Marcos 3 - Nuevo Testamento Toba Maskoy

Jesús aptaqmelkeskaiam enenlhet akiaqsekha apmek aknem nennekhelha

¹ Aptalhnengvekhek nak mokhom Jesús apkaqnekhelha judios, apnengkek nak na lhema enenlhet akiaqsekha' apmek ma'a.

² Nnengkek nak aliaskamo Jesús ma'a kakpota ngkolhek akvetangko aptaqmelkeskaiam enenlhet anak kakpota elhenakpok apiekai'a aknem sabado nennekhelha.

³ Lhna aptemak Jesús apkanemo enenlhet akiaqsekha apmek: —¡Etnemekha neten, etnengvatamo halep, aiseksek anak! —lhna aptemak.

⁴ Netamen apkelelmalhneiangka lhnak enenlhet'avok, lhna aptemak: —¿Ngkeltemengke nlho ley Moises angellanak qaselha altaqmelo aknem sabado nennekhelha, nlho ka la ngkollatsekama, he? ¿Ngkeltemengke nlho nhan ley Moises angvongkesek tep lhema enenlhet, nlho ka la nhan antevaksek enenlhet aknem nennekhelha la sabado, he? —lhna aptemak. Apkelvanmongkek noka enenlhet'avok ma'a, mang noka nkonmahai'ak ellatemmoma m'a.

⁵ Nnatheskangkek nak Jesús, aiosek na ntemak apvalhok apvetai'o aliennaktema apvalho'ok enenlhet'avok ma'a, lhna aptemak apkanemo enenlhet akiaqsekha apmek ma'a: —¡Epeivesekha no apmek! —lhna aptemak. Apkasekhai'avek nak, ka aktaqmelekho lhnak apmek ma'a.

⁶ Netamen nak ma'a apkelenteiapmo lhnak nemaknekhelha Fariseos ma'a kakpota nhan Herodes apkelieplekama, apkellanekhek nak na ania'a kakpota ennapok Jesús.

Aplhamakma enenlhet apkelieplekha Jesús neiava' alvata akiavai'a

^7-8 Apmeiekho lhnak Jesús kakpota nhan apkeltamesaikamok neiava' alvata. Apkelieplekhek nak na apentalhnema enenlhet'avok ngkanek apkeliamavek nak aptemakha Jesús nlhaniek na mota qaselha apkelanai'a m'a. Lhnak apkeleniem'ak iokhalhma Galilea, Judea, natemma Jerusalen, Idumea, aktepakha aknem akieto alvata' Jordán, iokhalhma Tiro, kakpota nhan Sidón.

⁹ Ka apkeltemo lhnak Jesús elpeneskasok apkeltamesaikamok lhema loma nemmen akiavai'a kakpota enianantek ma'a, mannak eltemo eliaqhapemmak enenlhet'avok ma'a.

¹⁰ Aplhaniek na songke anmaska apiempeiok apkeleltemo enmangvomok ma'a, apkellengai'ak nak na songke apkeltaqmelkeskaiam enenlhet ma'a.

¹¹ Neksa alvetai'a lhnak kasekapok av'alho'ok alpaiseiam Jesús ma'a, alentankesentamo lhnak nalhepop enenlhet'avok napaqtek ma'a. Ngkelpaihekama lhnak na atno'ok ma'a, lhna antaiangkok: —Eniapom Neten Apketka lheiap —lhna ntaiangkok ma'a.

¹² Ka apkeliennai'o lhnak Jesús kasekapok av'alho'ok alpaiseiam ma'a, apkeltemavek nak na mangkotlhenek apvesai'a m'a.

Apkeliekieskama Jesús 12 apkellapaskamo mota

¹³ Netamen nak apkanetvekho Jesús neten metaimong akhaiam, apkelieplekhek nak na enenlhet ma'a. Ka apkeliekieskamo lhnak na enenlhet akleielha la apvalhok,

¹⁴ apvakmo 12 kakpota etnangkok apketlhelhma'ak. Ellapaksek na eleltennasangkok ania'a aktaqmanma alhma nkek ham.

¹⁵ Ka apkellaiangko lhnak na apkenmopvanka m'a kakpota elentepkasangkok kasekapok av'alho'ok.

¹⁶ Ka apkelvesai'a lhnak 12 hengke'e: Simon, aptemeskesekho lhnak apvesai'a Pedro.

