Marcos 8 - Nuevo Testamento Toba Maskoy

Jesús apkellaikamok aptekamok enenlhet apentalhnema

¹ Lhema aknem na ntemak ma'a apkaqnekho apentalhnema enenlhet apnakha Jesús, mamma lhnak aptekamok ma'a. Ka apkellaveiangka lhnak apkeltamesaikamok ma'a, lhna aptemak apkellanemo:

² —Mamma aptekamok enenlhet'avok anak, askelietnavek ko'o napaqta'a, hanetolhem'a aknem antak helieplekamaha.

³ Ka askelapaso la apkakhaiangkelha metka aptaveikokha, nkolieihek kelha lhma amai, taiepek ankek apkakhaiangkelha napokha —lhna aptemak Jesús.

⁴ Ka apkellatemmoiangka lhnak ma'a apkeltamesaikamok, lhna aptaiangkok: —¿Ko la angelvetangvomok aptekamok enenlhet'avok anak? Mamma temma nke'e —lhna aptaiangkok.

⁵ Ka apkelelmalhneiangka lhnak Jesús: —¿Se lha pan apnangko ie, he? —Siete —lhna aptaiangkok ma'a.

⁶ Netamen Jesús apkeltemo lhnak eniakhangkok nalhepop enenlhet'avok, apkenmamo lhnak 7 pan, ka aptemo lhnak na gracias Eniapom Neten. Ka apkeliaptemo lhnak ma'a, apkellaiangko nhan apkeltamesaikamok kakpota ellangkok enenlhet'avok ma'a.

⁷ Nnaiangkek nak na moklhem'a kelasma atko'ok, aptemo lhnak na mokhom gracias Eniapom Neten, apkellaiangko lhnak apkeltamesaikamok kakpota ennaskangkok mokhom ma'a.

⁸ Ka aptoiangko lhnak akvakmo apkeliaqkanakmo, apkellankesekho lhnak na 7 iama posak alaimommalhka.

⁹ Malha lhnak 4.000 enenlhet'avok ma'a. Netamen aptemo nhan akpaiveskekha' apkellanei'o enenlhet'avok Jesús ma'a, ka apkelieniekho m'a.

¹⁰ Apkanetvekho loma nemmen, apkeltamesaikamok koka apketlhelhma'ak ma'a, apkenmeiekho iokhalhma Dalmanuta.

Fariseos apkeleltemo elanak Jesús qaselha mongenatkeskama

¹¹ Apkelvekhek nak na Fariseos ma'a, apkellatemmommakpek nak Jesús. Ka apkeleltemo lhnak elanak qaselha mongenatkeskama m'a kakpota eltemeskesek iokhalhmek ankek apkeniem'o Eniapom Neten, koka apkeleltemavek na niekhe eliepkonek Jesús ma'a.

¹² Nlhengamavek nak apneniek Jesús ma'a, lhna aptemak apkellanemo: —¡Se lha ntak helelmalhnengka nak alanak qaselha mongenatkeskama, momak'ak alana! —lhna aptemak Jesús ma'a.

¹³ Ka apkelieniekho lhnak Jesús ma'a, apkanetvakho lhnak mokhom loma nemmen, apkenmeiekho lhnak mo'ok nekha alvata m'a.

Hengetlhekmoskama fariseos malha harina apiepheskama

¹⁴ Apkelelvangkaiakmo lhnak apkeltamesaikamok elletsakhak aptekamok, vanlha lhnak lhema phapak pan.

¹⁵ Ka apkellaskamo lhnak Jesús ma'a, lhna aptemak: —¡Ellaho ta malha harina nak apiepheskama apanko'ok anak Fariseos kakpota nhan Herodes! —lhna aptemak.

¹⁶ Ka apkelpaqmetkesammakpo lhnak mok apankavek ma'a, lhna aptaiangkok: —Kelha aplhenak mangeletsantamo nak pan —lhna aptaiangkok.

¹⁷ Apiamavek noka Jesús aktemakha apkelpaqmetkesammakpo mok apankavek ma'a, lhna aptemak apkellanemo: —Molhe nak ko'o pan apanke nak, meliehek ketlhengkap, malha metka apqatko'ok la'a.

¹⁸ ¡Apaqto'ok aniekhe nnak ketlhengkap man koka elvetak qaselha! ¡Apaiko'ok anna niekhe ketlhengkap, mang koka ellengai'ak! Kotlheianvakho no apvalho'ok

¹⁹ askennasko lhta 5 pan apieseksek malha 5.000 enenlhet'avok. ¿Se lhta iama posak aklhatmommalhka akiekangvakmo m'a ie, he? —lhna aptemak. Ka apkellatemmoiangka lhnak apkeltamesaikamok: —12 iama posak alhta nkeliekangvakmok ma'a —lhna aptaiangkok.

²⁰ Lhna aptemak mokhom Jesús: —Kotlheianvakho nhan apvalho'ok askennasko lhta siete pan apieseksek malha 4.000 enenlhet'avok. ¿Se lhta nha iama posak aklhatmommalhka akiekangvakmo m'a ie, he? Ka apkellatemmoiangka lhnak mokhom apkeltamesaikamok: —Siete lhta.

²¹ Netamen lhna aptemak Jesús: —¡Manak eliangveiakmok mokhom ketlhengkap! —lhna aptemak.

