Marcos 15 - Nuevo Testamento Toba Maskoy

Jesús apvekha napaqtek Pilato

¹ Mmopeiakmek na lhma' atsai'a m'a, apkaknekho lhnak apkelemhama apmaniaie sacerdotes, metno apketko'ok, escribas kakpota nhan aplhamakho apkelientalhnakha apkelveskaie'. Apkelpaqmetkesammakpo apketlheianmo apkenmahai'akha eltemeskesek Jesús ma'a, ka aknaqtetemmalhko lhnak apmeiok Jesús, apkeliantemekho lhnak napaqte apveske Pilato m'a.

² Netamen apkenmalhneiangka lhnak Pilato Jesús ma'a, lhna aptemak: —¿Have nlho niapak lheiap apiav'akha apveske apanko'ok judios, he? —lhna aptemak. —Aplhengkek lheiap —lhna aptemak Jesús ma'a.

³ Koka apkelemhama apmaniaie sacerdotes apkelpeskeiakmek nak ngkeskama qaselha ngkolatsekama mota apkelanai'a Jesús.

⁴ Lhna aptemak Pilato apkanemo mokhom Jesús: —¡Eniatemmoma no aplhenammap lheiap!

⁵ Mang noka eniatemmoikama Jesús ma'a. Niemaskangkek nak apvalhok Pilato apvetai'o meniatemmoiangka m'a.

Enenlhet apkeleltemo ellaqhek Jesús

⁶ Neksa aktaqmelaikama lhma lhnak Pascua m'a, aptemakha lhna mota Pilato ellanhok enenlhet apkenmak'akha la etneskesangkok ellanhok ma'a kakpota epaqnemekha lhema apkaqlhengkasemmap la'a.

⁷ Apnengkek nak na lhema enenlhet nengaqlhengkasemmalhkelha m'a apvesai'a Barrabas kakpota nhan apketlhelhma'ak, apkennapmo lhnak enenlhet neksa apkelammelhammap apkennapommap ma'a.

⁸ Ka apkelvekho lhnak enenlhet apnakha Pilato m'a, apkeleltemo lhnak etepkasekhak lhema enenlhet apkaklhengkasemmap, aptemakha lhna mota Pilato m'a.

^9-10 Apiamavek noka Pilato apkelemhama apmaniaie sacerdotes apkeliantemekho Jesús apnakha ngkanek apkeliasepkeskama lhna songkek ma'a. Lhna nkeniemai'ak apkelelmalhneiangka enenlhet'avok ma'a, lhna aptemak: —¿Apkeleltave nlho ketlhengkap apaknemekhak apiav'akha apveske apanko'ok judios, he? —lhna aptemak.

¹¹ Koka mang nak eleltemok enenlhet'avok ma'a, lhna songkek na apkelemhama apmaniaie sacerdotes lhnak apkelpaqmetkesaiangkok ma'a kakpota ngkolhek akpaknemakho Barrabas.

¹² Netamen Pilato apkelelmalhneiangka lhnak mokhom enenlhet'avok: —¿Ko la apkeleltakha atnek ko'o alanho enenlhet anak apketlheianmo na mota ketlhengkap apiav'akha apveske judios? —lhna aptemak.

¹³ —¡Eliaqlha ta apmeiok kakpota nhan apmankok neten iamet aktenneskama! —lhna aptaiangkok enenlhet'avok ma'a.

¹⁴ Koka lhnak aptemak Pilato: —¡Metkokha la apkelanai'a qaselha ngkolatsekama enenlhet anak! —lhna aptemak. Mang nak elleskamak apiapqalheiangka enenlhet'avok ma'a, lhna aptaiangkok: —¡Eliaqlha ta apmeiok kakpota nhan apmankok neten iamet aktenneskama ham! —lhna aptaiangkok ma'a.

¹⁵ Ka apaqnemekho lhnak Pilato Barrabas, apkeltemo lhnoka ngkolhek aliakpelhketangka kaselha aiempek nema alanai'a Jesús ma'a, kakpota nhan ngkolhek aliaqlho apmeiok, apmankok neten iamet aktenneskama. Koka apkeltemavek nak ellamelekhok Pilato napaqtavek enenlhet'avok ma'a.

