Lucas 24 - Nuevo Testamento Toba Maskoy

Nema aklhatekhaskeiam Jesús

¹ Ka akvaiakmo lhnak ampakhasekha nkek aknem semana m'a, anmeiekho lhnak akieto nemakha akpekkanveianlha aphapak ma'a, alletsekho lhnak na aimenek akmases aimes alpeneskamo.

² Ka alvetangvekho lhnak ma'a nema akteskeskama metaimong atong akiavai'a nemakha akpekkanveianlha enghapak.

³ Ka alentalhnemo lhnak konne m'a, mang noka nkolvetai'ak aphapak Apveske Jesús ma'a.

⁴ Nketlhengamavek nak nkenio'ok mankolvetai'o aphapak Jesús, ka akpelapkeskamo lhnak apkeliephongvai'a apqanet enenlhet apkelteteskai'o lhnak ngkelvana'ak ma'a, apkenmopai'a pankek nak apkelentalhnema m'a, apkelienmomo nhan.

^5-6 Nkelmenaiangkek nak ngkelvana'ak ma'a ka alteklheiangko lhnak atapno'ok lhepop ma'a akvakho alteklheio nhan naqta'a lhepop, koka enenlhet nak ma'a lhnak aptaiangkok apkellanemo: —Molelianva Jesús hengke'e apieseksek anak apkeletsepma, aplhatekhangvakmek lhek ma'a. Kotlheianvakho no av'alho'ok aptakha lhta apaivoma akieto ma'a iokhalhma Galilea.

⁷ Aplheno lhta ngkolhek hata angkongvakmo Enenlhet Apketka nak enenlhet'avok anak apkellanekamo ngkollatsekama kakpota ngkolhek na aliaqlho apmeiok apmankok neten iamet aktenneskama. Koka hanetolhem'a aknem na lhta ngkotnek apketsepma m'a, kakpota elhatekhangvomok mokhom —lhna aptaiangkok enenlhet.

⁸ Nkelpelapkeskangkek nak atlheianvekho av'alho'ok ngkelvana'ak ma'a aktemakha lhnak apaivoma Jesús akmahai'akha ngkotnek apkaniemhaikama,

⁹ nkelentepekhek nak ma'a akieto nemakha akpekkanveianlha enghapak, altaqhemo netamna'ak ma'a apkakhangkelha 11 nema alapaskamo kakpota nhan apkellelto apkelieplekama Jesús, aleltennaskekho lhnak ania'a m'a.

¹⁰ María Magdalena lhnak ma'a kakpota nhan Juana, María Jacobo ngken kakpota nhan mo'ok ngkelvana'ak alletsakheskamo lhnak ania'a m'a apkelapaskamo.

¹¹ Koka apkeliaskeiakmek nak nema alapaskamo ania'a m'a, nketlheianmek nak apvalho'ok mangkotnek ma'a.

¹² Koka apketkekho lhnak Pedro m'a akieto nemakha akpekkanveianlha enghapak, apkammelhmo lhnak konne. Mang noka etai'ak Jesús aphapak ma'a, vanlha lhnak apvetai'o ietamopai'a napokha'ak apelhketemmap aphapak ma'a. Niemaskangkek nak apvalhok ma'a, ka aptaqhemo lhnak mokhom neptamen.

Apvetammap Jesús amai Emaus

¹³ Netamen apqanet apkelieplekama apkenmeiekho lhnak natemma Emaus, 11 kilometro lhnak nietnemak Jerusalen ma'a.

¹⁴ Apkeleltennaikokhek nak neksa apketlhengama m'a aktemakha akvetammalhka m'a.

¹⁵ Ka apteteskekho lhnak Jesús ma'a kakpota elieplakhak apkenmeiakhelha.

¹⁶ Koka lhema qaselha lhnak malha aleliasekamo lhma' m'a kakpota meliekpelkek Jesús, malha meliamo lhna ntemak na m'a,

¹⁷ koka lhna aptemak Jesús apkelelmalhneiangka m'a: —¿Selha apketlheno lhkek neksa apketlhengama ie, selha ntak allaioso nak apvalho'ok ke, he? —lhna aptemak.

¹⁸ Ka apkatemmoiangka lhnak apvesai'a Cleofas, lhna aptemak: —Lhamakho amaika'a apkeliave aktakha akvetammalhka m'a Jerusalen, vanlha noka meiho lheiap —lhna aptemak.

