1 AŋKɔrenth 9 - Ȧŋlemrȧnɛ Ȧfu

¹ Minɛ i yi hɛ usom tə tɛntɛnɛ-i? I yi hɛ kəyaŋkaŋ-i? Minɛ i tha nənk hɛ Yisɔs Krayst ɔMarki ka su-i? Naŋ nə yi hɛ mapanth ma mi ka ɔMariki-i?

² Hali i yi hɛ usom ka afəm alɔm-e, kɛrɛ i yi usom ta ȧtȧ nu, kotȧy-e naŋ nə yi maseri ma rasom ra mi ka ɔMarki.

³ Aŋgbaki a mi ŋi aŋe ka ŋaŋ aŋa gbɛŋgbɛŋ mi,

⁴ Saŋ sə ba hɛ mamari tə kədi yi kəmun-i?

⁵ Saŋ sə ba hɛ mamari tə kəkɔtha urani ɔwe yi uwɔnt ka kȧlanɛ, mɔ aŋsom alɔm-i, dɛ yi mɔ aŋwɔnt ŋa ɔMarki dɛ yi Kayafas-i?

⁶ Thalɔm pə yi minɛ gbo son yi Banabasȧŋ, sə ba hɛ mamari tə kətey kəyɔ məpanth yi mȧta ma su-i?

⁷ Ɔkurgba ureke ɔ kɔnɛ ka kȧtim kədarəŋ ka kɔnɔ gbeŋ ɔ ram ti-e? Kanɛ mə tɛp kɔr kədarəŋ kɔ te di mȧkomi mati-e? Thalɔm kanɛ mə wɔnthər kəwarɛ kədarəŋ kɔ te sɔthɔ manɔnɔ ma akuthi-e?

⁸ Minɛ i fɔf gbo mȧbȧlȧnɛ ma afəm a kəpet-i? Ȧŋthɔ gbeŋ aŋ pa hɛ ti sɔ-i?

⁹ kotȧy-e a gbal ti ka ȧŋthɔ ŋa Mosis, hɔ, Te fɔkər kȧsəŋ ka ɔna ma mɔ sap ȧpəla. Pə yi ta təna gbo son tə Kuru ɔ raŋko-i?

¹⁰ Thalɔm ɔ pa ti bɛ ta salata su-i? Tə tɛntɛnɛ ɔ gbal ti ta ȧtȧ su, kȧmȧ ɔwe kutha dɛ yi ɔwe mə nas ȧpəla aŋ tə gbak ȧmerȧ tə kəsɔthɔ pəlɔm.

¹¹ Bepi sə po tɛp mȧtȧy ma ɔYina məsəm do rɔnu-e, tȧy təkɛthanɛ tȧŋ bepi sə rɔk ɛyɛt ɛ nu salata madɛr ma su-i?

¹² Bepi akarmɔkɔ alɔm aŋ ba mamari ame rokɔm ka nu-e, saŋ sə thas hɛ ŋa-i? Kɛrɛ sə kianɛ hɛ mamari mati. Sə muyu mȧtȧy bɛ kȧmȧ sə te bɛnt mapa məfinɔ ma Krayst.

¹³ Nə tɛ hɛ kəpa ŋaŋ aŋa bȧtho yi ɛyɛt ɛsəm ya ȧŋseth ŋa Kuru-e, aŋ di ɛyɛt ɛsəm yati-i, dɛ yi aŋfode ŋa ȧŋbɛsɛ aŋ ba sɔ ɛni yaŋ kəwur ka ȧŋbɛsɛ-i?

¹⁴ Ya pə yi sɔ ɔMarki ɔ poŋ bot ti kəpa ŋaŋ aŋa kawandi mapa məfinɔ ma Kuru-e, aŋ yi tə kəsɔthɔ kadi ka ŋaŋ kəwur ka mapa məfinɔ ma Kuru.

