Romanos 3 - Nuevo Testamento Toba Maskoy

¹ ¿Sek la atlheianmo apvalho'ok ketlhengkap ke, he, nteskesaiangke nlho neten apankavek aptaiangko judios kakpota nhan aknaiangko nema aliaqtemenkeskama nekhatkok apkellammelhakha, he?

² Hai', avanhek ankek aktemeskesaikamok neten apankavek ma'a aniemai'o m'a apkellaikamok apaivoma Eniapom Neten ma'a.

³ Koka moklhem'a judios meleliehekhok ma'a, nkaqhok koka Eniapom Neten apieplavkeskangkek aptemakha lhta apaivoma aplheianma,

⁴ ngkanek have apmopvana ania'a, have aptonak enenlhet, Eniapom neten koka aplheianma mota iokhalhmek anke', ka aktemo nak na aktalhesammalhka Vakkahak Eniapom Neten apaivoma: «Aplhamakho enenlhet hata eliohok aptema la iokhalhmek aplheianma lheiap, no la akiantemakho napaqtek hengiekpelkemo, eiephongvomhok hata lheiap ma'a» lhna ntemak ma'a.

⁵ Koka ntase kelha niekhe mangeliamolhma nak kakpota nkolvetaskesek enenlhet'avok vanlha apankek Eniapom Neten apto apeivomo. Koka hengeliaqmongkaskesakho la nentemakha nak mongeliamolhma, malha mepeivomo nhan ma'a. Koka astakha lhkek alheianma etnangko mota enenlhet elpaqmetek,

⁶ koka mankoietok etnangko niekhe m'a. Apto la mepeivomo Eniapom Neten, mankapvankek na eliekpelkok apkeltemakha aplhamakho enenlhet'avok halhma nkek ham.

⁷ Moklhem'a kelha nhan nkotlhenek apvalho'ok mankolietek nema akiaqmongkasekha aptangko la apkenmopvanka ania'a, ngkanek nenmopvana ania'a nak nkolvetaskesek aplhamakho enenlhet'avok vanlha apanke Eniapom Neten apto metka apmopvana ania'a, kakpota ellahok enenlhet'avok ma'a.

⁸ Apketlheianmek na lhta mota moklhem'a ketlhengkap ntasek ellanangkok qaselha ngkollatsekama kakpota Eniapom Neten etneskasekha aktaqmanma m'a. Apketlheianmek na lhta astemo asketlhekmoskama ko m'a, apkellentepkasekama asvesai'a m'a, ntasek nkovak akientalhnema takhaplhet'ok enenlhet'avok anak ma'a.

Mamma enenlhet apto apeivomo

⁹ Smak'ak alelmalhnama lhema qaselha ketlhengkap, ¿neten engankave nlho nentangko nak judios mannok po'ok enenlhet la'a, he? Mma', askeleltennaske lhta ketlhengkap sekhe lhta judios kakpota nhan metnangko judios nennaqtevasemmalhko engankavek aniem'o mangeleliehekho hengaskamakha Eniapom Neten.

¹⁰ Ka ktemo nak na aktalhesammalhka Vakkahak Eniapom Neten apaivoma: «Mamma enenlhet apto apeivomo, mamma apankek lhema la'a,

¹¹ mamma nhan enenlhet apto la nema apiamo. Mamma nhan apteniai'a la Eniapom Neten,

¹² lhamakho enenlhet apkelietnokhamongvakmek malha amai aktaqmelo, apkelieplakhek amai ngkolatsenkolha. Apkeltemongvakmek meliamolhma, mellanenkok na altaqmanma qaselhaha, mamma apankek lhema aphapak la'a»

¹³ «Alhva'ak apiaspo'ok anak malha niekhe nemakha nak akpekkanveianlha enghapak metka nema alapekha la atno'ok, apalhko'ok koka nkelpaqmetkek vanlha aktaikamok anmovanka ania'a». «Apkeliatekama malha veneno nkok anak nonempa menasma».

¹⁴ «Apatno'ok anak nlanei'avek neniematkeskama emmo'ok kakpota nhan malha akmaska nak aimenek».

¹⁵ «Apkelelhievai'a pankavek apkeniangko la'a kakpota eliangkenkasangkok ema apanko'ok po'ok,

¹⁶ apnaqtevaskek kakpota nhan nekha tkok aptemeskesakhak qaselha apkelvanlha la'a.

