Marcos 7 - Nuevo Testamento Toba Maskoy

Qaselha akpaisengkeskama engvalhok

¹ Lhema aknem na ntemak ma'a, apkeliavei'o lhnak apnakha Jesús moklhem'a fariseos kakpota nhan escribas apkelleniem'o Jerusalen.

² Apkeliematkesaiangka lhnak apkelvesai'a apkeltamesaikamok ma'a ngkanek aptoiangko pan neksa alpaiseiam apmeio'ok, metka apkel·hatsosaikamok na apmeio'ok iemmen.

³ Lhna songke ntemak Judios kakpota nhan Fariseos apkelieplavkeskamo lhna mota apkellanemmakpelha etnangkok apkelvaneiam. Apkeltakmelkeskamavek nak apkelieniesekamok apmeio'ok kakpota etavokhak ma'a.

⁴ Lhnak apkeleniakto la kelhakhama aptoma, apkelienieseiangkek nak na sekhek aptekamok kakpota nhan el·hatsosekha av'alho'ok nohaikok, aphak kakpota nhan apkeltanema, lhna ntemak apkeltemakha m'a.

⁵ Lhna nkeniemai'ak elelmalhnama Jesús ma'a, lhna aptaiangkok —¿Se lha ntemak apkeltamesaikamok anak lheiap melvaneiangko nellanemmalhkelha mota antangkok aniem'o apkelvaneiam, he? Metka apkeltakmelkeskamo apkelieniesaikamok anak apmeio'ok aptavokho la'a —lhna aptaiangkok ma'a.

⁶ Ka apkatemmoiangka lhnak Jesús ma'a, lhna aptemak: —¡Hengiennengkeskama niapma'ak ketlhengkap! Have niapak anke apketlheianmo lhnak nanek Isaias annenga ketlhengkap: «Apkeltaikama apankek heleliehekho enenlhet'avok anak, mok apatno'ok koka, taiepe koka nhan aknangkolha apvalho'ok.

⁷ Aqhemo hellai'o ngkanek apketlhekmosekamok henganemakha aniem'o enenlhet», lhnak na nek aptemak Isaias annenga m'a.

⁸ Have niapak ankek aptemakha nak aplheianma m'a, apkelhakhangkek ketlhengkap henganemakha aniem'o Eniapom Neten, koka apkelieplavkeskamak ma'a apkellanemmakpelha mota etnangkok aniem'o enenlhet.

⁹ Apkeliekai'ak henganemakha Eniapom Neten, apkelieplavkeskangkek apkellanemmakpelha etnangko mota apanko'ok apankavek.

¹⁰ Lhnak na nek aptemak Moises apketlhekmoskamo m'a: «¡Eniaho ta apiapom kanhan ngken! Koka aptevaso la alvesai'a ngkana'ak, ematnekhak hata m'a», lhnak nanek aptemak Moises.

¹¹ Koka apketlhekmoseiangke mota nhan ketlhengkap enenlhet ntasek eltehek ellana ngkana'ak, ka aptangkok heng: "Mongapvankek alpasmok ketlhengka', ngkanek aspokkenkaskek qaselha ehenkok akvesai'a Corban kakpota angvangkok Eniapom Neten".

¹² Ka aptaiangko mota ketlhengkap ma'a apketlhekmoseiangko enenlhet mankaimommalhkak elpasmok ngkana'ak ma'a.

¹³ Apkeltemeskesakhek koneng anke henganemakha aniem'o Eniapom Neten, koka apkeltemeskesakhek neten anke ma'a apkellanemmakpelha na mota etnangkok apanko'ok apankave'. Mantek na mo'ok qaselha ngkollatsekama apkellanekamok ketlhengkap —lhna aptema Jesús

¹⁴ Ka apkellaveiangka lhnak Jesús apentalhnema enenlhet, lhna aptemak apkellanemo: —¡Eltaqmelkaso no apkellailhemo kakpota eliangvomho!

¹⁵ Akto alentalhnema qaselha apatong enenlhet, have akpaisengkeskama apvalho'ok. Koka m'a, lhamakho qaselha nak ngkolatsekama alenteiapma apatong enenlhet, ka akpaisengkeskeskama apvalho'ok ma'a —lhna aptemak.

^16-17 Netamen apkelieniekho lhnak Jesús enenlhet'avok ma'a, aptalhnengvekho lhnak konne pa'at ma'a. Ka apkeleltemo lhnak elpeiveskasekhak apkeltamesaikamok aktemakha apketlhekmoskama.

¹⁸ Lhna aptemak Jesús apkellanemo m'a: —¡Ketlhengkap na meliohok mokhom! Akto nak alentalhnema apatong enenlhet have akpaisengkeskama apvalhok.

¹⁹ Mangkavanke nkoklhek apvalhok enenlhet ma'a, vanlha koka ntalhnak ma'a apvakmo nak netamen ma'a eiaqnek —lhna songkek aptemo Jesús ma'a ngkanek lhamakho nentoma allelto alalhnai'o.