¹⁵ Kɛrɛ minɛ i kianɛ hɛ mamari ame; thalɔm i gbal hɛ mȧtȧy ame kȧmȧ a yɔ ma ta ȧtȧ mi; kotȧy-e pə fisa mi i fi pəthas pə yi wuni o wuni ɔ yɔ kagbək kȧmi ɛyonka kə tiyȧ fu.

¹⁶ kotȧy-e i ba hɛ ȧmerȧ akabanɛ ȧŋsabu ŋa kȧ kawandi kȧmi mapa məfinɔ ma Kuru, ȧtesoma-e a reŋ mi kȧthambe kati. Te ba ti, sɛkɛ mi-o bepi i kawandi hɛ mapa məfinɔ ma Kuru!

¹⁷ Ɔwa bepi i yɔ ȧte ka mȧselɔ ma mi gbo-e, i ba ȧrȧm; kɛrɛ bepi pə yi hɛ ka mȧselɔ ma mi-e, halisa a po maŋkər mi aŋgbɛthɛŋ ŋati.

¹⁸ Bepi ya pə yi-e, ko yi ȧŋrȧm a mi thɔŋ-a? Aŋ yi kəpa ma mə i kawandi mapa məfinɔ ma Kuru-e, i taməs ma kəyaŋkaŋ kəte bot mɔlɔ, kȧmȧ i te kianɛ mamari ma mi ɔthasər ka mapa məfinɔ ma Kuru.

¹⁹ Hali ma wuni o wuni ɔ te ba afɔsɔ rokɔm ka mi-e, i po səkɛ utar ka afəm bɛ kȧmȧ i bȧr sɔthɔ agbȧthi.

²⁰ Ka aŋYuda i səkɛ mɔ uYuda, kȧmȧ i sɔthɔ aŋYuda. Ka ŋaŋ aŋa yi ratha ka anthɔ-e, i botnɛ roratha ka ȧŋthɔ kȧmȧ i sɔthɔ ŋaŋ aŋa yi ratha ka ȧŋthɔ.

²¹ Ka ŋaŋ aŋa te ba athɔ-e, i yi mɔ ute ba athɔ (pə yi hɛ kəpa i ba hɛ ȧŋthɔ ka Kurɔŋ kɛrɛ i yi roratha ka ȧŋthɔ ŋa Krayst). Kaŋka gbo i sɔthɔ ŋaŋ aŋa te ba athɔ.

²² Ka aŋyay i səkɛ uyay kȧmȧ i sɔthɔ aŋyay. I po səkɛ mȧtȧy bɛ salata afəm bɛ kȧmȧ rə roŋ o roŋ i gbəli kisis alɔm.

²³ I yɔ ȧte bɛ salata mapa məfinɔ ma Kuru kȧmȧ sə yeranɛ ka mafinɔ mati.

²⁴ Nə tɛ hɛ kəpa aŋa mə gbukɛ rȧ ȧgbȧkȧnɛ aŋ gbukɛ bɛ-i, kɛrɛ ukin gbo kɔnɔ mə sɔthɔ amɔlɔ-i? Ɔwa gbukɛ nu yaŋ kȧmȧ nə sɔthɔ.

²⁵ Ulaŋgba o langba ɔwe mə gbakanɛ ka ɛwol ya kasɔnka ɔ yi ugbɛt rə koko bɛ. Ɔwa ŋaŋ aŋa yɔ ti tə kəsɔthɔ ȧniyɔ ŋa ɛbɔpər məthey; kɛrɛ saŋ sə yɔ ti tə kəsɔthɔ ȧniyɔ aŋa mə te ləsər thȧnkȧŋ.

²⁶ Tiyȧŋ ya i gbukɛ, pə yi hɛ rə kəte tȧrȧ; yaŋ sɔ i tim, pə yi hɛ rə kəbɔfthar aŋfena.

²⁷ Kɛrɛ i mɛməs ȧŋdɛr a mi, ɔwa i bɛnɛ ŋi ka rȧtar, ta thani kədarəŋ ka ma i po kawandi ka alɔm-e, min minɛnɛ, a kathi mi tə kəte bek.