1 AŋKɔrenth 11 - Ȧŋlemrȧnɛ Ȧfu

¹ Ɔwa yi nu ȧtȧnsȧnɛ mi mɔ mə minɛ mə i tansanɛ Kraystȧŋ.

² Awɔnt, i thɔkəs nu ma nə nanɛ mi ka mȧtȧy bɛ, dɛ yi nə wop ɔbaksər ɛpa mɔ mə i po lȧnki yi do rɔnu.

³ Kɛrɛ i yema nu nə tȧrȧ kəpa ɔkərəbomp ka wan duni o wan duni ɔ yi Krayst; ɔwa ɔkərəbomp ka wuni bom o wuni bom ɔ yi ɔwos kɔŋ; ɔwa ɔkərəbomp ka Krayst ɔ yi Kurɔŋ.

⁴ Te ba ti, wan duni o wan duni ɔwe mə ramnɛ thalɔm ɔ kawandi kəba rȧbomp rɔŋ rə gbəpər, ɔ lapəs rȧbomp rɔŋ.

⁵ Kɛrɛ wuni bom o wuni bom ɔwe mə ramnɛ thalɔm ɔ kawandi-e, bepi ɔ gbəpər hɛ rȧbomp rɔŋ-e, ɔ lapəs rȧbomp rɔŋ, ȧtesoma-e pə yi tȧy tin mɔ a fon kɔ.

⁶ kotȧy-e bepi wuni bom ɔ gbəpərnɛ hɛ-e, ta a fon kɔ gbo; kɛrɛ tȧy ta məlap tȧŋ tə kəfon kɔ, tiyȧŋ ta ɔ gbəpərnɛ.

⁷ Tɛntɛnɛ wan duni ɔ yi hɛ tə kəgbəpər rȧbomp rɔŋ pəkasifɛ ɔ yi ka mȧbȧlȧnɛ yi aŋyiki ŋa Kurɔŋ; kɛrɛ ɔwuni bom kɔn ɔ yi aŋyiki ŋa ɔwan duni.

⁸ Ȧtesoma-e ɔwan duni ɔ wur hɛ thəpaŋ ka ɔwuni bom, kɛrɛ ɔwuni bom ɔ wur ka ɔwan duni.

⁹ A bɛmpa hɛ ɔwan duni ta salata ɔwuni bom; kɛrɛ a bɛmpa ɔwuni bom ta salata ɔwan duni.

¹⁰ Tiyȧŋ ɔwuni bom ɔ yi tə kəgbəpər rȧbomp rɔŋ yi akumbafele, salata aŋmȧleka.

¹¹ Ɔwuni bom ɔ yi hɛ thɔkɔ kəwur ka ɔwan duni, ta a pa ras ɔwan duni ɔ yi thɔkɔ kəwur ka ɔwuni bom rokor ka ɔMarki.

¹² kotȧy-e mɔ mə ɔwuni bom ɔ la wur ka ɔwan duni-e, yaŋ sɔ ka-ake ɔwan duni mɔ wur ka ɔwuni bom; ka mȧtȧy bɛ mə wur ka Kuru Məsaba-əŋ.

¹³ Na gbeh, gbək ti nu. Pə yi tȧy təfinɔ ta ɔwuni bom ɔ ramnɛ Kuru kəte gbəpərnɛ-i?

¹⁴ Mȧyi ma rawuni kəpet mə thəksa hɛ nu kəpa bepi wan duni ɔ ba afon abɔli-e, aŋ yi məlap do rɔŋɔŋ-i?

¹⁵ Kɛrɛ bepi wuni bom ɔ ba afon abɔli-e, aŋ yi hɛ kɔ ayiki-i? Ȧtesoma-e a sɔŋ kɔ aŋfon ŋɔŋ tə kəyi ȧgbəpərȧ.

¹⁶ Bepi wuni o wuni ɔ yema thoŋka ti-e, sə ba hɛ matanɛ mati, ɔwa ɛchɔch sɔ ɛ ba hɛ ma.

¹⁷ Ma i tɔri nu ȧtȧy ȧte-e, i gbəli hɛ kori kori ɛgbanɛ ɛ nu, pəkasifɛ be ta tȧy təfinɔ-e, tȧy tələs tə wur ri.

