Romanos 12 - Nuevo Testamento Toba Maskoy

Apkelleltammakpelha etnangkok meliaskeiam anak

¹ Ketlhengkap elialheng'a, avanhek ankek apkeltakmelkeskeskama apkellangiemhaikama Eniapom Neten, ka ngkanek ntasek etnangkok malha apkennapekamok anak apnaqtoskama apkellaikamo na mota Eniapom Neten. Koka apkeliokha nak ketlhengkap akieplomo malha aphalhnanko'ok, metka aktemongveiakmo lhma nhan, nkolekkasama nhan apvalhok Eniapom Neten ma'a. Koka akto akietemo nkek eliavenkaskesama Apvesai'a m'a.

² Metnamo nkek aptaiangkolha nak meliamo nak Eniapom Neten, amanie nkek nkaimelhkak eliaqmongkasekhak mo'ok atlhenaikama apvalho'ok ketlhengkap, netamen nkovak hata nhan ma'a malha akiaqmoiekha na mo'ok apkellangiemhaikama. Netamen hata nhan ma'a nkovak apkeliangveiakmo aktaqmanma nkek aptemakha Eniapom Neten apmahai'elha, qaselha aleklemelha nak na apvalho'ok, qaselha aktaqmanma nkoie

³ Heiamelaiakmek ko'o Eniapom neten, heiangke lhta asientalhnemo kakpota alleltennasangkok ketlhengkap. Motlhenama nkek apvalho'ok apkellelto neten apankavek melhnemo m'a po'ok, ntasek koka elhnesok mo'ok atlhenaikama apvalho'ok metka aliekammalhka, aknangkolha la akvanlha meliaskeiam aniem'o apkellaikamok alhta Eniapom Neten.

⁴ Neniokha nak nlhaniek atlhelhma'ak, moklhem'a nkellana mota anmakmekama mankolhnemo mo'ok allanei'o qaselha.

⁵ Nnavek na ennengko'o niekhe nenlhamakma, koka nenlhamakho nengelelto nengelpasmekha aniem'o Cristo, nentangkokhek malha lhema neniokha.

⁶ Aktaqmanma nkek hengellanei'o Eniapom Neten ka nkeniemai'ak hengellaiangko lhta alpalhkammalhka nenmopvanka'a nenmakmekama. Enenlhet apto lhta aplhevai'a apmopvana eltennama aniem'o Eniapom Neten, ntasek eltennama akvanlha la nhan mei'askeiam aplhevai'a.

⁷ Enenlhet apto lhta aplhevai'a apmopvana etnek nema asennaikama, ntasek etnek aktaqmanma apmakmekama. Apto lhta nhan aplhevai'a apmopvana etlhekmoksek, ntasek eieplavkesek ma'a.

⁸ Enenlhet apto lhta nhan aplhevai'a apmopvana eiatekhok po'ok, ntasek na eieplavkesek ma'a. Enenlhet apto la hengaiangko niapom qaselha apankok, ntasek etnek metka apkenmeiavkesammakpo panke' qaselhaha. Enenlhet apto lhta nhan aplhevai'a apmopvana la malha apveske, ntasek etnek apiamo, aptaqmelkeskamo nhan. Apto lhta nhan aplhevai'a apmopvana epasmok apkellelto nak metka apkelletsekama, ntasek etnek akpaihekha mota apvalhok ma'a.

⁹ Ellasekhakpo metka apkeliennengkeskama po'ok, eltakneva' qaselha ngkolatsekama, elelieplavkes koka mota ellanangkok qaselha altaqmelo.

¹⁰ Ellasekhakpo pankave apieseksek ketlhengkap malha akto nak apkennemolhema apankave nak, ellaho po'ok, elelientemongkaso nhan apmanie po'ok qaselhaha.

¹¹ Metnamok apkel·halhemmap ellanangkok qaselhaha, eliennekho koka mota, elvaskap hata nhan ellasennama apveske engankok.

¹² Kolpaihekha ta mota apvalho'ok aniem'o alel·halhnekama apvalho'ok elvetak hata aktaqmanma. Neksa apkelvetai'a la akientalhnema, elel·halhen hata metka apkelpekheskama apkeleltemo elpasmok Eniapom Neten, elelmalhna ta mota metka nnelha m'a.

¹³ Etnamo ta mota apkenmahai'o elpasmok apkelpokkenammap metka nak apkelletsekama, enmamok hata mota takha amaika'a apankok la'a.

¹⁴ Meliematkesa nkek apkellelto nak apkenmenlhenaikama ketlhengkap, ntasek koka elleltok nkoltaqmelek apkellangiemhaikama m'a.

¹⁵ Kolpaihekho ta lhemek apvalho'ok apkellelto la alpaihekha apvalho'ok, eliapqalh hata nhan lheme' apkellelto la apiapqalhema.

¹⁶ Elienlhanmamok hata nhan ellanangkok metka akmaska apieseksek ketlhengkap, metnamo nkek apkellammakpo eltemeskasentak koneng metka nak apkelletsekama, ntasek koka elpasmekhak ma'a, metnamo nkek apketlhenammakpo apankavek nema apkeliangveiakmo.

¹⁷ Nnek hata nkek aknaqtevaso ketlhengkap, meliaqmongkasekha nkoie', ntasek koka elienlhanmanko mota eltok nkoltaqmelek apkellangiemhaikama po'ok.

¹⁸ Apkellapvankelha la'a, eteniamok hata apiempeiok ellanangkok metka akmaska napaqtavek aplhamakho enenlhet'avok.

¹⁹ Ketlhengkap elialheng'a, meliaqmongkasekha nkek meliamolhma apkellanei'o po'ok, Eniapom Neten hato ka eliaqmongkaskesekhak aptaiangkolha meliamolhma m'a. Lhnak nanek aptemak Eniapom neten: «Ko'o ta aietkeskesek apkeltemakha meliamolhma, aiaqmongkasekhak hata nhan aptakha m'a», lhna aptemak Apveske.

²⁰ Mek hata nkek nkaqhak apkammelhmakha lheiap, eniamok hata aptoma m'a, aknem hata nke nkaqhak, eniamok hata nhan iemmen ma'a, netamen ekposama ta napa'at ma'a aniem'o apmangkangvekha.

²¹ Meniangko nkek nkotneskasenta koneng maniamolhma nak, ntasek koka etneskasentak koneng lheiap ma'a aniem'o qaselha altaqmelo apkelanai'a lheiap.