Marcos 12 - Nuevo Testamento Toba Maskoy

Apkenmakmekama aniep meliamolhma

¹ Apketlhekmoskangkek nak lhema apietkeskama mokhom Jesús, lhna aptemak: —Apkanmek nak alhkapok uva lhema enenlhet aniep apankok, aphalhtengkeskamo lhnak na nekhav'ak ma'a. Apkelanei'o lhnak apkelanei'akha iama anmen aimenek kakpota nhan apkellamelhaiangkelha neten neiava aniep apankok. Netamen apteniai'o lhnak na enenlhet apkenmaikama sekhek aniep apankok nema akianmoma m'a, ka aplhengamo lhnak na netamen ma'a.

² Ngvaiakmek nak aknem ankok nennaklhemakha akielhna, koka apto lhkek apankok aniep apkapaskamo lhnak lhema apmakmesaikama kakpota elvakhesek nekha akielhna apankok ma'a.

³ Koka apkenmakmekama lhkek aniep apkeltekpoikama lhnak apiempehek nema apaskama lhkek ma'a, mok apmeiok nak na apkellapasekhok ma'a.

⁴ Netamen apkapasakho lhnak mokhom po'ok apmakmesaikama, apkeliamenaikama lhnak ma'a, apqatek nak na apkeltekpoikamaha.

⁵ Ka apkapasekho lhnak mokhom po'ok apmakmesaikama, apkellaqhengkek noka m'a. Netamen nak ma'a apkellapasekho apentalhnema mokhom, apkeltekpoikama lhnak ma'a, apkellaqhengkek nak napokha m'a.

⁶ Netamen nak ma'a, aklheianmo lhnak apvalhok akto apankok aniep, lhna ntemak: "Angvapakse ta ko'o lhema aphapak apanke' eietka, asto askamelaiam, hatelha ellasekhok ma'a", lhna ntemak.

⁷ Apkellanentamek nak apkenmakmekama lhkek aniep apkelhiaiakmo apketka apankek apto apankok aniep, ka apkelpaqmetkesammakpo lhnak mok apankave, lhna aptaiangkok: "Hata etnekhak apankok aniep ha'e, ¡angaqhe ta kakpota ngkotnekhak engankok ennengko'o aniep anak!", lhna aptaiangkok.

⁸ Ka apkelpathetmo lhnak ma'a, apkellaqhemo nhan, apkelienievo lhnak aphapak nekha aniep —lhna aptemak apkeltennaiangka Jesús ma'a.

⁹ Netamen apkelelmalhneiangka lhnak Jesús enenlhet'avok ma'a, lhna aptemak: —¿Niehek hata etnek akto apankok aniep anak ma'a, he? Ennapvakhak hata apkenmakmekama lhkek aniep, kakpota ellangkokhak po'ok enenlhet aniep apankok ma'a.

¹⁰ Kotlheianvakho no apvalho'ok aktemakha aklheianma Eniapom Neten apaivoma, ka ntemak heng: «Metaimong alhta apkelhakhama apkellanekamok pa'at, koka ntakhek neten ankek akiaspommalhka m'a.

¹¹ Eniapom Neten alhtoka nkeniem'ak ma'a, ka hengelpelapkeso nhan ennengko'o» —lhna aptemak ma'a.

¹² Ka apkenmahai'o lhna niekhe elpathetek Jesús ma'a, enenlhet noka apkellai'ak ma'a, ka apkelieniekho lhnak ma'a.

Nema almalhnekama Jesús aktemakha impuestos

¹³ Ka aknemo lhnak allapaskamo moklhem'a fariseos kakpota nhan apkelieplekama apveske Herodes apnakha Jesús,

¹⁴ lhna aptaiangkok apkellanemo m'a: —Hengetlhekmoskama, neniavek ennengko'o akto nak iokhalhme' apaivoma lheiap mamma apkai'akha. Mang na eteniak nkolekkeskasama apvalho'ok po'ok aptakha la aplheianma, vanlha akietemo nkek apketlhekmoskama henganemakha Eniapom Neten. Ka ngkanek nemmak'o nak angelelmalhnama lheiap, ¿ngkeltemengke nlho ley angelianmongkesek impuesto apveske iokhalhma ko Roma, nlho ka la mma', he? —lhna aptaiangkok.

¹⁵ Koka apiamavek nak Jesús apkenmahai'a etselhnanak ma'a aniem'o hengiennengkeskama niapma'ak ma'a, lhnak aptemak: —¿Se lha ntak apkenmak'o nak heliepkonek ke, he? ¡Ngva no lhema patakkom akiaqiema nak kakpota alanho'! —lhna aptemak.

