Marcos 1 - Nuevo Testamento Toba Maskoy

Apvaiam Juan apkellavkeskama iemmen aniapom iokhalhma metkelha temma

¹ Asmak'ak altennama aktemakha ampai'akhasekha nkek nak ania'a aktaqmanma aplhenammap Jesucristo, apto nhan Eniapom Neten Apketka.

² Ka ktemo nak aptalheskama lhnak nanek vakkahak apkeltennasemmap ania'a Isaias annenga hengke'e: «Angvapaksek hata sekama ania'a ehenkok apmanie lheiap, epeneskasok hata amai apankok ma'a amanie nhan apmahai'a emhangkok ma'a».

³ Lhema enenlhet apkelpalhemama m'a metkelha temma, ka aptak hengke'e: «¡Elpeneso ta amai kakpota evak Apveske, elpeiveso ta nhan!», lhnak nanek aptemak ma'a.

⁴ Apvai'ak nak Juan apkellavkeskama iemmen aniapom ma'a iokhalhma metkelha temma, apkeleltennaseiangka lhnak aplhamakho enenlhet eliaqmongkasekhak mo'ok apvalho'ok, ngkolhek na allavkesangko konne iemmen kakpota ngkolhek aktemeskesangka nkek na meleliehekho apkellaskamakha Eniapom Neten.

⁵ Apkelvai'ak nak na enenlhet'avok apkelleniem'o iokhalhma Judea kakpota nhan apiav'akha temma Jerusalen, apkeleltemo lhnak ellailhok Juan ma'a. Apketlheianmo lhnak na apankavek apkeltemakha ngkollatsekama. Ka apkellavkesaiangko lhnak na konne iemmen Juan ma'a akieto alvata Jordán.

⁶ Iama etanlheng apva lhnak apvenaktema aptalhnema Juan, apiapnama lhnoka kaselha aiempek, seva' lhnak na aptoma kanhan iavhan.

⁷ Lhna aptemak apkeltennaiangka Juan apkellanemo enenlhet'avok hengke'e: —Netamen ko'o evak hata apto apientalhnemo apankek, molhnok ko'o. Ngvannalhkek evalhok angvalhek kakpota al·hatsoskesek alhato'ok apnakteto apmankok ma'a.

⁸ Askellavkaske niekhe ko'o ketlhengkap konne iemmen, hato ka m'a enenlhet anak malha ta etnek apkellavkeskama la akieplomo Espíritu Santo —lhna aptemak Juan apaqmeteiangka m'a.

Juan aplavkeskama konne iemmen Jesús

⁹ Ntemengkek nak ma'a, ka apteiapmo lhnak Jesús natemma Nazaret akieto iokhalhma Galilea. Apvekho lhnak akieto alvata' Jordán, ka aplavkeskamo lhnak konne iemmen Juan ma'a.

¹⁰ Neksa apteiapma lhnak nemmen Jesús, apvetai'o lhnak anmaihekho neten, apvaiventamo lhnak takhaplhet Espíritu, malha konemmaktek na aptemak ma'a.

¹¹ Netamen apkellengai'o lhnak enenlhet'avok ma'a nema aliatekama aniemai'o neten, lhna ntemak hengke'e: —Lheiap eietka askamelaiam, apaiesekha mota evalhok —lhna ntemak ma'a nema aliatekama.

Jesús akieto iokhalhma metkelha temma

¹² Ka netamen ma'a apekhesaiangka lhnak Espíritu Jesús kakpota emhangkok iokhalhma metkelha temma.

¹³ Aplomaka lhnak ma'a 40 aknem aiseksek kaselha nevhak. Nkeliaikama lhnak Satanas aktemakha akmahai'a nkoiepkonek Jesús ma'a, ángeles noka apkellasennaikama m'a.

Apkempai'akha sekha apmakmekama Jesús iokhalhma Galilea

¹⁴ Apkaqlhengkasemmakpek nak Juan apkellavkeskama iemmen aniapom ma'a. Ka apmeiekho lhnak Jesús iokhalhma Galilea, apkeleltennaseiangka lhnak ma'a ania'a aktaqmanma aniem'o Eniapom Neten.

