1 AŋKɔrenth 7 - Ȧŋlemrȧnɛ Ȧfu

¹ Ɔwa salata mȧtȧy ama nə gbalər mi-e, i pa pə yi ɔfinɔ bepi wan duni ɔ te gboŋ wuni bom.

² Kɛrɛ kȧmȧ a thaŋkanɛ kərəp-e, ta wuni o wuni ɔ ba ɔrani kɔŋ; ɔwa ta ubɛra o bɛra ɔ ba ɔwos kɔŋ.

³ Ta ɔwos ɔ yɔ mayɔ ma kənantȧ ka ɔrani, yi ɔrani sɔ ka ɔwos.

⁴ Ɔrani ɔ ba hɛ afɔsɔ ka ȧŋdɛr ŋɔŋ kəte ba ɔwos; ɔwa ɔwos sɔ ɔ ba hɛ afɔsɔ ka ȧŋdɛr ŋɔŋ kəte ba ɔrani.

⁵ Te pɛnsa ukin ka ɔlɔm, thambe sɔthlɔm na ŋarəŋ nə ba ti dim din ta alɔkɔ agbut, kȧmȧ nə gbəli ba aŋfɛrɛ tə kəwop asum yi kəramnɛ. Kədarəŋ kati ta nə kȧl pantnɛ rɔkin, kȧmȧ Sethani ɔ te gbɔns nu asabu ŋa kate gbəli muyu mafela ma nu.

⁶ Kɛrɛ i pa ȧte tə kətei nu ti gbo asako, pə yi hɛ ta asiraŋ.

⁷ I yema naŋ kȧmȧ afəm bɛ aŋ yi mɔ mə minɛ i yi; kɛrɛ wuni o wuni ɔ ba ara Kuru ɔ boya kɔ, ukin mɔ ȧte, ulɔm mɔ ȧtȧŋ.

⁸ Tiyȧŋ i pa ka ante nȧntȧ yi ka ȧŋbora-e, pə yi ɔfinɔ ta ȧtȧ ŋaŋ bepi aŋ tiyȧ mɔ minɛŋ.

⁹ Kɛrɛ bepi aŋ gbəli hɛ muyu-e, ta aŋ nȧntȧ rɛ aŋ balȧ-e; kotȧy-e pə yi ɔfisa tə kənantȧ pəthas kəba məfela məfey fey.

¹⁰ Kɛrɛ ka aŋnȧntȧ dɛ yi aŋbalȧ-e, pə yi hɛ minɛŋ kɛrɛ ɔMarki kɔnɔ yamari, i pa kȧmȧ ɔrani ɔ te wur ka ɔwos kɔŋ;

¹¹ kɛrɛ bepi ɔ wur-e, ta ɔ te sɔ balȧ, thalɔm ta ɔ kȧl manɛ yi ɔwos kɔŋ. Ɔwa ta ɔwos ɔ te ter ɔrani kɔŋ.

¹² Ka alɔm minɛ i pa, (ɔMarki thahɔ), bepi uwɔnt o wɔnt ɔ ba urani ɔwe te lanɛ-e, ɔwa ɔ selɔ tə kəyira yi kɔn-e, ta ɔ te ter kɔ.

¹³ Ka ɔwuni bom ɔwe ba ɔwos ɔwe te lanɛ-e, bepi ɔ selɔ tə kəyira yi kɔn-e, ta ɔ te ter kɔ.

¹⁴ kotȧy-e ɔrani ulanɛ ɔ səməs ɔwos ɔwe te lanɛ, dɛ yi ɔwos ulanɛ ɔ səməs ɔrani ute lanɛ. Bepi pə yi hɛ yaŋ-e, aŋwuth a nu aŋ tə ba mayi ma aŋkafri; kɛrɛ ka-ake aŋ yi agbəraŋ.

¹⁵ Kɛrɛ bepi ɔte lanɛ ɔ yema tə kəwur-e, ta ɔ wur. Ɔwɔnt runi thalɔm ɔwɔnt bɛra ɔ yi hɛ usekanɛ ka mȧtȧy məwunɔŋ; Kuru ɔ muti su tə kəyira ka mȧthɔfəl.

¹⁶ Tiyȧŋ, munɔ ɔrani to mə gbəli tȧrȧ bepi mə tə kisis ɔwos mu-i, thalɔm munɔ ɔwos, to mə gbəli tȧrȧ bepi mə tə kisis ɔrani ka mu-e?

¹⁷ Kɛrɛ mɔlɔ ma ɔMarki ɔ po sɔŋ wuni o wuni matəma mɔŋ-e, dɛ yi mɔ mə nə la yi ma Kuru ɔ po muti nu-e, ta nə kɔth ri. Yaŋ i botəs ti ka ɛchɔch bɛ.

¹⁸ Bepi a tela wuni ɔwe yi ubirons ta ɔ te səkɛ ute birons. Bepi a tela wuni ɔwe te yi ubirons, ta ɔ te səkɛ ubirons.

¹⁹ Kəbirons kə ba hɛ tȧy, yi kəte birons kə ba hɛ tȧy, kɛrɛ kəwop ɛthɔ ya Kuru-e, ka ba tȧy.

²⁰ Ta wuni o wuni ɔ tiyȧ ka ɔtəma ro ɔ la yi ma a muti kɔ.

²¹ Bepi-e, ka ȧŋlɔkɔ ma a muti mu mə yi utar-e, te soli ti, kɛrɛ bepi mə gbəli sɔthɔ rəwankom-e, yɔ ti.

