mə Krayst ɔ yi ugbəraŋ.

⁴ Wuni o wuni ɔwe mə yɔ ahakɛ ɔ ləsər ȧŋthɔ: kotȧy-e aŋhakɛ ŋə yi kaləsər ȧŋthɔ.

⁵ Ka nə tȧrȧ kəpa Krayst ɔ tɔrinɛ tə kənɔy ɛhakɛ ɛ su; ɔwa ahakɛ aŋ yi hɛ ro ŋɔŋ.

⁶ Wuni o wuni ɔwe mə tiyȧ ro ŋɔŋ ɔ yɔ hɛ ahakɛ: wuni o wuni ɔwe mə yɔ ahakɛ ɔ tha nənk hɛ kɔ, thalɔm ɔ tȧrȧ kɔ.

⁷ Awuth alɔl, te nu selɔ wuni o wuni ɔ yɛthas nu; kɔn ɔwe mə yɔ ɔlompi ɔ yi ulompi, hali mɔ kɔnɔ ɔ yi ulompi.

⁸ Ɔwe mə yɔ ahakɛ ɔ yi ka Sethani; kotȧy-e Sethani ɔ po yɔ ahakɛ kȧbi ka ɔtəpɛr. Ɔwa ta ȧte tə ɔWan ka Kuru ɔ der, kȧmȧ ɔ dim mapanth ma Sethani.

⁹ Wuni o wuni ɔwe Kuru ɔ po kom ɔ yɔ hɛ ahakɛ; kotȧy-e mayi ma Kuru mə yi ro ŋɔŋ ɔwa ɔ gbəli hɛ yɔ ahakɛ pəkasifɛ Kurɔŋ kɔnɔ kom kɔ.

¹⁰ Ka ȧte sə gbəli tȧrȧ awuth ŋa Kuru, yi awuth ŋa Sethani: wuni o wuni ɔwe te yɔ ɔlompi ɔ yi hɛ ka Kuru, thalɔm ɔwe te bɔthər ɔwɔnt kɔŋ.

¹¹ kotȧy-e ȧkɛra ki ake ȧke nə po təl kȧbi ka ɔtəpɛr, kəpa sə yi tə kəbɔthəranɛ.

¹² Pə yi hɛ mɔ Ken, ɔwe yi ka Sethani, ɔwa ɔ dif ɔwɔnt kɔŋ. Ɔwa to pə som ɔ dif kɔ-e? Pəkasifɛ mȧyɔs mɔŋ mə yi mələs, ɔwa ama ɔwɔnt kɔŋ mə yi məlompi.

¹³ Tiyȧŋ awɔnt te nu kabanɛ, bepi ȧdȧru rə gbɛŋa nu.

¹⁴ Saŋ sə tȧrȧ kəpa sə po wur ka rəfi sə po wɔŋ ka aŋesəm, pəkasifɛ sə bɔthər aŋwɔnt. Ɔwe mə te bɔthər ɔwɔnt kɔŋ ɔ tiyȧ ka rəfi.

¹⁵ Wuni o wuni ɔwe mə gbɛŋa ɔwɔnt kɔŋ udif wɔŋ: ɔwa nə tȧrȧ kəpa udif o udif ɔ ba hɛ aŋesəm thəbana.

¹⁶ Ka ȧte sə tȧrȧ mabɔthər, kəpa kɔnɔ ɔ sɔnd aŋesəm ŋɔŋ ta ȧtȧ su: ɔwa saŋ sə yi tə kəsɔndnɛ ta aŋwɔnt.

¹⁷ Kɛrɛ bepi wuni o wuni ɔ nənk ɔwɔnt kɔŋ ɔ paŋi ɔwa ɔ bȧksər ȧŋmerȧ ŋɔŋ, ɔ sɔŋ hɛ kɔ, kədarəŋ ka kɔnɔ ɔ ba ɛyɛt ya ȧdȧru are, to mabɔthər ma Kuru mə tiyȧ ro ŋɔŋ-e?

¹⁸ Awuth alɔl, maŋ te nu bɔthər ka sim, thalɔm ka məfɔf: kɛrɛ ka məyɔs yi ka tȧteŋ.

¹⁹ Ka ȧte sə tə tȧrȧ kəpa sə yi ka tȧteŋ, ɔwa sə tə bȧk kəbuth roder kɔŋ kədi

²⁰ bepi ɛmerȧ ɛ su ɛ thɛkɛ su; kotȧy-e Kuru ɔ yi ubana uthasi ɛmerȧ ɛ su, ɔwa ɔ tȧrȧ tȧy o tȧy.

²¹ Abɔthər, bepi ɛmerȧ ɛ su ɛ thɛkɛ hɛ su, sə ba kəsɛlinɛ ka Kuru.

²² Ɔwa koko sə yif sə sɔthɔ ro ŋɔŋ, pəkasifɛ sə wop ɛyamari yɔŋ, ɔwa sə yɔ ȧtȧ mə thesanɛ kɔ.

²³ Aŋyamari ŋɔŋ ŋi aŋe, kȧmȧ sə lanɛ ka ȧŋes ŋa ɔWan kɔŋ Yisɔs Krayst, yi kȧmȧ sə bɔthərȧnɛ mɔ mɔ yamari su.

²⁴ Ɔwe mə wop ɛyamari yɔŋ ɔ tiyȧ ka Kuru, yi Kuru ɔ tiyȧ ro ŋɔŋ. Ka ȧte sə tȧrȧ ɔ tiyȧ ro su, ka ɔYina ɔwe ɔ po sɔŋ su.