¹⁷ Jacobo kakpota nhan apialheng Juan, Zebedeo apketkak nak ma'a, apkeltemeskasekho lhnak apkelvesai'a Boanerges, nema altema apkelhtenioma atkak.

¹⁸ Andres kakpota nhan Felipe, Bartolome, Mateo, Tomas, Santiago Alfeo apketka, Tadeo, Simon apto cananeo,

¹⁹ kakpota nhan Judas Iscariote apto apselhnanekha aptaiangkelha aplhelhma nengaqtek ankek Jesús.

Aplhenammap ngkolatsekama Jesús

²⁰ Aptalhnengvekhek nak Jesús lhema pa'at ma'a, ka apkanvei'o lhnak na enenlhet'avok apentalhnema m'a. Mang nak nkomopvanak etavekha Jesús kakpota nhan apkeltamesaikamok ma'a.

²¹ Allengai'o lhnak ania'a apkennemolhema apankek Jesús ma'a, aleltaiangko lhnak malha anema m'a. Ka anmeiekho lhnak apnakha kakpota nkolaqlosengvakhak ma'a.

²² Apkakhaiangkek nak na moklhem'a escribas ma'a apkelleniem'o Jerusalen, apkelmaleniosemmakpek nak ma'a, lhna aptaiangkok: —Amhama amanie kasekapok av'alhok akvesai'a nak Beelzebu aikamok apmopvana Jesús kakpota eniapvanak elentepkesek altemo lheme nak ma'a —lhna aptaiangkok.

²³ Ka apkeltemo lhnak Jesús elteteskak escribas, apkeleltennaseiangka lhnak na lhema apietkeskama m'a, lhna aptemak: —Mankonnapalhkek Satanas altemo lhemek la'a.

²⁴ Ka akto nak na lhema iokhalhma la'a apkennapekpo la apankavek ma'a, enaqtevasakpok hata apankavek ma'a.

²⁵ Ka kto nak na m'a apkennemolhema apanke nak apketkak apkennapekpo la apankavek ma'a, enaqtevasakpok hata nhan apankavek ma'a.

²⁶ Nnavek na m'a Satanas annapelhko la m'a altemo lhemek, nkonaqtevasalhkok hata nha nkavek ma'a, nkomaskok hata nhan aknema akmovana m'a.

²⁷ ¿Se lha enenlhet mannemo la apiennaktema ie kakpota eklhek apnemakha enenlhet na apiennaktema, emenielhkesek qaselha apankok, he? Vanlha koka enenlhet akietno la neten apankek apiennaktema, apvankek sekhek elpelhketek ma'a kakpota enmenielhkesek qaselha apankok ma'a.

²⁸ Have niapak ankek astakha nak, Eniapom Neten hata etneskesama apankek ngkollatsekama apkellanekamok, kakpota nhan apkelpaqmetekama nak ngkollatsekama.

²⁹ Koka metneskesama apankek ma'a apnaqtevaskama nak apvesai'a Espíritu Santo, ka heng enenlhet anak ngkotnek hata apselhnanemmap metka nnelha'

³⁰ —lhna aptemak Jesús ma'a lhna songkek fariseos apkeleltaiangko lhnak kasekapok av'alhok akmaikama Jesús.

Ngken kanhan apkelialheng'a Jesús

³¹ Neksa apkeltennaikama lhnak Jesús ma'a, akvekho lhna ngken kakpota nhan apkelialheng'a apnakha m'a. Aptek pa'at nak nkelanvai'ak ma'a, alleltemo lhnak ngkolhek altennaskakho Jesús ma'a kakpota enielhiemok sekhe'.

³² Apvakhei'avek noka apkakhaikamok enenlhet apnakha Jesús ma'a, ka apkeleltennaskamo lhnak ma'a, lhna aptaiangkok: —Ngken nak lhek ngketamak lheiap kanhan apkelialheng'a —lhna aptaiangkok ma'a.

³³ Ka apkatemmoiangka lhnak Jesús ma'a: —¿Se lha ko meme ie kanhan elialheng'a? —lhna aptemak.

³⁴ Apkelanei'avek nak neksa apkakhaikamok enenlhet'avok kanhan ngkelvana'ak Jesús ma'a, lhna aptemak apkellanemo: —¡Tokha la ko'o malha meme kanhan elialheng'a enenlhet'avok anak hengke'e!

³⁵ Enenlhet apto apkasekhai'o Eniapom Neten kakpota nhan ngkelvana'ak, koka elialheng'a m'a kakpota nhan meme —lhna aptemak Jesús apkellanemo m'a.