Jesús aptaqmelkeskaiam metka apaqto'ok akieto Betsaida

²² Netamen apkelvekho lhnak na temma Betsaida, apkeliantemekho lhnak metka apaqto'ok apnakha Jesús. Apkellapiosemmakpek nak apkeleltemo emangvomok Jesús ma'a.

²³ Ka apmamo lhnak Jesús apmek metka apaqto'ok, aptepkeskamo lhnak na temma m'a, apiantemekho lhnak mo'ok nekha m'a. Ka apkelhpakhai'o apiemanong Jesús apaqto'ok enenlhet anak, apnengkanmo lhnak na apmeiok takhaplhet ma'a, apkenmalhneiangka nhan, lhna aptemak: —¿Apvetakhei'e lhma, he? —lhna aptemak Jesús.

²⁴ —Nkama niekhe, asvetekha lhma malha iamet koka aptangkokhak askellan'o enenlhet apketlhengakha nak —lhna aptemak apkatemmoiangka m'a.

²⁵ Apnengkanmo lhnak mokhom apmeiok Jesús takhalhet apaqto'ok, ka altaqmelekho lhnak ma'a, apkelvetai'o nhan lhamakho qaselhaha.

²⁶ Netamen Jesús lhna aptemak apkanemo: —¡Metaqho nkek mokhom natemma lhkek, etaqhekha ta apnemakha! —lhna aptemak Jesús ma'a.

Pedro aplheianma Jesús apto Cristo

²⁷ Jesús kakpota nhan apkeltamesaikamok apkenmeiekho lhnak po'ok temma akvesai'a Cesarea akieto Filipo. Neksa apketlhengama lhnak apkelelmalhneiangka apkeltamesaikamok, lhna aptemak: —¿Ko la aptaiangkelha hetlheianmo ko'o enenlhet ma'a, he?

²⁸ Ka apkellatemmoiangka lhnak ma'a, lhna aptaiangkok: —Moklhem'a enenlhet apketlheianma lheiap Juan apkellavkeskama iemmen na niapom. Napokha enenlhet apketlheianma nhan Elias apkeltennasemmap ania'a annenga, moklhem'a nhan apketlheianma lheiap apto apkeltennasemmap ania'a annenga —lhna aptaiangkok apkellatemmoiangka m'a.

²⁹ —Ketlhengkap na, ¿se lha ko'o ie, he? —lhna aptemak. Ka apkatemmoiangka lhnak Pedro m'a: —Cristo lheiap —lhna aptemak.

³⁰ Netamen Jesús lhnak aptemak apkellaskamo apkeltamesaikamok: —¡Meleltennasama nkek enenlhet ania'a nak! —lhna aptemak.

Aplheianma Jesús ematong hata

³¹ Netamen Jesús apkeleltennaseiangka lhnak apkeltamesaikamok akmak'akha ta ngkotnek apkaniemhaikama, lhna aptemak: —Nkaimelhkek ennangkok akiavai'a nkek akientalhnema Enenlhet Apketka nak, eltaqhesok hata apkelemhama apmaniaie', kakpota nhan apkelemhama apmaniaie' sacerdotes, kanha escribas. Ellaqhek hata m'a, hanetolhema aknem hato ka nkotnehek, elhatekhangvomok mokhom —lhna aptemak.

³² Iokhalhmek ankek na ntemak aktemakha apaivoma m'a, ka apiantamo lhnak Pedro Jesús aplhepkennenga tep atketse, apkeltemo elaneskasekho akietnaikama apaqtek ma'a.

³³ Ka apengkammakpo lhna neptamen Jesús ma'a apmeiekho apkelaknangkelha apkeltamesaikamok, apnaveskamo lhnak Pedro m'a, lhna aptemak: —¡Konie Satanas! Mangkolhnok akietnaikama apaqtek anak lheiap Eniapom Neten, enenlhet apankek akietnaikama apaqtek lheiap —lhna aptemak Jesús.

³⁴ Ka apkellaveiangka lhnak Jesús apkeltamesaikamok kakpota nhan enenlhet'avok, lhnak aptemak apkellanemo: —Enenlhet akleko la apvalhok etnehek heieplekamaha, nkaimelhkek metnek apmak'akha la etnehek. Epatmekhak na malha iamet aktenneskama apankok, heieploma nhan ko'o.

³⁵ Enenlhet apto la apmahai'a evongkasakpo pankek tep apiokhoho, emaskengvomok hata m'a. Koka enenlhet apto la meniommakpo pankek apiokhoho aniem'o heieplekama kanhan apmama takha ania'a aktaqmanma nak, evongkasakpok hata tep ma'a.

³⁶ Aqhemo koka eniankesangkok apketsekama, aktemongvakmo la nnelha apkaniemhaikama.

³⁷ Mankapvankek na emok akianmoma patakkom akiennaktema apneniek.

³⁸ ¡Ellailhono! Menmangkankek hetlhenek ko'o apkelvakho ta napaqtavek enenlhet apkellanekamok anak ngkollatsekama kanhan apkelleliasepkasekama nak. Koka apkenmangko la hetlhenek asvesai'a ko'o, Enenlhet Apketka nak emangkak hata nhan etlhenek apkelvesai'a ketlhengkap apvaktamo ta akieplomo apmopvana apkaikamok aniem'o Apiapom ma'a, ángeles apkelpokkanma hato ka apketlhelhma'ak ma'a —lhna aptemak.