1 AŋKɔrenth 3 - Ȧŋlemrȧnɛ Ȧfu

¹ Ɔwa minɛ awɔnt, pə fɔyɛ mi la fɔfȧnɛ nu mɔ mə afəm ŋa ɔYina, kɛrɛ mɔ afəm ȧtȧŋ mafela ma madɛr, pə yi mɔ təlɛnth ta Krayst.

² I po masər nu, i sɔŋ hɛ nu ɛdi ɛbaki mədɛr, pəkasifɛ nə la hɛ gbəli yi, ɔwa hali ka-ake nə tha gbəli hɛ yi.

³ kotȧy-e nə yi ras ka mafela mələs ma madɛr. Fani kətut, yi kəgbal, yi kəpeskɛnɛ kə yi kətɔŋ kȧ nu, pə yi hɛ kəpa nə kɔth ka madɛr mɔ mə matanɛ ma afəm a kəpet mə yi-i?

⁴ Fani ukin ɔ pa, Minɛ i wopnɛ Pɔlȧŋ, ka ulɔm ɔ pa, Minɛ i wopnɛ Apɔlɔsȧŋ, pə yi hɛ kəpa nə yi gbo mɔ afəm ŋa raru-i?

⁵ Kanɛ yi Pɔl-əŋ-e? Ɔwa kanɛ yi Apɔlɔs-e? Aŋ yi gbo aŋsom ŋa Kuru kətaŋ ka aŋa nə lanɛ, mɔ mə ɔMarki ɔ sɔŋ afɔsɔ ka kin o kin.

⁶ Minɛ po tɛp, Apɔlɔsȧŋ ɔ po bɔyis; kɛrɛ Kuru ɔ sɔŋ kabarnɛ.

⁷ Tiyȧŋ kɔn ɔwe tɛp, yi kɔn ɔwe bɔyis, aŋ yi hɛ koko; thambe Kuru ɔwe mə sɔŋ kabarnɛ.

⁸ Ɔwa kɔn ɔwe mə tɛp, yi kɔn ɔwe mə bɔyis-e, aŋ yi athənȧnɛ; ɔwa kin o kin ɔ tə sɔthɔ ȧŋrȧm ŋɔŋ mɔ mə mapanth mɔŋ mə yi.

⁹ kotȧy-e, saŋ sə yi ayɔ məpanth rɔkin yi Kuru. Naŋ nə yi akɔr ka Kuru, nə yi ȧŋseth ŋa Kuru.

¹⁰ Kətaŋanɛ ka ȧŋboŋa ŋa Kuru aŋa a sɔŋ mi-e, mɔ wuni tȧrȧ seth, i po bot ɔtəmər, ka ulɔm ɔ seth rokɔm kati. Kɛrɛ tha wuni o wuni ɔ botər ȧmerȧ mɔ mə ɔ sal ri.

¹¹ kotȧy-e wuni ɔ gbəli hɛ bot ɔtəmər o ɔtəmər ɔlɔm-e, pəthas thambe ɔwe a poŋ thɔŋ bot, kɔnɔ yi mɔ Yisɔs Kraystȧŋ.

¹² Ɔwa bepi wuni o wuni ɔ sal ka ɔtəmər wati ɔwe, pə yi rə məbɔŋɔ-o; akala ȧferȧ-o, məsar məbaki mɔlɔ-o, tənt-o, ɛforo-o, thalɔm yi ɛthuk;

¹³ mapanth ma wuni o wuni mə tə tɔrinɛ, kotȧy-e ȧŋrey ŋa Krayst aŋ tə ŋaibi ma, dɛ yi anant sɔ. Ɔwa anant nə tə mɛm ko mapanth ma wuni o wuni mȧ mə yi.

¹⁴ Bepi mapanth ama wuni mɔ sal rokɔm kati mə tia-e, ɔ tə sɔthɔ ȧrȧm.

¹⁵ Kɛrɛ bepi mapanth ma wuni mə tə fey-e, ȧŋrȧm ŋɔŋ aŋ tə dinɛ, kɛrɛ kɔn kɔnɔnɛ ɔ tə kisi, kɛrɛ halisa mɔ kəwur ka anant.

¹⁶ Naŋ nə tɛ hɛ kəpa nə yi ȧŋseth ŋa Kuru, ka ɔYina ka Kuru ɔ yirȧ rokor ka nu-i?

¹⁷ Bepi wuni o wuni ɔ ləsər ȧŋseth ŋa Kuru-e, kɔnɔ Kuru mɔ dim, kotȧy-e ȧŋseth ŋa Kuru aŋ yi asəm. Ɔwa naŋ nə yi ȧŋseth ŋati.

¹⁸ Ta wuni o wuni ɔ te tɔnsnɛ. Bepi wuni o wuni kətɔŋ ka nu ɔ nanɛ kəpa kɔn tempi ka ȧdȧru are-e, ta ɔ səkɛ upəŋk, kȧmȧ ɔ yi utempi tɛntɛnɛ.

¹⁹ kotȧy-e kȧtemp ka ȧdȧru are kə yi apənk ka Kurɔŋ. Ȧtesoma-e a po gbal kəpa, Ɔ tə wop antempi ka masɔth maŋ gbeŋ.

²⁰ Ɔwa sɔ, ƆMariki ɔ tȧrȧ ɛnanɛ ya antempi, kəpa ye ɛ yi ɛyay.

²¹ Tiyȧŋ ta wuni o wuni ɔ te kolonɛ ka afəm a kəpet, kotȧy-e naŋ nə ba mȧtȧy bɛ.

²² Bepi pə yi Pɔl-o, Apɔlɔs-o, Kȧyifas-o, raru-o, aŋesəm-o, rəfi-o, mȧtȧy ama yi ka-ake-o, thalɔm mȧtȧy ama mə der-o; na ba ma bɛ.

²³ Ɔwa Krayst ɔ ba nu, yi Kuru ɔ ba Kraystȧŋ.