¹⁶ Netamen nak ma'a apkeliantemekho lhnak soldados Jesús ma'a akieto avhak pa'at akvesai'a pretorio, apkellaveiangka lhnak na ma' apkeltemo lheme'.

¹⁷ Apkel·hatsoskaseiangko lhnak aptalhnema m'a, ka apkelentalhneskasekho lhnak apvenaktema aptalhnema apaiseiam apielhvasema, apkelatkeskasekho nhan nema alhengkasekha apqatek otemmalhka akieplomo am'ok ketama Jesús ma'a.

¹⁸ Ka apkelempai'akha lhnak apkelvannaikama m'a, lhna aptaiangkok: —¡Aptasek noka niekhe apiav'akha apveske apanko'ok judios! —lhna aptaiangkok.

¹⁹ Netamen apkeltekpoiangka lhnak iamet apqatek ma'a, kakpota nhan apkelelhpaqhai'o lhnak na apkeliemanong, apkellelteklheiangkek na mota aptapno'ok malha la apkellai'o m'a.

²⁰ Nkelastenganveiakmek nak apkelvannaikama m'a, ka apkel·hatsoskeskamo lhnak apkelentalhnesekha lhkek, apkelentalhnesakho lhnak mokhom aptalhnema apanke'. Ka apkeliantemekho lhnak ma'a kakpota ngkolhek aliaqlho apmeiok, apmankok neten iamet aktenneskama.

Nema alhanma neten Jesús neten iamet aktenneskama

²¹ Neksa apkeliantemekha lhnak Jesús soldados ma'a, apkelvetangveiakmo lhnak lhema enenlhet apkeniekta iokhalhma apvesai'a Simon ko Cirene. Apqanet nak apketkak ma'a, Alejandro kakpota nhan Rufo apkelvesai'a m'a. Apkellapekama lhnak soldado apkeleltemo epasmok Jesús kakpota epatmok esakhak iamet aktenneskama akientalhnema.

²² Lhnak apkeliantemekhak Jesús ma'a iokhalhma akvesai'a Golgota, nema altema aknaiangkelha ientepak nema apqatko'ok.

²³ Ka apkellaiangko lhnak na vino nema angkai'a panaktema akvesai'a mirra, man noka eiamak Jesús ma'a.

²⁴ Ka apkeliaqlhai'o lhnak apmeiok apmankok neten iamet aktenneskama Jesús ma'a, apnaqtevaseiangko nhan lhema nennaqtevaskama soldados ma'a, nenietemo kakpota esakhak Jesús aptalhnema,

²⁵ la 9 sosekhek na ntemak ma'a.

²⁶ Ka apkeliaqhapkeskamo lhnak na takhaplhet lhema iamet akpaihema aktalhesammalhka, lhna ntemak akpaivoma: "Judios apiav'akha apveske apanko'ok hengke'e", lhna ntemak aktalhesammalhka.

²⁷ Apqanet nak na enenlhet apkenmenielhma mota nnemak aleklhanmo lhemek neten iamet aktenneskama Jesús ma'a, lhema lhnak akiennakha kakpota nhan sanqalvelha.

²⁹ Neksa apkeliekai'a lhnak enenlhet'avok ma'a, apkelvannaikama lhna mota Jesús ma'a, lhna aptaiangkok: —¡Hei! Aplhengke lhta lheiap aknema apmopvana kakpota etvasekhak Eniapom Neten apnemakha, elanekhak na akvakmo hanetolhem'a aknem.

³⁰ Ka akto la haveniapak anke akietnema akiavai'a apmopvana lheiap, ¡etiep no neten iamet aktenneskama nak, evongkasakpo no pankek na tep lheiap! —lhna aptaiangko enenlhet ma'a.

³¹ Apkelemhama apmaniaie sacerdotes, kakpota nhan escribas apkelvaiakmavek nak na apkelvannaikama Jesús ma'a, lhna aptaiangkok: —Apvongkaske lhta tep po'ok ha'e, evongkasakpok hatelha nhan apankek tep ha'e.

³² Cristo kelha niekhe ha'e, etiepok hatelha apankek na neten iamet aktenneskama nak kakpota mangeliaskamek ennengko'o —lhna aptaiangkok apkelvannaiangka m'a. Apkelvannaikama lhnak na enenlhet lhek apqanet apkenmenielhma, nema aleklhanmo lhemek neten iamet aktenneskama Jesús ma'a.

