1 AŋKɔrenth 6 - Ȧŋlemrȧnɛ Ȧfu

¹ Bepi wuni kətɔŋ ka nu ɔ ba apa yi ɔkos kɔŋ-e, ɔ tə mintha kera ŋi ro bare rodi ka ante lanɛ-i, pəthas rodi ka aŋsəm-i?

² Naŋ, nə tɛ hɛ kəpa aŋsəm aŋ tə gbək ɛpa ya ȧdȧru? Ɔwa bepi nə tə gbək ɛpa ya ȧdȧru-e nə bek hɛ tə kəgbək ɛpa ɛlɔl sɔ-i?

³ Nə tɛ hɛ kəpa saŋ sə tə thonkas amaleka-i, pə tha gbethi mȧtȧy ma ȧdȧru are-i?

⁴ Ɔwa bepi nə ba tə kəthoŋkas ɛpa ɛwunɔŋ-e, nə gbəli bot ŋaŋ aŋa yi afarkɛ kətɔŋ ka nu tə kəgbək yi-i?

⁵ I pa ȧte kȧmȧ nə lap. Pə yi təteŋ kəpa wuni tempi ɔ yi hɛ kətɔŋ ka nu-i, hali ukin ɔwe mə gbəli thonkas kətɔŋ ka aŋwɔnt ŋɔŋ-i?

⁶ Kɛrɛ uwɔnt ɔ kera uwɔnt ro bare, ɔwa pə yi tɛn rodi ka ante lanɛ.

⁷ Tɛntɛnɛ məthɛkɛ mə yi kətɔŋ ka nu ma uwɔnt ɔ kera uwɔnt ro bare. Kɔyɛŋ mə nə te muyu mələs-e? Ɔwa kɔyɛŋ mə nə te selɔ aŋ yɔ nu kansoŋ-e?

⁸ Kɛrɛ naŋ gbeŋ nə yɔ ɔləs. Nə di aŋwɔnt a nu.

⁹ Nə tɛ hɛ kəpa ante lomp aŋ gbəli hɛ sɔthɔ rȧbȧy ra Kuru-i? Te selɔ a tɔns nu; pə yi afəm anɔkɔ-o, pə yi ŋaŋ aŋa ramnɛ ka ɛrɔŋ-o, pə yi afəm aŋa yɔ kərəp tətəp tətəp-o,

¹⁰ thalɔm akey-o, thalɔm afəm aŋa ba ɛfɔr ɛmara-o, thalɔm atis-o, thalɔm aŋa nal-o, thalɔm aŋa ba aharamu-o; aŋe bɛ aŋ gbəli hɛ sɔthɔ rȧbȧy ra Kuru.

¹¹ Ɔwa yaŋ alɔm kətɔŋ ka nu nə la yi thəpaŋ, kɛrɛ a po fethər nu, a po səməs nu, ɔwa a po sɔŋ nu məmari ka ȧŋes ŋa ɔMarki Yisɔs Kraystȧŋ dɛ yi ka ɔYina ka ɔKuru kȧsu.

¹² Mȧtȧy bɛ mə yi məlompi ta ȧtȧ mi, kɛrɛ mȧtȧy bɛ tha mə mar. Mȧtȧy bɛ mə yi məlompi ta ȧtȧ mi, kɛrɛ i selɔ hɛ botnɛ ratha ka aŋfɔsɔ ŋa koko.

¹³ Ɛyɛt ɛdi ɛ yi ta akor, ɔwa akor kə yi ta ɛyɛt ɛdi; kɛrɛ Kuru ɔ tə yɔ yi bɛ ɛ tiyȧ fu. A bɛmpa hɛ ȧŋdɛr ta kərəp, a bɛmpa ŋi ta ɔMarki; dɛ yi ɔMarki ta ȧŋdɛr.

¹⁴ Mɔ mə Kuru ɔ po yokas ɔMarki ka rəfi-e, yaŋ pə yi sɔ ka aŋfɔsɔ ŋɔŋ-e, ɔ tə yɔ su sə kȧl yokanɛ ka rəfi.

¹⁵ Naŋ nə tɛ hɛ kəpa madɛr ma nu mə yi malaŋktha ma Kraist-i? Ɔwa i gbəli gbasi malaŋktha ma Kraystȧŋ, i səki ma malaŋktha ma ugboyonko-i? Saki ti Kuru.

¹⁶ Nə tɛ hɛ kəpa ɔwe mə kulunɛ ka ubɛra urəpi ɔ səkɛ adɛr ŋin yi kɔn-i? Ȧtesoma-e ɔMarki ɔ pa, Ŋa ŋarəŋȧŋ aŋ səkɛ adɛr ŋin.

¹⁷ Kɛrɛ kɔn ɔwe kulunɛ ka ɔMarki ɔ ba ayina ŋin yi kɔn.

¹⁸ Gbukɛ nu kərəp. Ahakɛ o hakɛ aŋa wuni mɔ yɔ aŋ yi hɛ ka ȧŋdɛr, kɛrɛ ɔwe mə yɔ kərəp-e, ɔ sap ahakɛ ka ȧŋdɛr ŋɔŋ gbeŋ.

¹⁹ Naŋ nə tɛ hɛ kəpa madɛr ma nu mə yi ȧŋseth ŋa ɔYina məsəm ɔwe yi nu rokor, ɔwe Kuru ɔ sɔŋ nu-i? Ɔwa naŋ tha banɛ-e,

²⁰ kotȧy-e a po wai nu mɔlɔ məbaki. Tiyȧŋ yikis Kuru ka madɛr ma nu.