Romanos 2 - Nuevo Testamento Toba Maskoy

Vanlha Eniapom Neten hengiekpelkemo akietemo nkek

¹ Mankoietok lheiap elhenek po'ok apselhnanemmap, malha aptevasekpek na apankek lheiap ma'a ngkanek apkelan'ak na qaselha ngkolatsekama lheiap.

² Koka nengeliavek ennengko'o vanlha Eniapom Neten apvankek elhenek aktaqmanma nlho ka la ngkolatsekama apkelanai'a enenlhet, akietemo nkek koka aptema m'a.

³ Lheiap aplhengkek po'ok apkelanai'a ngkollatsekama, koka apnave niekhe lheiap ma'a, mevomek hata tep lheiap apiaqmongkasakho ta aptemakha Eniapom Neten aniem'o aplhenaikama po'ok apvesai'a.

⁴ Mevannama lheiap akiavai'a nkek apiamolhma Eniapom Neten, mepekhaksek na etaknevak lheiap apkelan'o la qaselha ngkolatsekama. Hai', have niapak ankek apto apiamolhma apankek Eniapom Neten ma'a, apkeltavek eiaqmongkasekha mo'ok apvalhok lheiap, elvataksek na qaselha ngkolatsekama apkelanai'a.

^5-6 Nkoihek koka apvalhok lheiap, mangkomak'ak eiaqmongkasekhak mo'ok apvalhok, ntaqmelkasavek koka akiavengko nema akiaqmongkasekha aptemakha akvakmo ta aktemongvanlha nnelha aknem. Eniapom Neten hata ellangkok akiaqmoiekha aniem'o aptaiangkolha apkellanekamok.

⁷ Ellangkok hata nhan ma'a aliennaktema apnenio'ok apkellelto apkelvaskapma apkellanekamok la aktaqmelo, apteniaikamok na nkolekkasama apvalhok Eniapom Neten, apteniaikamok na ngkolhek allangko aliennaktema apnenio'ok, kakpota nhan ngkolhek altemeskesangko apkelientalhnemo.

⁸ Koka eienientak hata apiaqmongkasekha aploma takhaplhet'ok apkellelto apkenmeiavkesammakpo pankek qaselhaha, apkellammelhma nhan akto akpeivomo, koka apkellasekhavek ma'a mankopeivomo nak.

⁹ Nkovak hato ka akientalhnema takhaplhet'ok enenlhet'avok anak ma'a, ellengangkok hato ka m'a akientalhnema, apmaniaie' judios netamen metnangko nak judios.

¹⁰ Eniapom Neten hato ka etlhenama apkelvesai'a apkellelto nak apkellanekamok qaselha altaqmelo, eltemeskesek hata nhan apkelientalhnemo. Ngkolhek hata nhan allak'o, etlhevangkok hata nhan altaqmelaikama apvalho'ok apmaniaie' judios, netamen hata m'a metnangko nak judios,

¹¹ ngkanek apnemo po'ok napaqtek Eniapom Neten.

Ley apankok Moises

¹² Apkellelto nak metnangko nak judios mamma ley aniem'o nak Moises, nkaqhok koka ngkolhek hata aknaqtevasakho apkelieko la hengaskamakha nak Eniapom Neten. Koka judios apankave nak nkoiaqmongkasekhak hata ley apanko'ok apankavek apkellanengko la ngkolatsekama.

¹³ Koka enenlhet'avok anak aptangko nak apkelleliehekho nak ley, koka apkelpeivomo m'a, have vanlha etnangkok mok apkellailhemo, nkaimelhkek koka eleliehekhoho.

^14-15 Mamma ley Moises apkellelto nak metnangko nak judios, koka apkeliavek akto ngkolatsekama, akto nhan aktaqmanma, nietnek ley apvalho'ok apankavek, malha nema aliatekama la'a nkelpaqmetkaske mota: —Mangkolatsema ham —nlhengkasema mota m'a. —Aktaqmanma ham —nketsevaskesama mota m'a. Koka malha ley ma'a aleliatekama apvalho'ok apankave nak, nkotlhengkasekhok hata atlheianma aptaiangkolha ngkolatsekama, aktaqmanma m'a napaqtek Eniapom Neten

¹⁶ akvo'o ta aknem Cristo Jesús hata etnek hengeliekpelkemo m'a qaselha alielhammalhko nak engelvalho'ok nenlhamakho aptemakha nellanekamok. Hai', hata ngkotnek ma'a astemakha na mota asketlhekmoskama ania'a aktaqmanma nak.

