Santiago 3 - Nuevo Testamento Toba Maskoy

Aktemakha engalhkok

¹ Ketlhengkap elialheng'a, melienlhanmamo nkek aplhamakho apkenmahai'a etnangkok hengetlhekmoskama Eniapom Neten apaivoma, ngkanek tep ankek hata ngkotnek nema aliekpelkemo m'a aktemakha apkenmakmekama, manlhehek hata m'a enenlhet'avok anak apkellomakha apankavek.

² Ngkolatsekama mota nempaivoma nelanei'o emmo'ok, koka apto la enenlhet metka aptevaskama apvesai'a po'ok, niennakke songkek apvalhok ma'a, apmopvana nhan emankok apiokha apanko ie kakpota melaniek qaselha akmasoma.

³ Malha aktonak ma'a etanlheng anak, nenmaikamok anak nengatkeskama apatong anganantek kakpota memhangkek apmak'akha la emhangkok ma'a anmangvomo mota.

⁴ Malha nhan aktonak loma nemmen, akiavai'a nkek la'a, akmahai'a na mota nkosvok mo'ok nekha alhkaiam, koka nietnek ketsek alpengkamekamok ma'a kakpota nkopeivok aklhengama m'a.

⁵ Nnavek na m'a engalhkok anak, ketsek ankek niekhe koka antak aklhenammalhko nkek ma'a akmovana nkolanak aliavai'a qaselha. Malha talha nak aleivoma ketsek sekhe, koka niavongvakmek akmeiasma nalhma akiavai'a la'a.

⁶ Hai', engalhkok anak malha talha nak aleivoma, nietnek akiavai'a akmovana kakpota nkolanak qaselha ngkolatsekama nkek, malha nha ntak akpaisengkeskama engvalho'ok anak, koka engalhkok anak talha ankok nkeniemai'ak ma'a nkospanei'akha talha, ntevaskek lhamakho nenganiemhaikama.

⁷ Apvankek enenlhet enmankok lhamakho kaselha nevhak, anata, menasma kakpota nhan aloma nak nemmen,

⁸ koka mamma enenlhet emankok apalhkok anak, ngkolatsekama nkek, mankaiangko nak ammangkok, nlanei'avek na veneno hengaqhemo.

⁹ Nenmama mota ennengko'o engalhkok anak kakpota angeliatama aktaqmanma anlhenek apvesai'a Apveske kanhan Eniapom, nenmama nhan engalhkok anak kakpota aniemetkesek emmo'ok, apkellelto lhta apkelentepkeskama Eniapom Neten apnesemmakpo panke lhta nhan ma'a.

¹⁰ Vanlha lhema engatong anak nkelentepkek nempaivoma aktaqmanma, neniemetkeskama nhan, koka have nentemakha m'a elialheng'a.

¹¹ ¿Avanke nlho nkotiepok lhemek iemmen akmases kanhan iasek iemmen lhema malhek la akteiapmakha iemmen, he?

¹² Kolketamama no apvalho'ok ketlhengkap elialheng'a ¿Avanke nlho iamet higuera ngkoitek akielhna aceituna, he? ¿Avanke nlho nhan iamet vid ngkoitek akielhna higo, he? ¿Avanke nlho nkotiepok lhemek iasek iemmen kanhan iemmen akmases akteiapmakha nak iemmen, he?

Nenianveiakmo aniem'o Eniapom Neten

¹³ Apno la lhema enenlhet apieseksek anak ketlhengkap aklheianma mota apvalhok apkanema eihok lhamakho qaselha, ntasek elvetaskesek ma'a nkotalhkak na apkelanai'a qaselha altaqmelo akieplomo koka nhan nalhepek apvalhok aniem'o aknema apiamo.

¹⁴ Koka akloma la apvalhok aniem'o apiasepkeskama, kanhan apkenmeiavkesammakpo pankek qaselhaha, akhemo ngkotnek ma'a anmalhko apvalhok ngkanek have aknema apiamo m'a, apmopvana ania'a nhan ma'a.

¹⁵ Koka iama neniamo nak have aniemai'a neten, nalhepop koka nkeniemai'ak ma'a, enenlhet apanke nak kanhan keliaqhameio',

¹⁶ ngkanek ntepkaskek ma'a neniasepkeskama nak akietnakha la apanko'ok emmo'ok, nennapommalhka, mantaqmelkasemmalhko engankoie' kanhan lhamakho aktemakha ngkollatsekama.

¹⁷ Koka enenlhet la akietnema aknema apiamo aniem'o m'a Eniapom Neten, apto malha alhnai'o apvalhok, apto nhan metka akmaska niapom apkaniemhaikama, apiamolhma, hengamelaiakmo mota, apietnai'o nhan napa'at po'ok, apneskamo po'ok apkellanei'o enenlhet apieseksek la'a, iokhalhmek na aplheianma, apkelanai'a nha mota qaselha altaqmelo.

¹⁸ Ka apkellelto la aptengiaikamo mota aktaqmelaikama envalhok, malha nhan ma'a enenlhet apkanma la mota aktek akvesai'a koka aktaqmelaikama envalhok, netamen ma'a enaklhek hata malha akielhna akvesai'a koka nhan akpeivomo.