¹⁸ Ka ɔtɔtɔkɔ bepi nə der rɔkin ka ȧŋseth ŋa Kuru-e, i təl kəpa ɔgbaskɛ gbaskɛ ɔ yi nu kətɔŋ; ɔwa i lanɛ ti dɔ.

¹⁹ kotȧy-e təgbanth tə ba tə kəyi kətɔŋ ka nu, kȧmȧ a tȧrȧ ŋa gbəraŋ aŋa a po mɛmər kətɔŋ ka nu.

²⁰ Tiyȧŋ ma nə thoŋklanɛ rɔkin-e nə di hɛ mən kadi ȧke ɔMarki gbeŋ.

²¹ kotȧy-e ma nə di-e, ɔkin o kin ɔ timnɛ tə kəsɔthɔ kadi kɔŋ; ukin ɔ di mɔ udor-e, ka ulɔm ɔ tis.

²² Ko-e? Nə ba hɛ aseth ro nə gbəli di dɛ yi nə mun-i? Thalɔm nə farki ȧŋseth ŋa Kuru-i, ɔwa nə lapəs ŋaŋ aŋa te ba-i? To mɛ i gbəli pa do rɔnu-a? I gbəli kori kori nu ta ȧte-i? Sako, i yɔ hɛ yi.

²³ Minɛ i po sɔthɔ ka ɔMarki ȧtȧ i laŋklia nu, kəpa ɔMarki Yisɔs ka rȧtȧtȧk rati ara a sɔnd kɔ-e, ɔ gbasi kabo.

²⁴ Ɔwa ma ɔ po muti mɔmɔ-e, ɔ siməth ki, kɔ pa, Gbasi nu, ɔwa di; ake kə yi ȧŋdɛr a mi aŋa yi ta ȧtȧ nu. Yɔ nu ȧte tə kənanɛ mi.

²⁵ Ya pə yi sɔ ma a po di-e, ɔ gbasi ampɔthi, ɔ pa, Ampɔthi aŋe ŋȧ yi aŋlemranɛ afu ŋa mȧtir ma mi. Yɔ nu ȧte, ɔwa ka ɔkatkat mȧ nə mun ma-e, yɔ ti nu tə kənanɛ mi.

²⁶ kotȧy-e ka ɔkatkat mȧ nə di kabo ake, ɔwa nə kȧl mun ka ampɔthi aŋe, nə taməs rafi ra ɔMarki haŋ ɔ kȧl der.

²⁷ Bepi wuni o wuni ɔ di kabo ake-e, ɔwa ɔ mun ka ampɔthi aŋe ŋa ɔMariki-e, rə kəte ba məmari-e, ɔ tə ba mətheri salata ȧŋdɛr yi mȧtir ma ɔMarki.

²⁸ Tiyȧŋ wuni o wuni ɔ yi tə kəgbɛŋgbɛŋ aŋyɛthɛ ŋɔŋ; kədarəŋ kati ɔ gbəli di kabo kati, ɔ kȧl mun ka ampɔthi ŋati.

²⁹ Ȧtesoma-e, bepi wuni ɔwe bek hɛ ɔ di-e, ɔwa ɔ kȧl mun-e, ɔ di dɛ yi ɔ mun mətheri ka aŋyɛthɛ ŋɔŋ ma ɔ te botərnɛ ȧmerȧ ta ȧŋdɛr ŋa ɔMarki.

³⁰ Ta ȧŋsabu aŋe-e, agbȧthi kətɔŋ ka nu aŋ yi arȧnt dɛ yi atuy, ka agbȧthi sɔ aŋ fi.

³¹ Kɛrɛ bepi sə thektheknɛ-e, a ba hɛ kəthoŋkas su.

³² Kɛrɛ ma ɔMarki ɔ thonkas su-e, ɔ tə thalər su kȧmȧ sə te sɔthɔ mətheri dɛ yi ȧdȧru.

³³ Tiyȧŋ aŋwɔnt a mi, ma nə thoŋklanɛ rɔkin tə kədi-e, kar ɔkin ka ulɔm.

³⁴ Bepi wuni o wuni ɔ yi udor-e, ta ɔ di ro seth kɔŋ, kȧmȧ pə yi-e, ma nə thoŋklanɛ rɔkin-e, nə sɔthɔ hɛ mətheri. Ma i der-e, i ti lompəs mȧtȧy məlɔm.