¹⁶ Ka apkellaiangko lhnak patakkom akiaqiema m'a, lhnak aptemak Jesús: —¿Se lha enenlhet napa'at hengka ie patakkom akiaqiema nak, ko la apvesai'a m'a, he? —Apveske iokhalhma Roma ham —lhna aptaiangkok ma'a.

¹⁷ Netamen lhna aptemak Jesús: —Ellamok apveske Roma akto apankok, ellamok na Eniapom Neten akto la nhan apankok ma'a —lhna aptemak. Nkeliemaskangkek nak apvalho'ok apkellengai'o enenlhet'avok ma'a.

Nema anmalhnekama Jesús aktemakha nenlhatekhangveiam

¹⁸ Saduceos apketlheianmek nak enenlhet apkeletsepma nak menaklhatekhangvomek hata, ka apkenmeiekho lhnak apnakha Jesús, lhna aptaiangkok:

¹⁹ —Hengetlhekmoskama, aptalheskangkek nak na nek Moises henganemakha nak, lhna lhta apketsepo la enenlhet metka apketka, apialheng na lhta etnekhak aptava neptamen kakpota nkolvetak atkak, lhna lhta etnekhak malha apketkak ma'a apetma lhta apketsepma, lhna aptemak Moises.

²⁰ Eniailho no ta nema altennaikama nak: 7 lhnak apkelialheng'a enenlhet, nkeliemhapmek nak ma'a metno apketkok, ka apketsepmo lhnak ma'a, mang nak etai'ak apketka m'a.

²¹ Apialheng apkemhaikamok nak aptaiekhak aptava, apetma aptava neptamen. Apketsepmek nak na mokhom ma'a, metai'a apketka'. Netamen po'ok nak na apialheng, nnavek nak na m'a, apketsepmek nak na m'a, 3 nak apvaiakmok apkeletsepma m'a.

²² Apsavhommakpavek nak 7 apkelialheng'a apkeletsepma nhan ma'a, mamma lhnak apketkak aplhamakho. Netamen atsepmo lhnak na ngkelvana m'a, lhna ntema ania'a m'a.

²³ Koka kolhvave nak nemmak'ak angeliohok ennengko'o, hata akvo'o ta aknem enaklhatekhangvomok hatelha apkenmaskengvaiakmo nak, ¿sek hata ngkotnekha atava 7 nak apkelialheng'a ngkelvana nak, he? —lhna aptemak ma'a.

²⁴ Ka apkellatemmoiangka lhnak Jesús ma'a, lhna aptemak: —Melietemo ketlhengkap ngkanek meliangveiakmo aktemakha nak aktalhesammalhka Vakkahak Eniapom Neten Apaivoma kanhan apmopvana nak.

²⁵ Hata akvo'o ta aknem nennaklhatekhangveianlha apkelennava'ak, ngkelvana'ak, mankoliemhapokhek hata m'a, malha ángeles hata etnangkokhak ma'a.

²⁶ Kolhva smak'ak alpeiveskasekha aktemakha nennaklhatekhangveiam neletsepo la'a. Kotlheianvakho ta nhan apvalho'ok ania'a aktalhesammalhka vakkahak apankok Moises, aktemakha alaivomo lhnak nanek iamet atkok ma'a, ka apaqmetkeskamo lhnak na nek na Eniapom Neten Moises ma'a: «Ko'o asto apiapma'ak apkelieihengka lheiap Abraham, Isaak kakpota nhan Jacob», lhnak na nek aptemak.

²⁷ Eniapom Neten apto Apveske enenlhet meletsepma nak, have apkeletsepma nak —lhna aptemak Jesús ma'a.

Henganemakha neten ankek aktaqmanma

²⁸ Neksa apaqmetkeskama lhnak Jesús Saduceos, apnengkek nak na lhema escriba m'a, apkailheiangkek nak apkeltennaikama Jesús akietemo nke', ka apteteskai'o lhnak ma'a, apkenmalhneiangka lhnak, lhna aptemak: —¿Sek la primer henganemakha, he? —lhna aptemak

²⁹ Ka apkatemmoiangka lhnak Jesús ma'a, lhna aptemak: —Ka ntemak henganemakha hengke'e: «¡Ellailho no ko Israel, Eniapom Neten apveske engankok, apto vanlha lhema!

³⁰ ¡Ellasekho ta mota Eniapom Neten akvakho konne kankek apvalho'ok, alietnaikama apaqtek, kakpota nhan apkeliennaktema apanke!»