Judios kanhan ley

¹⁷ Apkelakpe mota ketlhengkap apketlhenammakpo pankavek judios, kakpota nhan akietnema ley apanko'ok, apkellelto nhan apkeliekieskama Eniapom Neten.

¹⁸ Apkeliave niekhe ketlhengkap etnangkok kakpota nkolekkasama apvalhok Eniapom Neten aniem'o ley apanko'ok alletlhekmoskama.

¹⁹ Nketlhenke mota apvalho'ok apanko'ok apankavek malha la apommatma' kakpota elieplo'ok ma'a malha metka nak apaqto'ok apketlhengama nak ienaqtesakha lhma.

²⁰ Nketlhenkek na apvalho'ok apvanka'ak etlhekmosangkok metka nak apkeliangveiakmo kakpota nhan malha nematkak aniem'o ley apanko'ok akto nema neniamo, akto nhan have niapak anke.

²¹ Hai', apketlhekmosengkek po'ok ketlhengkap, koka melieplavkasak na ketlhengkap ma'a. Apketlhekmosengke mota po'ok menmenielhe', koka apkenmenielhme mota niekhe ketlhengkap.

²² Apketlhekmoseiangke mota po'ok ketlhengkap meleltema menaqtevaksek aliemhapekamok, koka apnaqtevaskangke mota aliemhapekamok ketlhengkap. Apketlhekmosengke mota apkeleltema eltaqneva' qaselha akiokha allanemmalhka apkeltakneskasekamok, koka apkeleltalhnengkek konne pa'at aknaiangkolha m'a, apkenmenielhmo nhan qaselha akmennave anko'ok ma'a.

²³ Apketlhenammakpave mota apankavek apkeliamo ley, mok apatno'ok koka, meleliehekhok nahan, mellai'ok na Eniapom Neten ketlhengkap.

²⁴ Lhnak nane ntemak lhennenga aktalhesammalhka Vakkahak Eniapom Neten apaivoma hengke'e: «Metnangko judios apnaqtevaskangke mota apvesai'a Eniapom Neten aniem'o ketlhengkap meliamolhma» lhna ntemak.

²⁵ Ntase niekhe nema aliaqtemenkeskama nak nekhatkok apkellammelhakha apkelleliahakho la ley anak Moises, koka meleliahakho la m'a, akhemo ta ngkotnek nema aliaqtemenkeskama nak, malha ta ngkotnek metka nema aliaqtemenkeskama napaqtek Eniapom Neten.

²⁶ Apkellelto nak metka nema aliaqtemenkeskama nekhatko'ok apkellammelhakha apkelleliahakho la nhan ley, malha niekhe ntak nema aktemeskesaikamok aliaqtemenammalhka nekhatkok apkellammelhakha napaqtek Eniapom Neten.

²⁷ Enenlhet metka nak nema akiaqtemenkeskama nak nekhatkok apkammelhakha apkeliahakho la ley, etlhenek hata apselhnanemmap judios apkellelto nak aknaikamok nema aliaqtemenkeskama nekhatkok apkellammelhakha, akietnema nhan ley apanko'ok, melieplavkeskama nhan.

²⁸ Have judio apanke aniem'o apteiaianlha ngkana'ak judios ankavek, aniem'o nhan nema akiaqtemenkeskama nekhatkok apkammelhakha.

²⁹ Koka judio apankek ma'a apto akietnema apvalhok malha akiaqtemenammalhka nekha tkok napaqtek Eniapom Neten aniem'o m'a Espíritu, have aniem'o henganemakha nak Moises. Ka enenlhet anak emok hata takha m'a Eniapom Neten, niekhe apkeltaknommap anak aniem'o enenlhet.