Tito 2 - Nuevo Testamento Toba Maskoy

Nenganemmalhka angetlhekmoksek aktaqmanma hengetlhekmoskama

¹ Koka ntasek lheiap etlhekmokse mota aktemakha na mota aklheianma hengetlhekmoskama akto nak have niapak anke.

² Nkaimelhkek na metno apketko'ok anak ellapvanak ennavaksek apvalho'ok apankek la'a, etnangkok na apkellai'akha la enenlhet, nkaimelhkek na nkotlhenek apvalho'ok amanie apkenmak'akha la ellanangkok qaselhaha, etnangkok na meliaskeiam akto nak hengetlhekmoskama akpeivomo, ellasekhok na aplhamakho enenlhet'avok, etnangkok na apkeliennaktema apkelvaskapma neksa akvai'a la akientalhnema.

³ Kanhan nkotnotko'ok anak ntasek nkoltaqmelkasalhkoho', metka alpaiesaikama ania'a akvesai'a mo'ok la'a, metka nhan akmaikama nkok anmen. Ntasek koka nkotlhekmosangkok aplhamakho kakpota nkollanangkok qaselha altaqmelo,

⁴ nkotlhekmosangkok na ngkelvana tko'ok anak kolhva akteniaikamok anakteiangka'a kakpota nkollavanak nkollamelemmak anakteiangka'a, atkak nahan.

⁵ Nkollavanak na nkotlhenek av'alho'ok amanie anmahai'a la nkollanangkok qaselha m'a, kakpota nhan nkoltaqmelkasok atlhenaikama av'alho'ok, kanhan nkotnangkok aliamo nkoltaqmelkesek akhaiangkolha la'a, aliamolhma, alleliehekho nhan anakteiangka'a la'a kakpota m'a mangkolhek akiematkesangka ania'a aktaqmanma aniem'o Eniapom Neten.

⁶ Eleltennasamok hata nhan apketko'ok anak nkotlhenek apvalho'ok amanie apkenmak'akha la ellanangkok lhamakho qaselhaha,

⁷ elvetaskes na aptemakha apanke nak lheiap kakpota elvanangkok ma'a, eieplavkes hata nhan aktemakha nak apketlhekmoskama apankok, etaqmelkasakpo pankek nahan kakpota meliaskamek enenlhet lheiap,

⁸ eliatama ta nhan aktaqmanma apaivoma, metka la nenlheianveiam emmo'ok kakpota enmankangvomok ma'a apkellelto la apkenmahai'a elammelhek apketlhekmoskama, mankolhenalhkek hata akvesai'a ngkolatsekama hengetlhekmoskama enganko'ok anak.

⁹ Eleltennasamok hata nhan apkelelto nak nema allasennaikama nema apkelianmoma ellanak eleliehekhok apveske apanko'ok, ellana ta nhan etnangkok ellanhok nalhep'avek apvalho'ok ma'a, have nhan ellatemmongho'.

¹⁰ Eleltennasamok hata nhan menmenielhe, etnangkok na nengaqtave mota apkelveskai'e apanko'ok kakpota elvetak aktaqmanma nema atlhekmoskama apketlhevai'a aniem'o Eniapom Neten apto nhan hengelvonkeskama tep ma'a.

¹¹ Hengelvetaskeskangke lhta Eniapom Neten aktaqmanma nkek hengellanei'o neksa hengellaikamok nengelvongkasemmalhka tep anak nenlhamakho lhmankek ham,

¹² ka nkeniemai'ak ntasek angelvatesangkok nentaikamok mongeliamolhma, kanhan alletsepmakha ennenio'ok anak, kolhva koka ntasek angelloka atlhenaikama mota engelvalho'ok aktaqmanma qaselha nak, angellanangkok na akpeivomo, angellamelemmak na emmo'ok,

¹³ anlhengkesek ma'a akvakmo ta aknem akvai'a alpaihengvaiam engvalho'ok akiavai'a, angvetangvomok hata ma'a alel·halhneiangka mota engelvalho'ok, nkotne ta aktaqmanma nke akvetammalhka malha apkelienmaiam apvaktamo ta aknema apmopvana apankek Eniapom Neten kanhan Jesucristo apto hengelvonkeskama tep,

¹⁴ apkaiangkave lhta nhan apmatnamo m'a kakpota hengel·hatsoskakhak ennengko'o neksa hengenmaikama mangeliamolhma, hengellalhneskeskamo nhan engelvalho'ok ma'a, hengeltemeskeskamo nhan apkennemolhema apanke', anteniangko angellanangkok aktaqmanma.

¹⁵ Hai', ka hengke'e ntase mota etlhekmoksek lheiap. ¡Eliatekhok, ennaves nahan akieplomo apientalhnemo, meniangko nhan lheiap ngkolhek aktemeskesantamo koneng!