Marcos 11 - Nuevo Testamento Toba Maskoy

Aptalhnengvekha Jesús Jerusalen aptekho neten apankek

¹ Jesús kakpota nhan apkeltamesaikamok apkelvekho lhnak metaimong akhaiam akvesai'a Olivos, nengaqtek nak na temma Betfage kakpota nhan Betania, nengaqtek nak na apiav'akha temma' Jerusalen ma'a.

² Lhnak aptemak apkellanemo Jesús apqanet apkeltamesaikamok: —¡Enmeiakha no ha'e, na temma nak! Elvetangvakhak hata malekka atkok aktetemmalhka, metka ngkolhek ananto ¡El·hatsoskes hata tama', eliantementa ta!

³ Hata kno ta alelmalhnengka m'a se lha ntak apkel·hatsoskasengko nak tama', eleltennes hata apveske lhkek apkeltema, kolhvavek nak lhek neniantementamo mokhom, hata eltek ellanak ma'a —lhna aptemak Jesús ma'a.

⁴ Ka apkenmeiekho lhnak ma'a, apkelvetangvekho lhnak malekka atkok aktetemmalhka nekha amai, ka apkel·hatsoskaseiangko lhnak tama m'a.

⁵ Nnengkek nak alelmalhneiangka m'a: —¿Se lha ntak apkel·hatsoskasengko nak aktetemmalhka malekka atkok anak, he? —lhna aptaiangkok ma'a.

⁶ —Apveske lhkek apkeltema, kolhvave nak lhek neniantementamo mokhom —lhna aptaiangkok apkellatemmoiangka m'a. —Hai', ntase' eliantemekha —lhna aptaiangkok ma'a.

⁷ Ka apkeliantemekho lhnak malekka atkok ma'a, apkeltankesaikokho lhnak apkelaqlammap, ka apkanantemo lhnak Jesús ma'a.

⁸ Mang na ntek enenlhet'avok apnengkenaikamok apkelaqlammap kakpota nhan ietapa'ang apva av'alhok amai ma'a apkenmaikamok takha Jesús.

⁹ Neksa aptalhnengvekha lhnak Jesús Jerusalen, apasmeiangkek nak enenlhet'avok, apkelvenekama lhnak ma'a, lhna aptaiangkok: —¡Hosana, ntasek anko ie, eletsevasoho, nema aktaqmelkeskeskama apkaniemhaikama hengke'e aplhekmo nak apkapaskama Apveske!

¹⁰ ¡Nema aktaqmelkeskeskama aptema ta apveske engeliatav'a neptamen David apto aplheiam! ¡Hosana, ntasek anko ie', eletsevaso ta m'a neten! —lhna aptaiangkok enenlhet'avok ma'a.

¹¹ Ka aptalhnengvekho lhnak Jesús Jerusalen ma'a, apmeiekho nhan Eniapom Neten apnemakha, apkellanei'avek nak lhamakho qaselha m'a konne. Ka apkelienakteseiangka lhna lhma' m'a, apkenmeiekho lhnak natemma Betania kakpota nhan 12 apkeltamesaikamok.

Jesús apiematkeskama iamet higuera metka akielhna

¹² Mo'ok aknem nak ntemak ma'a, apteiapmo lhnak Jesús kanhan apkeltamesaikamok na temma Betania, mek nak ngkaqhemak Jesús neksa aplhengama m'a.

¹³ Apvetai'o lhnak iamet akvesai'a higuera, apteteskaiakmo lhnak apmahai'a niekhe' etvok akielhna m'a. Mamma lhnoka akielhna, mang nak nkovaiakmok akielhnemakha, mok ava lhnak ma'a.

¹⁴ Lhna aptemak Jesús apkanemo iamet higuera m'a: —¡Mankotavalhkek hata mokhom akielhna lheia! —lhna aptemak ma'a. Apkellailhemavek nak apkeltamesaikamok aktakha apkeliatekama Jesús ma'a.

Malha apkalhnasekha Jesús Eniapom Neten apnemakha

¹⁵ Ka apkelvekho lhnak mokhom Jerusalen ma'a, aptalhnengvekho lhnak Jesús konne Eniapom Neten apnemakha mokhom ma'a. Apkelentepkeskamo lhnak na enenlhet'avok apkenmaikamok qaselha kakpota nhan apkelhaikamok qaselhaha. Apkeliaqnengkeskamo lhnak asota apanko'ok enenlhet apkeliaqmongkasekha mo'ok patakkom po'ok enenlhet la apanko'ok, kakpota nhan iamet aiseksek konemmaktek aplhano'ok apkelhammap apkeliaqnengkeskamak na Jesús ma'a.

¹⁶ Mang nak eltemok Jesús eliaqmokpok enenlhet'avok konne akieplomo apkelletsekha qaselha apanko'ok ma'a.

¹⁷ Lhnak aptemak Jesús apkellanemo enenlhet'avok ma': —Ka ntemak aktalhesammalhka vakkahak Eniapom Neten apaivoma hengke'e: «Ko snemakha ngkotnek hata akvesai'a apkelelmalhnongkomakha enenlhet'avok lhmankek ham». Ketlhengkap koka apkeltemeskasak apkakhaiangkolha enenlhet apkenmenielhma la'a —lhna aptemak.