¹⁵ Lhna aptemak: —Ngva'ak aknem aklhenammalhko lhnak nane mota, nkanketva'ak na etnekhak hata apveske Eniapom Neten. ¡Eliaqmongkasekha ta mo'ok apvalho'ok, meliaskam ankek na ania'a aktaqmanma nak! —lhna aptemak Jesús ma'a.

Jesús apkellannengvaiam 4 enenlhet apteniaikamok kelasma

¹⁶ Neksa aplhengama lhnak Jesús neiava alvata akieto Galilea, apvetangveiakmo lhnak Simon ka nhan apialheng Andres apkelhaikokho iama tetekko nemmen ma'a. Vanlha lhnak apkenmakmekama apkelteniaikamo mota kelasma m'a.

¹⁷ Lhna aptemak Jesús apkellanemo: —¡Etlheng, helieplomaha! Atlhekmosangkok hata nentemakha nenteniai'a enenlhet —lhna aptemak ma'a.

¹⁸ Kolhvavek ankek nak apkakheseikokhak iama tetekko apanko'ok, apkelieplekho lhnak Jesús ma'a.

¹⁹ Ka apketlhengamo lhnak mokhom tep atketsek ma'a, apvetangveiakmo lhnak Jesús Jacobo kakpota nhan apialheng Juan, Zebedeo apketkak nak ma'a. Apkakhaiangkek nak konne loma nemmen ma'a, apkellanekho lhnak iama tetekko apanko'ok alietiapma m'a.

²⁰ Ka apkellaveiangka lhnak na Jesús ma'a, apkelieniekhek nak apiapom kakpota nhan apkellennengkasekama konne loma nemmen ma'a, apkelieplekho nhan Jesús ma'a.

Enenlhet akmaikama keliaqhameiok

²¹ Ka apvekho lhnak Jesús kakpota nhan apkeltamesaikamok natemma Capernaum, aknem nennekhelha sabado lhna ntemak ma'a. Ka apkelentalhnemo lhnak konne apkaqnekhelha judios ma'a, apkempai'akha sekha lhnak na apketlhekmoskama Jesús ma'a.

²² Nkeliemaskangkek nak apvalho'ok apkellengai'a enenlhet'avok apketlhekmoskama akientalhnema, mang na nkolhnemok escribas ma'a.

²³ Apnengkek nak na lhema enenlhet ma'a kasekapok av'alhok akpaiseiam akmaikama m'a, akpaiheiangka lhnak apatong ma'a:

²⁴ —¡Aiai, manghengeliasamolhma Jesús ko Nazaret! ¿Apmak'a nlho hennaqtevaksek, he? Asiave ko'o Eniapom Neten apokkanma lheiap —lhna ntemak kasekapok av'alhok ma'a.

²⁵ Koka lhna aptemak Jesús apkelpalhengkaseiangka m'a: —¡Kovanma', kopaqnemekha enenlhet anak! —lhna aptemak Jesús ma'a.

²⁶ Nkelpelhiennengkeskangkek nak enenlhet akpaqnemekho kasekapok av'alhok akpaiseiam ma'a, mang nak na ngkeskamak akpaiheiangka atong ma'a.

²⁷ Nkeliemaskangkek nak apvalho'ok enenlhet'avok ma'a, apkelpaqmetkesammakpo lhnak mok apankave, lhna aptaiangkok: —¿Se lha enenlhet ai'e? Apientelhe panke nak, alhnankok anak na hengetlhekmoskama. Mana ngkolhnok kasekapok alpaiseiam av'alho'ok aiempehek, nkellasekhave nak na apaivoma m'a —lhna aptaiangkok enenlhet'avok ma'a.

²⁸ Kolhvavek ankek nak nketkaikama ania'a iokhalhma Galilea lhamakho aktemakha qaselha apkellanai'a Jesús ma'a.

Jesús aptaqmelkeskaiam Simon apepiamong

²⁹ Ka apteiapmo lhnak Jesús apkaqnekhelha judios ma'a, apketlhelhma'ak noka Jacobo kakpota nhan Juan, apkelvekhavek nak apnemakha Simon kakpota nhan Andres.

³⁰ Nnengkek nak altennaskamo Jesús ania'a akietnema Simon apepiamong ma'a, nemmaskema akmelhanma aiempehek nak ngkaqhemak ma'a.