²² Ȧtesoma-e bepi ɔMarki ɔ la tela wuni ɔwe la yi utar-e, ɔwuni kati ɔ yi uwankom ka ɔMarki. Ya pə yi sɔ ɔwe a la tela ma ɔ yi uwankom-e, ɔ yi tɛn utar ka Krayst.

²³ A po way nu mɔlɔ məbaki, te nu səkɛ antar ŋa afəm a kəpet.

²⁴ Tiyȧŋ ro mə nə la təmȧ ma a muti nu-e, təmȧ ri nu yi Kurɔŋ.

²⁵ Ɔwa salata aŋfanɛ-e, i ba hɛ ti ayamari ŋa ɔMarki, kɛrɛ i sɔŋ ȧŋnanɛ a mi, mɔlɔ ma wuni ɔwe yi ubɔthi lanɛ salata ȧŋney ŋa ɔMarki.

²⁶ Tiyȧŋ i nanɛ kəpa salata ȧŋsɔmpa aŋa yi su-e, ka-ake pə yi naŋ ɔfinɔ bepi wuni ɔ tiyȧ mɔ mɔ yi.

²⁷ Bepi mə ba urani, te thɛns tə kəter kɔ. Bepi mə ba hɛ urani-e, te thɛns urani.

²⁸ Kɛrɛ bepi mə nantȧ-e, ahakɛ thahɔ. Ɔwa bepi ubɔrkɔ ɔ balȧ-e, ahakɛ thahɔ, kɛrɛ aŋfəm awunɔŋ aŋ tə ba ayagba ka madɛr. Ɔwa i yema naŋ kisis nu kəwur ri.

²⁹ Kɛrɛ awɔnt, i yema pa ȧte kəpa ye, Pə tiyȧ su alɔkɔ agbut, pə yi mɔ-e, kətəp ka-ake, ŋaŋ aŋa ba arani-e, ta aŋ yi mɔ ante ba.

³⁰ Ɔwa ŋaŋ aŋa bok-e, ta aŋ yi mɔ ante bok; ɔwa ŋaŋ aŋa ba məbɔnɛ-e, ta aŋ yi mɔ ante ba məbɔnɛ, dɛ yi ŋaŋ aŋa way-e, ta aŋ yi mɔ aŋa te sɔthɔ,

³¹ ɔwa sɔ-e, aŋa mə kyanɛ ɛyɛt ya ȧdȧru are-e, ta aŋ te kyanɛ yi ɔləs, kotȧy-e mayi ma ȧdȧru mə ba kəthas.

³² I yema kȧmȧ nə te ba ɛyagba ya ȧdȧru. Ɔte nȧntȧ ama ɔte balȧ-e, ɔ botər ȧmerȧ ta mȧtȧy ma ɔMarki, to ɔ gbəli yɔ kȧmȧ ɔ bɔnɛs ɔMarki;

³³ kɛrɛ kɔn ɔwe po nantə-e, ɔ botər ȧmerȧ ta mȧtȧy ma ȧdȧru, to ɔ gbəli bɔnɛs ɔrani kɔŋ.

³⁴ Ɔgbaskɛ ɔ yi sɔ kətɔŋ ka ɔrani yi ɔfanɛ. Ufanɛ ɔ botər ȧmerȧ ta mȧtȧy ma ɔMarki, kȧmȧ ɔ gbəli yi usəm ka ȧŋdɛr yi ka ȧŋmerȧ; kɛrɛ kɔn ɔwe po balȧ-e, ɔ botər ȧmerȧ ta mȧtȧy ma ȧdȧru, to ɔ gbəli bɔnɛs ɔwos kɔŋ.

³⁵ I fɔf ȧte tə kəmar nu, pə yi hɛ tə kəbot nu rə ɔkɛthanɛ, kɛrɛ ta salata ȧtȧ yi təfinɔ, kȧmȧ nə bȧtho ɔMarki rə kəpȧŋ asoli.

³⁶ Kɛrɛ bepi wuni o wuni ɔ nanɛ ɔ yɔ hɛ ɔfinɔ ka ɔwan kɔŋ ubɛra ufanɛ-e, bepi tȧren ta kȧbala kɔŋ tə yema po thas-e, bepi tha pə yi-e, ta ɔ yɔ ȧtȧ ɔ yema, ahakɛ thahɔ; ta ɔ baləs kɔ.

³⁷ Kɛrɛ kɔn ɔwe təmȧ ɔbaki mədɛr ka ȧŋmerȧ ŋɔŋ, pə yi hɛ kəpa məyɔ mə yi hɛ-e, kɛrɛ ɔ ba məmari tə kəyɔ ȧtȧ ɔ yema-e, ɔwa ɔ po botəs ti ka ȧŋmerȧ ŋɔŋ tə kəbɛnɛ ɔwan kɔŋ ufanɛ, ɔ yɔ ɔfinɔ.

³⁸ Tiyȧŋ kɔn ɔwe baləs ɔwan ufanɛ kɔŋ ɔ yɔ ɔfinɔ; kɛrɛ kɔn ɔwe te baləs kɔ-e, kɔn ɔ tha yɔ ɔfinɔ.

³⁹ Ɔrani ɔ yi usekanɛ fani ɔwos kɔŋ ɔ yi ras ukəli; kɛrɛ bepi ɔwos kɔŋ ɔ fi-e, ɔ gbəli balȧ ka ɔwe ɔ yema kɛrɛ ta pə yi gbo ka wuni ɔwe yi ulanɛ ka ɔMarki.

⁴⁰ Kɛrɛ ka magbək ma mi-e, ɔ tə tha ba məbɔnɛ bepi ɔ tiyȧ mɔ mɔ yi; ɔwa i nanɛ i ba sɔ ɔYina ka Kuru.