²⁰ Aplhengkeskangkek nak Jesús apkelpeiveskasekha m'a, lhna aptemak: —Koka akto have niapak anke' alpaisengkeskama apvalho'ok enenlhet lhamakho qaselha ngkollatsekama alenteiapma.

²¹ Ka kto nak ma'a atlheianma nak apvalho'ok ngkollatsekama, apkenmensangveiam alhma', apkenmenielhma', apkaqhema po'ok.

²² Aptevaskama aliemhapma, apvannaikamok qaselhaha, apkeltaiangkolha ngkollatsekama, apkenmopvanka ania'a, apiaspongkomakha panke' ngkolatsekama. Apnathaikamaha nhan, apkenmaikama ania'a, apkammakpoho, meihangveiakmo lhma nhan.

²³ Ka aklhamakho qaselha ngkollatsekama nak allenteiapma apvalho'ok enenlhet, ngkelpaisengkaskek na apvalho'ok ma'a —lhna aptemak Jesús.

Ngkelvana ngkotno judia mangkoiaskeiam Jesús

²⁴ Netamen Jesús apmeiekho lhnak iokhalhma Tiro, aptalhnengvekho lhnak konne pa'at. Apkeltemavek na niekhe eielhakpok kakpota melvetiek enenlhet'avok ma'a, koka mang na nkomopvanak ma'a.

²⁵ Nlengai'ak nak ania'a lhema ngkelvana apvaiam Jesús ma'a, atka lhnoka akmaikama kasekapok av'alhok akpaiseiam. Akmeiekho lhnak apnakha m'a, alpalengvekho lhnak akieto apkammelhakha.

²⁶ Ka ngkelvana nak ma'a lhna nkeniemai'ak Grecia, iokhalhma akvesai'a Sirio Fenicia, nkaiosekama lhnak ngkelvana alanei'o Jesús altemo elentepkeskesek keliaqhameio av'alhok atka m'a.

²⁷ Lhna aptemak Jesús apkanemo m'a: —Ntasek sekhek etavokhak apmaniaie aptekamok apketkak anak, mangkolatsema al·hatsoskasekha aptekamok apketkak kakpota allangkongvomok semhetko'ok —lhna aptemak Jesús ma'a.

²⁸ Ka atemmoiangka lhnak ma'a, lhna ntemak: —Apveske, have niapak aptakha nak lheiap, koka ntavengkek na semhetko'ok ma'a akpalleiam la koneng mesa aptoma otep —lhna ntemak ngkelvana m'a.

²⁹ Koka lhna aptemak Jesús apkanemo: —Hai', nietavek aktakha nak akpaivoma lheia', kotaqhekha aknemakha metka aktaikama av'alhok, ntepkek kasekapok av'alhok atka lheia' —lhna aptemak Jesús ma'a.

³⁰ Ka aktaqhekho lhnak aknemakha, akvetangvekho lhnak atka takhalhet akietnemakha m'a, nteiapmek nak kasekapok av'alhok, ntaqmelekhek nak ma'a.

Jesús aptaqmelkeskaiam lhema enenlhet metka apaiko'ok, kanhan akientalhnema apalhkok eliatamaha

³¹ Apteiapmek nak mokhom ma'a Jesús iokhalhma Tiro, apiekangvekho lhnak iokhalhma Sidón, apmeiekho alvata akvesai'a Galilea, akieto m'a konne iokhalhma akvesai'a Decapolis.

³² Ka apkeliantemaiakmo lhnak lhema enenlhet mennai'a lhma m'a, akientalhnema nhan apalhkok eliatamaha', apkeleltemo lhnak enengkenek apmeiok takhaplhet ma'a.

³³ Ka apiantamo lhnak aplhepkennenga Jesús enenlhet ma'a, apkelatkeskamo lhnak apopheiok konne apaiko'ok. Netamen apkeliaskeso lhnak na apiemanong apopheiok, apmangveiakmo lhnak apalhkok enenlhet nak ma'a.

³⁴ Ka apkammelhmo lhnak neten, aptepkeskamo lhnak apkamnoma, lhna aptemak: —¡Efata! Neltema, ¡konmaihekha!

³⁵ Kolhvavek ankek nak nkenmaihekhak apaiko'ok ma'a, aktaqmelekho lhnak na apalhkok kanhan apkeliatekama.

³⁶ Netamen nak ma'a apkeleltennaskamavek nak Jesús enenlhet'avok melpaiaksek ania'a aktemakha apkelvetai'a m'a, koka apkeliangveskaiakmek nak ania'a m'a.

³⁷ Avanhek ankek nak alpelapkeskama apkellengai'o ania'a enenlhet'avok ma'a, lhna aptaiangkok: —¡Ntasek anke nak apkelanai'a lhamakho qaselha, apkeltakmelkasakhe nak enenlhet'avok mellengai'a na lhma, kakpota nhan metka apkelpaqmeiasma! —lhna aptaiangkok enenlhet'avok ma'a.