³¹ Ka apteteskaiakmo lhnak Jesús ma'a, apmamo lhnak amek, apnesekho lhnak na neten ma'a. Ntaqmelekhek nak ma'a, netamen alpasmomo nhan aplhamakho m'a.

Aplhamakma anmaska piempeiok apkeltaqmelkeskaiam Jesús

³² Apkelienaktesekama lhna lhma m'a, aplaqlentamo lhnak anmaska apiempeiok kakpota nhan enenlhet anmaikama kasekapok av'alho'ok apnakha Jesús.

³³ Apentelhe pankek nak enenlhet apkaqnekho atong pa'at ma'a.

³⁴ Apkeltaqmelkeskaiakmek nak Jesús aklhamakho aktemakha anmaska apiempeiok enenlhet'avok ma'a. Aplhaniek nak na apkelentepkaskesaikamok kasekapok av'alho'ok ma'a. Mang nak na eltemok nkotlhenek apvesai'a m'a ngkanek nkeliekpelkemavek na songkek ma'a.

Apaiesaikama ania'a Jesús lhamakho iokhalhma Galilea

³⁵ Mmopeiakmek na lhma' atsai'a m'a, aplhatekhai'o Jesús, apteiapmo lhnak natemma m'a. Apmeiekho lhnak aplhepkennenga metkelha akiennoma lhma' kakpota enmalhnama Eniapom Neten ma'a.

³⁶ Netamen nak ma'a Simon kakpota nhan apketlhelhma'ak apkenmeiekho apkeleliangvekha m'a.

³⁷ Ka apkelvetekho lhnak ma'a, lhna aptaiangkok: —Apentelhek lhek enenlhet apkelketansema lheiap —lhnak aptaiangkok ma'a.

³⁸ Ka apkatemmoiangka lhnak Jesús ma'a, lhna aptemak: —Nok po'ok temma nak aktakha nak nengaqte, ka asmak'ak aleltennasama ha'e, asvai'o nak na hengke'e asmahai'a atnek ko m'a —lhna aptemak apkellanemo.

³⁹ Ka aplhengamo lhnak Jesús ma'a, apkeleltennaseiangka lhnak lhamakho apkaqnekhelha la judios ma'a akieto iokhalhma Galilea. Apkelentepkaskesaiangkek nak na kasekapok av'alho'ok enenlhet'avok ma'a.

Jesús aptaqmelkasekha lhema enenlhet lepra ato'

⁴⁰ Apteteskai'o lhnak lhema enenlhet lepra ato' apnakha Jesús ma'a, ka apkelteklhekvai'o lhnak aptapno'ok nalhepop napaqtek ma'a. Lhna aptemak apkapiosemmakpo: —Apveske ¿apmak'o la enialhnasekhak eiempek anak, he? —lhna aptemak.

⁴¹ Apietnai'avek nak napa'at Jesús ma'a, ka apmangveiakmo lhnak, lhna aptemak: —Hai', askeltavek ko'o ¡Kalhnekha apiempek anak! —lhna aptemak Jesús ma'a.

⁴² Kolhvavek ankek nak nkalhnekhak apiempek ma'a, akmaskemo nhan nemmaskema.

⁴³ Ka apaiveskamo lhnak Jesús apkeltemo nhan etaqhekhak ma'a, lhna aptemak apkanemo:

⁴⁴ —Meleltennasamo nkek enenlhet'avok ania'a nak, vanlha toka elana aktemakha akpaivoma aklheianma nak ley apanko nak Moises. Eniakha ta apnakha sacerdote kakpota elanhok alhnekha apiempek anak, esakha ta nhan lhema qaselha apkaikamok la Eniapom Neten —lhna aptemak Jesús apkanemo enenlhet.

⁴⁵ Koka apketkasekama lhnak ania'a lhamakho iokhalhma, lhna songkek na Jesús mevomek moklhem'a la iokhalhma aniem'o apkeliasekamo lhma enenlhet'avok ma'a. Metkelha temma lhnoka aplomaka mota m'a, koka apentelhek nak na enenlhet apkelioiam apnaianlha mota m'a.