¹⁸ Ka apkellengai'o lhnak apkelemhama apmaniaie' sacerdotes, kakpota nhan escribas aktakha apaivoma Jesús, kolhvavek ka nkek nak apkellanekhak ania'a kakpota ellaqhek ma'a. Apkellai'ak noka ngkanek aplhaniek nak enenlhet apkellailhemo mota apketlhekmoskama akiemaskama engvalhok ma'a.

¹⁹ Pelhasep nak aptemak ma'a, aptepekho lhnak mokhom Jesús kakpota nhan apkeltamesaikamok na temma Jerusalen.

Iamet higuera akiemai'a

²⁰ Mo'ok aknem na ntemak ma'a, sosekhe ankek apkeltaqhemo lhnak mokhom neptamna'ak apkeliekangvekho mokhom amhamakha lhnak iamet higuera. Apkelvetangvekho lhnak aliemai'o ava' akvakho aikapmen'ok ma'a.

²¹ Nlheianvekhek nak apvalhok Pedro aptemakha lhnak apiemetkeskamo Jesús iamet ma'a, lhna aptemak apkanemo: —¡Elanhono iamet alhta, nkeliemaia nak ava' akvakho aikapmen'ok, ka songkek apiemetkaso lhta lheiap! —lhna aptemak Pedro.

²² Ka apkatemmoiangka lhnak Jesús ma'a, lhna aptemak: —¡Meliaskem koka Eniapom Neten ketlhengkap!

²³ Ka aptangko la ellanak ketlhengkap metaimong akhaiam anak ha'e: "¡Kotiep ham, kotiem alvata nak!" Nkontek hata m'a, koka nkaimelhkek meliaskame ketlhengkap metka alpeivekha apvalho'ok koka.

²⁴ Have niapak ankek lhamakho qaselha apkelelmalhnengko la akieplomo meliaskeiam, etlhevangkok hata nhan ma'a.

²⁵ Neksa apkelelmalhnongkoma, eltemeskesama ta apankavek apnaqtevaskai'a la po'ok. Netamen Apkeliapom anak ketlhengkap apno nak ma'a neten, etneskesama ta nhan apankek ma'a apkellanekamok ngkollatsekama ketlhengkap.

²⁶ Koka meltemeskesangka la apankavek apnaqtevaskai'a la po'ok, metneskesama ta nhan apankek Apkeliapom anak ketlhengkap apno m'a neten apkellanengko la qaselha ngkolatsekama ketlhengkap —lhna aptemak Jesús.

Nema akvannaikama apientalhnemo Jesús

²⁷ Apkelentalhnengvekhek nak mokhom apkeltamesaikamok kakpota nhan Jesús Jerusalen, ka apiaiheiangka lhnak Jesús nekhav'ak Eniapom Neten apnemakha m'a. Apkelteteskai'o lhnak apkelemhama apmaniaie' sacerdotes, escribas kakpota nhan metno apketko'ok ma'a, apkelelmalhneiangka lhnak, lhna aptaiangkok:

²⁸ —¿Se lha aikamok apientalhnemo nak lheiap kakpota elanak lhamakho qaselha, he? —lhna aptaiangkok apkellanemo m'a.

^29-30 Ka apkatemmoiangka lhnak Jesús ma'a, lhna aptemak: —Ko'o nha smak'ak alenmalhnama sekhe' ketlhengkap, ¿se lha aikamok apientalhnemo Juan kakpota ellavkesangkok iemmen enenlhet'avok, Eniapom Neten, nlho ka la enenlhet, he? Helatemmoma ta apmaniaie' ketlhengkap, kakpota nhan alhenek alhaiek ko'o aniem'akha asientalhnemo nak —lhna aptemak Jesús.

³¹ Ka apkelpaqmetkesammakpo lhnak sekhek mok apankavek ma'a, lhna aptaiangkok: —Have ta anlhenek Eniapom Neten apkaikamok apientalhnemo Juan, ngkanek hengenmalhnekho ta Jesús, hata etnek hengellana: "Sok akto ketlhengkap apkeliaskeiakmo nak Juan", hata etnek hengellanak ma'a

³² Have ta nhan anlhenek enenlhet apkaikamok apientalhnemo Juan —lhna aptaiangkok apkelpaqmetkesammakpo mok apankavek ma'a. Mang nak nkomahai'ak etlhenek ma'a, ngkanek enenlhet'avok nak apkellai'ak ma'a, apkeliamavek nak enenlhet Juan apto apkeltennasemmap ania'a apanke'.

³³ Netamen nak ma'a apkellatemmoiangka lhnak: —Mangeliohok ennengko'o se lha aikamok apientalhnemo Juan —lhna aptaiangkok ma'a. Lhna aptemak na Jesús ma'a: —Ko'o nhan moltok alhenek se lha heiaikamok asientalhnemo nak kakpota alanak lhamakho qaselha nak —lhna aptemak Jesús ma'a.