¹⁷ Meliohok amai anak aktaqmelaikama engvalho'ok nenieplavo la'a»

¹⁸ «Mellai'o mota Eniapom Neten» ka ntemak ania'a m'a.

¹⁹ Nengeliavek ennengko'o aktemakha aklheianma ley kakpota nhan allanemakha etnangkok judios, kakpota nkolvetaskesek apketselhnanemmap ngkanek meleliehekhok ma'a, mamma nhan enenlhet etlhenek napaqtek Eniapom Neten meliamoho.

²⁰ Mankollapvankek enenlhet etlhenakpo apankavek apkelpeivomo napaqtek Eniapom Neten aniem'o apieplavkeskama ley, ngkanek ley anak hengelvetaskaskek mongeliehekho hengellaskamakha Eniapom Neten.

Nema hengeltemeskeskama nengelpeivomo aniem'o mongiaskeiam

²¹ Koka kolhvave nak hengelvetaskaskek Eniapom Neten antangkok nengelpeivomo have m'a aniem'o ley anak, lhnak nanek na ntemak aklheianma m'a Vakkahak ley Moises kakpota nhan vakkahak apanko'ok apkeleltennasemmap ania'a.

²² Hai, Eniapom Neten hengeltemeskaskek nengelpeivomo nenlhamakho lhmankek ham aniem'o mongeliaskeiam Jesucristo ngkanek nennavek emmo'ok napaqtek ma'a.

²³ Nenlhamakho nhan nellanekamok ngkollatsekama, taiepe kanke lhta nhan ennengko'o Eniapom Neten apto aknema apmopvana apanke'.

²⁴ Avanhek aktaqmanma hengellanei'o Eniapom Neten, apkapaskamo lhta Jesucristo kakpota hengel·hatsoskasangkok malha hennaktetema mongeliamolhma, hengeltemeskasekho lhta nhan nengelpeivomo napaqte Eniapom Neten ma'a, metka akianmoma.

²⁵ Apeivomo panke Eniapom Neten, apvanke lhta niekhe hennaqtevasekha aniem'o nellanekamok ngkollatsekama, koka mepekheskamak hengellanei'o m'a, nietnengke lhta nhan apeneskamo lhema qaselha. Aplheianmo lhnak nanek apvalhok eniapaksek Cristo Jesús nenvanlha nak kakpota enietsepok nkoiangkenalhkak na ema apankok henianmoma ennengko'o. Kakpota etnama apankek ngkollatsekama apkellanekamok apkellelto la meliaskeiam.

²⁶ Apketsepke lhta Cristo Jesús kakpota esavhok apieplavkeskama henganemakha aklheianma, apkelvetaskaske lhta nhan apto apeivomo Eniapom Neten ma'a, apkelvetaskaske lhta nhan Eniapom Neten apto apkeltemeskeskama apkelpeivomo apkellelto la meliaskeiam Jesús.

²⁷ Akhemo angetlhenalhkok engankavek nelieplavkeskama ley napaqtek Eniapom Neten, ngkanek neten ankek akto akiaspommalhka m'a mongiaskeiam anak.

²⁸ Eniapom Neten hengeltemeskeskama nengelpeivomo aniem'o mongeliaskeiam, have aniem'o m'a nengeliehekho nak ley.

²⁹ Eniapom Neten apto nhan apveske apanko'ok metnangko nak judios, have vanlha m'a apkellelto nak judios.

³⁰ Apto nhan Eniapom Neten lhema aphapak apanke, aptemeskaske panke apkelpeivomo apkellelto aknaikamo nak apkeliaqtemenaikamok nekhatkok apkellammelhakha, kakpota nhan ma'a mankolhnaikamok anak apkeliaqtemenaikamok nekhatkok apkellammelhakha aniemai'o koka m'a nnekhek mo'ok meliaskeiakmo.

³¹ Ko la aktemakha atlheianma apvalho'ok ketlhengkap, ¿mongiaskeiam anak mmaskeske nlho akiennaktema ley anak, he? ¡Ma! Ka mongiaskeiam anak hengeliangveskeskakmek ley anak akto aktaqmanma m'a.