Apketsepma Jesús

³³ Katelho lhna ntemak ma'a, akteiaiakmo lhnak ienaqteskama lhma akvakmo la 3 ienaqteso.

³⁴ Ka apkeliateiangka lhnak Jesús akiennaktema nkek ma'a, lhna aptemak: —Eloi, Eloi, ¿lema Sabactani? Neltema, Eniapom Neten, Eniapom Neten, ¿se lha ntak heienievo nak ke? —lhna aptemak Jesús ma'a.

³⁵ Netamen, lhnak aptaiangkok moklhem'a enenlhet ma'a: —Ellailhono ha'e, Elias apkeltennasemmap ania'a apkavema ha'e —lhna aptaiangkok ma'a.

³⁶ Lhema lhnak apvetangveiakmok aia'ak ma'a, ka apkeltelhnaiangko lhnak vino akmaska, aptetemo lhnak na nav'a iamet akvenaktema kakpota epetseskeskamok Jesús ma'a, lhna aptemak na m'a: —Ia', angellanama no sekhek enganko ie', elhiemok hatelha Elias, etepkeskatak hatelha neten iamet aktenneskama nak ha'e —lhna aptemak ma'a.

³⁷ Netamen, apveneiangka lhnak akiennaktema Jesús, ka apketsepmo lhnak na m'a.

³⁸ Kolhvavek ankek nak apiaptemmakpok ietamopai'a aphalhtemommap konne Eniapom Neten apnemakha. Aptaiekho apqanet ma'a, neten nak nkempai'ak apiaptemmap ma'a apvektamo koneng.

³⁹ Apnengkek nak na m'a lhema capitan Romano, apvetaiangkek nak apketsepmo Jesús ma'a, lhnak aptemak: —Have niapak anke nak, Eniapom Neten apketka ha'e —lhna aptemak.

⁴⁰ Nkellomaka lhnak na moklhem'a ngkelvana'ak ma'a, mokhek nak nkelanvai'ak allaneiangka m'a. María Magdalena, Salome, kakpota nhan María, José ngken, apselhiek nak atka apvesai'a Santiago.

⁴¹ Alieploiangkolha nkek na mota m'a Jesús, alpasmomo lhna mota m'a akieto Galilea. Nkellomaka lhnak na m'a aklhamakha ngkelvana'ak altemo lhnak atlhelhma'ak ma'a neksa apmeiekha Jerusalen.

Nema aklhengkeskaiam aphapak Jesús konne metaimong alhva

⁴² Viernes ienaqteso lhna ntemak ma'a, apkellanekhek nak apkeltakha judios amanie aknem nennekhelha.

⁴³ Lhema enenlhet nak apvesai'a José ko Arimatea, apiavekho lhnak apnakha apveske Pilato kakpota elmalhnengvakhak Jesús aphapak ma'a, mang nak na eniai'ak ma'a. José lhnak na apto apkemhama apmanie apieseksek apkelveskai'e apkeliav'akha, apkelailhemo lhnak na akvai'a aknem aptaiekha ta apveske Eniapom Neten ma'a.

⁴⁴ Niemaskangkek nak apvalhok Pilato aplengai'o apketsepma kolhvave Jesús ma'a, ka apkaveiangka lhnak lhema soldado kakpota epeiveskakhak aktema iokhalhmek ania'a.

⁴⁵ Netamen soldado lhna aptemak apkatemmoiangka: —Hai, have lhke niapak ania'a —lhna aptemak. Ka apkeltemo lhnak Pilato elkok José Jesús aphapak neten iamet aktenneskama m'a.

⁴⁶ Ka apmeiekho lhnak José m'a apmamo nhan lhema ietamopai'a kakpota elekvakhak Jesús aphapak neten iamet aktenneskama, epelhketek na m'a ietamopai'a. Ka apekkanvekho nhan konne nemakha akpekkanveianlha enghapak metaimong akiavai'a akiaqiema apkeliangkalhkatma m'a. Ka apkapekho lhnak na atong lhema metaimong akiaqiema.

⁴⁷ Nkellanekama lhnak ma'a María Magdalena kakpota nhan María José ngken akietemelha apekkanveianlha konne aphapak ma'a.