¹⁹ —¿Selha qaselha akvetammalhko m'a ie, he? —lhna aptemak Jesús. Ka apkellatemmoiangka lhnak ma'a, lhna aptaiangkok: —Ka Jesús ko Nazaret alhta, Eniapom Neten apkeltennasemmap ania'a apankok alhta m'a. Avanhe lhta akmovana apaivoma, kakpota nhan apkellanai'ak lhta qaselha mongvetai'o napaqtavek enenlhet'avok ma'a.

²⁰ Koka apkelemhama apmaniaie sacerdotes kakpota nhan apkelveskaie enganko'ok anak, apkellangkongvakme lhta m'a apkelveskai'e romano kakpota ellaqhek eliaqlhak apmeiok apmankok neten iamet aktenneskama m'a.

²¹ Nketlheianme lhta niekhe engelvalhok ennengko'o hengel·hatsoskakhak nelvesai'a Israelitas neksa akietnema hengellammelhmakha, koka hanetolhema aknem antak apmatnama lhta m'a.

²² Ka sosekhek lhek moklhem'a ngkelvana'ak netlhelhma'ak anak, hengeleltennaskaktamo lhkek lhema ania'a hengelnelhtengkasavek lhek neten ma'a. Nkenmeiekhek na lhta akieto metaimong alhva apietnakha aphapak Jesús,

²³ ka atlheno lhta mankolvetangvekha m'a. Vanlha lhnak lhta alvet'o apqanet ángeles ma'a, apketlheno lhna lhta nhan aplhatekhangveiam Jesús ma'a, ka alvaktamo lhta nhan mokhom ma'a nengaqhangkelha lhta.

²⁴ Ka apkenmeiakho lhta netlhelhma'ak anak ma'a akieto nemakha akpekkanveianlha enghapak metaimong alhva, apkelvetangvakho lhnak lhta akto have niapak ankek aktakha lhta atlheianma ngkelvana'ak ma'a, mankolvetai'a Jesús aphapak —lhna aptemak Cleofas.

²⁵ Ka aptemo lhnak Jesús apkellanemo m'a: —Koka mankotlheiangvakhok apvalho'ok ketlhengkap apketlheianmo lhnak nanek apkeleltennasemmap ania'a nnenga ngkotnek hata m'a,

²⁶ nkaimommalhkek na lhta Cristo ennangkoho akientalhnema amanie nema aktemeskeskama ta apientalhnemo pankek ma'a —lhnak aptemak ma'a.

²⁷ Ka apkelpeiveskasekho lhnak Jesús aktemakha aktalhesammalhka Vakkahak Eniapom Neten Apaivoma aplhenammap Cristo, ampai'o lhnak nanek aktalhesammalhka ley Moises, ka amhaiangko nhan vakkahak apnaktalheskama lhnak nanek apkeleltennasemmap ania'a annenga.

²⁸ Netamen nak ma'a, apkelvekho lhnak natemma Emaus, apmahai'ak na niekhe eieka aplhengama Jesús ma'a,

²⁹ koka apkelleltemavek nak elhnekhak apketlhelhma'ak ma'a, lhnak aptaiangkok: —Eniaio nhan lheiap hengke'e, ienaqteske —lhnak aptaiangkok ma'a. Ka aphaivomo lhnak na Jesús ma'a natemma nak, apnemo nhan lhemek ma'a.

³⁰ Apkakhaiangkek nak aptaveikokho m'a, ka apmamo lhnak pan Jesús, aptemo lhnak na gracias Eniapom Neten, apkellaiangko nhan ma'a.

³¹ Ka alpelapkeskamo lhnak apkeliekpelkangveiam apto Jesús enenlhet anak, koka apsepanei'o lhnak napaqtavek ma'a.

³² Koka lhnak aptaiangkok apkelpaqmetkesammakpo mok apankave' ma'a: —Have na niapak Jesús ha'e enenlhet lhek, nkellekkasema lhkek engelvalhok neksa hengelpeiveskasekha lhkek aktemakha aktalhesammalhka Vakkahak Eniapom Neten Apaivoma nalhet amai lhek —lhna aptaiangkok.

