1 AŋKɔrenth 16 - Ȧŋlemrȧnɛ Ȧfu

¹ Ɔwa mɔ mə i yamari ɛchɔch ro Kaletia-e, tə kəfak ta aŋsom-e, yaŋ mə nə yɔ sɔ.

² Ka ȧŋrey ȧtɔtɔkɔ ŋa ȧŋyik, ta wuni o wuni kətɔŋ ka nu ɔ bot rə kəbɛnɛ mɔ mə Kuru ɔ naŋfas kɔ, kȧmȧ ɛfȧk ɛ te yi ma i der.

³ Ma i bek-e, i ti somra ŋaŋ aŋa mə nə thith rɛ areka-e, kȧmȧ aŋ kera ɛfȧk ɛ nu ro Yerusalɛm.

⁴ Bepi pə mar kȧmȧ minɛ i kɔ sɔ-e, ŋaŋ-e aŋ tə paya mi.

⁵ I ti der ro rɔnu ma i po thas ro Masidonia; ȧtesoma-e i ba kərɔkinɛ Masidonia.

⁶ I ti tiyȧ do rɔnu alɔkɔ afisa, ɔwa sɔthlɔm i ti tiyȧ ro rɔnu ka ɔtaŋk, kȧmȧ nə mar mi ka ȧŋbiyas a mi dɛr o dɛr ro mə i kɔ.

⁷ kotȧy-e i yema hɛ nənk nu ka-ake ma i thas gbo, pəkasifɛ i sek tə kətia dɛ yi niaŋ alɔkɔ alɔm, bepi ɔMarki ɔ selɔ.

⁸ Kɛrɛ i ti tiyȧ ro Efisɔs haŋ Pɛntikɔst.

⁹ Ȧtesoma-e, a kanthɛ mi kədare kəbana ro məpanth məgbathi mə yi, ka atheranɛ agbȧthi aŋ yi ri sɔ.

¹⁰ Bepi Timɔthi ɔ der do rɔnu-e, yɔ kȧmȧ ɔ te soli kotȧy-e ɔ yɔ mapanth ma ɔMarki mɔ minɛ mə i yɔ ma.

¹¹ Tiyȧŋ ta wuni o wuni ɔ te kɔ sai sai; kɛrɛ mar kɔ ka ȧŋbiyas ŋɔŋ kȧmȧ ɔ der do rɔmi rə məthɔfəl, pəkasifɛ i kar kɔ yi aŋwɔnt.

¹² I po nɛmthɛnɛ ɔwɔnt a su Apɔlɔs tə kəder ro rɔnu yi aŋwɔnt; kɛrɛ mȧselɔ ma Kuru mə yi hɛ kȧmȧ ɔ yɔ ti ka-ake. Kɔnɔ mə derȧŋ, be ɔ sɔthɔ aŋfɛrɛ alompi.

¹³ Bumnɛ nu, təmȧ nu kəŋkəŋ ka kȧlanɛ. Yɔ nu mɔ afəm aruni, bȧk nu mədɛr.

¹⁴ Mȧtȧy bɛ mə nə yɔ, yɔ ma nu rə məbɔthər.

¹⁵ Nə tȧrȧ kəpa aŋfəm ŋa ȧŋseth ŋa Stɛfanɔs ŋa yi mȧkomi mətɔtɔkɔ ro Akaya, kaŋ po sɔndnɛ tə kəmar aŋsəm, tiyȧŋ i nɛmthɛnɛ nu awɔnt,

¹⁶ kȧmȧ nə sanɛ ka aŋfəm awunɔŋ, yi ka wuni o wuni ɔwe mə pantnɛ ka mapanth yi ɛthɔrɔ ɛya su.

¹⁷ Pə bɔnɛ mi ka kȧder ka Stɛfanɔs yi Fɔrtunetɔs, dɛ yi Akaykɔs, kotȧy-e aŋ po bɛmpa ta kate ka nu bəpər.

¹⁸ Ɔwa aŋ po thɔfsəl ȧŋmerȧ a mi mɔlɔ min ɛya nu. Tiyȧŋ yikis aŋfəm awunɔŋ.

¹⁹ Ɛgbanɛ ya Yisɔs ro Asia ɛ somra nu ɛkori. Akuyla yi Prisila aŋ kori nu toŋ ka ɔMarki dɛ yi aŋgbanɛ ŋa Yisɔs aŋa gbanɛ ka ȧŋseth ŋaŋ.

²⁰ Aŋwɔnt bɛ aŋ kori nu. Korianɛ nu rɛ kəmuməl kəsəm.

²¹ Minɛ Pɔl, i gbal aŋkori aŋe yi kȧta kȧmi gbeŋ.

²² Bepi wuni o wuni ɔ bɔthər hɛ ɔMarki Yisɔs Kraystȧŋ, ta ɔ yi uraŋka. Kaŋka ɔMarki kȧsu ɔ der.

²³ Kaŋka ȧŋboŋa ŋa ɔMarki kȧsu Yisɔs Krayst aŋ yi dɛ yi niaŋ bɛ.

²⁴ Ta mabɔthər ma mi mə yi nu bɛ ka Krayst Yisɔsȧŋ. Amina.