³¹ Kakpota nhan nietnek na segundo mo'ok henganemakha aktaqmanma nke, lhna ntemak: «¡Ellasekho ta po'ok, ka akto nak apkellasekhammakpo na apankave ketlhengkap!» Koka aktangko neten ankavek altaqmanma hanet henganemakha nak —lhna aptemak Jesús.

³² Koka lhnak na aptemak escriba m'a: —Hai', have niapak anke aptakha nak lheiap hengetlhekmoskama, vanlha Eniapom Neten apveske engankok, mamma po'ok.

³³ Envanka'ak angellasekho mota Eniapom Neten, angankok na engvalhok, akietnaikama engaqtek, neniennaktema nhan. Kakpota nhan angasekhok emmo'ok ka akto nak nengellasekhammalhko engankok engankave nak. Koka hanet anak henganemakha allelto neten ankavek altaqmanma, mankolhno nengaikamok nentoskama nengaqhema kanhan qaselha nelvanlhema nengaikamok —lhna aptemak.

³⁴ Apvetai'ak nak Jesús akietemo nkek aptakha aplheianma m'a, lhna aptemak apkanemo: —Mmaskek atepo akieto akietnakha aptemakha nak apveske Eniapom Neten lheiap —lhna aptemak Jesús ma'a. Nkelvannammalhkek nak apvalho'ok elelmalhnama mokhom Jesús ma'a.

Cristo apto David aptaven neptamen

³⁵ Apkempekhavek nak mokhom apketlhekmoskama Jesús akieto Eniapom Neten apnemakha, lhna aptemak: —Apketlheianme na mota Escribas Cristo apto apiav'akha apveske David aptaven neptamen.

³⁶ Koka David, Espíritu Santo lhnak nanek apmaikama, aptemo lhnak nanek hengke'e: «Lhta aptak Apveske apkano Apveske ehenkok ma'a: Elhnata neheqha akiennakha akvakmo ta asavho askakheskekta koneng apmankok apkelammelhmakha lheiap», lhnak nanek aptemak ma'a.

³⁷ Apveske David aplheianmek nak Cristo apto Apveske apankok, ¿etnekha nalhmok la apveske apankok aptaven neptamen, he? —lhna aptemak Jesús. Mang nantek na apkellailhemo apkeltennaikama Jesús enenlhet'avok ma'a, nkelpaihekhek nak na apvalho'ok ma'a.

Apkeliennai'o Jesús escribas

³⁸ Lhna aptemak mokhom Jesús: —¡Ellaho ta ketlhengkap escribas anak! Avanhe mota apkellammakpo, apkelentalhnekha apkelentalhnema apkeltaqmanma. Apkeleltemo nhan ngkolhek alpaivesangka neksa apkelvaiam apkaknaiankolha la enenlhet.

³⁹ Nkellekave mota apvalho'ok aktaqmelakha la nentanema akieto apkaqnekhelha judios, kakpota nhan akieto aktaqmelankelha la lhma'.

⁴⁰ Koka apkeltakmelkeskamavek apkenmenielhkeskama qaselha anko'ok lhentampak'a, aholhek ankek na apkelelmalhnongkoma m'a kakpota ngkolhek alleltangko apkeliamo lhma', ka ngkanek tep ankek hato ka ngkotnek nema aliaqmongkaskesekha aniem'o apkellanekamok ngkollatsekama m'a —lhna aptemak Jesús ma'a.

Lhentampe metka atsekama aikamok patakkom

⁴¹ Apnemo lhnak Jesús akieto ammelhakha iamet aiseksek patakkom alhankok ma'a, apkellaneiangka lhnak apnengkenaikamok akiavai'a patakkom nema apkelletsekama enenlhet.

⁴² Ka akvai'o lhnak na lhentampe metka atsekama m'a, akpekkanvei'o lhnak ketsek anke patakkom, hanet patakkom aliaqiema lhnak ma'a akvesai'a blancas.

⁴³ Netamen lhna aptemak apkellanemo Jesús apkeltamesaikamok ma'a: —Have niapak ankek lhentampe nak metka atsekama malha tep ankek akpekkanma patakkom akieto iamet aiseksek, mangkolhnok ma'a apnengkenaikamok ngkeskama patakkom apanko'ok.

⁴⁴ Ngkanek nnankek alaimommalhka patakkom apanko'ok ma'a, koka lhentampe lhkek ntapelhkavek patakkom ankok ma'a, mamma nkotneskesek anmama la qaselha anko'ok —lhna aptemak apkellanemo Jesús ma'a.