Romanos 6 - Nuevo Testamento Toba Maskoy

Akmaskema akmovana mangiamolhma tekhenlhet'ok

¹ ¿Se lha atlheianma apvalho'ok ketlhengkap ke, ntase nlho niekhe angetlhengkesek nengellanekamok la ngkollatsekama kakpota nkoiavangkok na aktaqmanma hengellanei'o Eniapom Neten, he?

² ¡Mma'! Mmaskek nellanengko ngkollatsekama, mankoietok angelieplavkesek mokhom nellanekamok ngkollatsekama.

³ Kotlheianvakho no apvalho'ok ketlhengkap neksa nema hengellavkesaikamok alhta konne iemmen ma'a, malha neletsepmo lheme lhta ntemak Cristo.

⁴ Neksa lhta nema hengellavkesaikamok konne iemmen, malha lhta nha ntemak nelkatonnammalhka lheme Cristo m'a, malha lhta nhan neletsepma lheme. Koka akmaskemakha lhta nhan hengenmaikama mongeliamolhma m'a, kolhva koka envanka'a mota angellanangkok qaselha altaqmelo, nnavek ma'a Cristo aplhatekhangveiakmo lhta apieseksek apkenmaskengvaiakmo aniem'o akiavai'a apmopvana Eniapom Neten.

⁵ Lhta ntemak ma'a ennengko'o malha nengeletsepmo lhta lheme Cristo m'a, netamen annaklhatekhangvomok hata m'a malha aktemo lhta Cristo.

⁶ Neliavek ennengko'o alvaneiam alhta engelvalho'ok nketsepmek lhemek ma'a Cristo akieto neten iamet aktenneskama, mmaskek na hengenmangka ngkollatsekama nak.

⁷ Enenlhet apto la apketsepmo lhemek Cristo, mmaskek akmangka ngkollatsekama nak.

⁸ Nenlhamakho nengelelto neletsepmo lhemek Cristo, have niapak anke hata ngkotnek ma'a angelloka ta lheme Cristo.

^9-10 Neliavek ennengko'o apketsepme lhta Cristo lhema aktema nkek kakpota emaskeskamok ngkollatsekama nenmahai'a angellanangkok. Netamen ma'a nemo nhan aklhatekhaskeiakmo, menietsepekhek hata mokhom ma'a ngkanek mmaskek akmovana nengetsepma nak takhaplhet ma'a, kolhva koka aptengkeskasekama mota apvalhok Eniapom Neten.

¹¹ Kotlheng apkelvalho'ok ketlhengkap malha apkeletsepmo lhemek Cristo, ka nkeniemai'ak mankollapvankek mokhom eltemengvakho lhma. Vanlha koka apvanka'ak ellanangkok akleklemelha la apvalhok Eniapom Neten aniem'o apkelpasmekha m'a Cristo Jesús.

¹² Ka ngkanek na ketlhengkap mellankek nkonmama mokhom ngkollatsekama, aliatekamok anak apvalho'ok ellanangkok ngkolatsekama.

¹³ Mellankehek na mokhom apkeliokha nak nkollaneskasangkok ngkollatsekama, ngkanek malha apkeletsepmo lhemek Cristo, mmaskek na anmangka maniamolhma nak. Kolhva koka nnangkok ketlhengkap alhnankok apkellangiemhaikama, ntasek ellangkok apkeliokha m'a Eniapom Neten kakpota nkoliennak apiempeiok ellanangkok qaselha altaqmelo.

¹⁴ Ka apkellanengko la m'a astakha lhkek alheianma, mmaskek anmangka ngkollatsekama, mmaskek na apkellava koneng ley, kolhva koka apkelloka koneng aktaqmanma nak hengellanei'o Eniapom Neten.

Nentaikamok kolhva nengellasennaikama Eniapom Neten

¹⁵ Hai', mmaskek nellava koneng ley, kolhva koka nelloka koneng aktaqmanma nak hengellanei'o Eniapom Neten. ¿Ntase nlho niekhe angellanangkok mokhom ngkollatsekama, he? ¡Ma', mankoietok ma'a!

¹⁶ Apkeliavek ketlhengkap apkellelto nak nema allasennaikama nema apkelianmoma apkeleliahakhave mota apveske apanko'ok. Ka aptangko la aveske apanko'ok akvesai'a nak ngkollatsekama, eletsepok hata ketlhengkap ma'a, koka aptangko la apveske apanko'ok Eniapom Neten, elloka ta nha mota apkellanekamok qaselha akpeivomo.

¹⁷ Lhennenga lhta ketlhengkap allasennaikama nema apkelianmoma ankok ngkollatsekama, kolhva koka apvanka'a eleliehekhok hengetlhekmoskama aktaqmanma apketlhevai'a lhta aniem'o apkelpasmoma Eniapom Neten.

¹⁸ Nne lhta alpaqnengkasakho neksa anmaikama ngkollatsekama ketlhengkap, kolhva aptaikokho allasennaikama qaselha akpeivomo.

¹⁹ Koka nientelhek eliangvomhok asketlhekmoskama lhkaiek, ka nkeniemai'ak na atlhekmoksek asietkeskama aspaioma m'a. Lhennenga lhta ketlhengkap anmaikama maniamolhma nak, aliateiangko lhta nhan ellanangkok qaselha akpaiseiam, qaselha ngkolatsekama metka apkel·halhiongveianlha. Kolhva koka ntase ellangkok enmama Eniapom Neten kakpota apvanka'ak elvatesangkok ngolatsekama nak, ellanangko mota qaselha altaqmelo.

²⁰ Lhennenga lhta ketlhengkap malha allasennaikama nema apkelianmoma ankok ngkollatsekama nak, ma lhta ellasennaikama qaselha akpeivomo nak.

²¹ ¿Nkeltaqmelkeskeskangke nlho lhta apkellangiemhaikama ketlhengkap aniem'o apkellanekamok qaselha henmankaskama nak, he? Ma, vanlha lhtoka akmahai'o nkonnapok, nkolienievkesek na Eniapom Neten.

²² Kolhva koka nnengkek alpaqnengkasekho neksa anmaikama ketlhengkap ngkollatsekama nak, aptangkokhek apkellasennaikama Eniapom Neten, apvanka'ak na elentepkeskesek elvanengkesek qaselha altaqmelo, kakpota nkolhnangkok na aliennaktema apnenio'ok nkotnengvaianlha nnelha.

²³ Nelan'o la ngkollatsekama nak, ngva'ak na nengetsepma nak. Koka Eniapom Neten na hengellangkok aliennaktema ennenio'ok mankotnengvaianlha nnelha metka akianmoma aniem'o Apveske engankok Cristo Jesús.