Romanos 10 - Nuevo Testamento Toba Maskoy

Mankonmahai'a enmankok takha ania'a aktaqmanma ko israel

¹ Ketlhengkap elialheng'a, avanhe askeltemo elvongkesek tep Eniapom Neten ko israelitas, askelelmalhneskaske mota Eniapom Neten ma'a.

² Asiavek ko'o avanhek niekhe apkeleltemo ellasennama Eniapom Neten, koka meliohok aptangkolha akietemo nkek la'a.

³ Apteniangke mota aptaikamok apkelpeivomo apanko'ok apankavek, mankonmahai'ak eliekpelkok apto vanlha Eniapom Neten apkeltemeskeskama apkelpeivomo. Lhennenga aktemakha aklhenaikama apvalhok etnehek ma'a, koka mankonmahai'ak enmankok takha ko israelitas.

^4-5 Aplheianmek nak nanek Moises aktemakha antek nempeivomo aniem'o ley, lhnak nanek aptemak: «Enenlhet apto la apkeliehekho ley anak, elloka ta mota aniem'o m'a ley anak», lhna aptemak ma'a. Koka ngvaiakme nnelha m'a apvai'o Cristo, kolhva koka apvanka'ak etnangkok apkelpeivomo meliaskakmo la m'a.

⁶ Lhna nnema aktemo antek nempeivomo aniem'o mongiaskeiam hengke'e: «Molheng apvalhok sek la enenlhet eniakhak neten kakpota eiantementak nalhepop Cristo.

⁷ Molheng na apvalhok sek la enenlhet evaiventak malhek konne kankek kakpota elekvakhak Cristo apieseksek apkeletsepma», lhna nnema aktemo.

⁸ Ka ntemak na aktalhesammalhka vakkahak Eniapom Neten apaivoma hengke'e: «Nengaqtek lheiap nnak Eniapom Neten apaivoma, akieto apatong kanhan apvalhok» Hai', ka ania'a nak hentemeskeskama mongiaskeiam neleltennaseiangka nak ennengko'o.

⁹ Enenlhet aplheno la Jesús apto Apveske, mankoiaskakmo la nhan apvalhok aplhatekhangveiam apieseksek apkenmaskengvaiakmo aniem'o Eniapom Neten apmopvana, hata evongkasakpok tep enenlhet anak ma'a.

¹⁰ Hai, nkaimelhkek mankoiaskamek apvalhok kakpota ngkolhek aktemeskeso apeivomo. Nkaimelhkek na etlhenek Jesús apto Apveske kakpota evongkasakpok tep.

¹¹ Ka ntemak aktalhesammalhka Vakkahak Eniapom Neten apaivoma: «Enenlhet apto la mei'askeiam Eniapom Neten, meiennengkesek hata nhan ma'a», ntemak ma'a.

¹² Koka aplhamakho enenlhet'avok ma'a judios kakpota nhan griegos, apnavek po'ok napaqtek Eniapom Neten, apto Apveske takhaplhet'ok enenlhet'avok lhmankek ham. Nema apketsekama Eniapom Neten, nietnek lhema qaselha kakpota eniangkok apto la apkeltaikama apvesai'a m'a.

¹³ Hai, aplhamakho apkellelto la apkelleltaikama apkelvenekama apvesai'a m'a, elvongkasakpok hata tep.

¹⁴ Koka melvenama ta m'a apkellelto la apkeliaskeiam, mankovhek na aptaikamok la meliaskeiam melleng'o la m'a ania'a aktaqmanma aklhenammalhka apieseksek ma'a. Melleniek hata nhan ania'a aktaqmanma metko la enenlhet apkeleltennasekama apieseksek ma'a.

¹⁵ Mamma ta nhan enenlhet emhangkok ma'a eleltennasama ania'a metko la nema apaskama. Ka ntemak na aktalhesammalhka Eniapom Neten apaivoma: «Ntasek anke ngkotnek ma'a apkelvo'o la apketsekama ania'a aktaqmanma», ka ntemak.

¹⁶ Koka have aplhamakho apkelleliehekho ania'a aktaqmanma, lhna ntemak na aktalhesammalhka vakkahak Isaias: «Apveske, apkanetek enenlhet aptaikamok meliaskeiam aktemakha netlheianma», lhna aptemak apkeltennasemmap ania'a Isaias.

¹⁷ Amanie sekhek ellailhok ania'a aktaqmanma, netamen ma'a nkovak meliaskeiam Eniapom Neten apaivoma.

¹⁸ ¿Ma nlho ellengai'a niekhe ania'a, he? Mma', apkellengai'a niekhe have niapak ankek aplhamakho apankavek ania'a, ka aktemo nak aktalhesammalhka Vakkahak Eniapom Neten apaivoma hengke'e: «Ka apkelpaqmetekama nak apkelleltennasemmap ania'a ntepkek lhamakho eiempek, kanhan aktakha nnelha nkek lhepop ngvakmek ania'a m'a»

¹⁹ ¿Ma nlho eliangveiakmo ko israelitas ma'a, he? ¡Mma', have niapak apkeliangveiakme niekhe! Lhnak nanek aptemak Moises apmanie nke': «Atneskesek hata hennathaikama askeliokmo ta po'ok temma meiaspommap anak, atneskesek hata nhan apkelloma hellanei'o po'ok temma metka apkeliangveiakmo nak»

²⁰ Lhnak na nek na aptemak Isaias metka apkai'a: «Helvetakhe lhta apkellelto nak manghelketansema, askelvetaskesalhke lhta nhan ehenke' apkellelto nak melelmalhnengvaiam alhma asvesai'a»

²¹ Koka lhnak nanek na aptemak Isaias apketlheianmo aptaiangkolha ko Israelitas: «Skelpeiveske niekhe ehektengok takhaplhet temma nak enenlhet'avok meleliehekho nak kanhan hellammelhaikama nak», lhna aptemak ma'a.