³³ Kolhvavek nak apkeltaqhemo akieto Jerusalen, apkenmeiekho apkakhangkolha 11 apkellapaskamo mota Jesús kakpota nhan aplhamakha apketlhelhma'ak,

³⁴ lhnak aptaiangkok ma'a: —Have lhke niapak aplhatekhangvakmo m'a Apveske, apiephongvei'o nhan napaqtek ma'a Simon —lhna aptaiangkok.

³⁵ Ka apkeleltennaiangka lhnak aktemakha apkelvetai'a amai akmaiangko Emaus, netamen apkeliekpelkangveiakmo lhnak apiaptemo pan ma'a.

Akpelapkeskama apiephongvaiam Jesús apieseksek apkeltamesaikamok

³⁶ Nheklhek nak apkelpaqmetkesammakpo m'a, apiephongvei'o lhnak Jesús ma'a, lhnak aptemak apkellanemo: —Altaqmelaikama apvalho'ok hata ketlhengkap hengke'e —lhnak aptemak.

³⁷ Avanhek nak apkenmenaikamok ma'a, ngkanek enghangok nak apkellanemak ma'a.

³⁸ Koka lhnak aptemak Jesús apkellanemo: —Menmenamok, meliaskem nahan,

^39-40 have enghangok ko'o, ellanhono eskepok emeiok, emankok. Henmanvanoho, mamma akiokha enghangok la'a —lhna aptemak ma'a.

⁴¹ Koka mokhom nak apkeliaskeiam ma'a, nkelpelapkeskangkek noka apkelvetai'a m'a, alpaihekho lhnak na apvalho'ok ma'a, lhnak aptemak mokhom Jesús: —Hellamok astoma —lhna aptemak.

⁴² Ka apkellaiangko lhnak nekhatkok kelasma alkenammalhka',

⁴³ ka aptomo lhnak napaqtavek ma'a.

⁴⁴ Netamen nak Jesús ma'a lhna aptemak apkellanemo mokhom: —Aktakha nak asvetammalhka ko'o, askeleltennaskangke lhta mota ketlhengkap, ntemengkek askaniemhaikama aklheianmo lhnak nanek ley Moises, apkeleltennasemmap ania'a annenga kakpota nhan vakkahak Salmo hetlheianma ko'o —lhna aptemak Jesús.

⁴⁵ Ka apkelpeiveskasekho lhnak ma'a kakpota eliangvomhok aktemakha aktalhesammalhka Vakkahak Eniapom neten Apaivoma,

⁴⁶ lhnak aptemak: —Ka ntemak aklheianma Eniapom Neten apaivoma enietsepok hata Cristo, koka hanetolhem'a aknem hata ngkotnek apketsepma m'a, elhatekhangvomok hata mokhom, ka ntemak ania'a m'a.

⁴⁷ Nkolhek hata aleltennasengka apvesai'a lhamakho apkellavakha halhmankek ham, hata ellempak hengke'e Jerusalen kakpota eliaqmongkasekhak na mo'ok apvalho'ok enenlhet'avok kakpota Eniapom Neten etneskesama apankek meleliehekho nak apkellaskamakha, lhna ntemak na ania'a m'a.

⁴⁸ Koka eleltennes hata lhamakho qaselha aktakha nak apkelvetai'a ketlhengkap,

⁴⁹ eniakhamok hata hengke'e Jerusalen ngkanek kolhvavek hata angvapaksek takhaplhet'ok aktakha lhta apaivoma Tata have niapak ankek eniapaksek hata, aknema akmopvana apkeniem'o neten —lhna aptemak.

Nema akiasekha neten Jesús

⁵⁰ Ka apkelentepkeskamo lhnak Jesús apkeltamesaikamok na temma nak, aplaqlekho lhnak natemma Betania, apkeliasekho lhnak neten apmeiok apkeltemo nkoltaqmelek apkellangiemhaikama m'a.

⁵¹ Neksa apkeltaqmelkeskeskama apkellangiemhaikama, apkaklheiangko lhnak tep atketsek Jesús ma'a, ka aknemo lhnak akiasekho neten.

⁵² Neksa apmeiekha lhnak neten ma'a, apkelteklheiangko lhnak aptapno'ok aniem'o apkellai'o. Netamen nak ma'a apkeltaqhemo akieto Jerusalen, avanhek anke nak alpaihekha apvalho'ok ma'a,

⁵³ vanlha lhna mota ntemak apkenmeiekha Eniapom Neten apnemakha kakpota eliavenkaskesama mota apvesai'a Eniapom Neten ma'a.