Lucas 22 - Nuevo Testamento Toba Maskoy

Nema alanekha ania'a kakpota epathetakpok Jesús

¹ Ketsek nak nkaimommalhkak aknem akvaianlha aktaqmelaikama lhma judios apanko'ok aptoiangkolha lhna mota pan metka apiepheskama, Pascua lhnak akvesai'a m'a.

² Apkeleliaikama lhnak aktemakha ania'a apkelveskaie sacerdotes kakpota nhan escribas kakpota ellaqhek Jesús ma'a, mang noka eleltemok ellengak enenlhet'avok ma'a, ngkanek apkellai'ak nak ello'ok.

³ Ka aktalhnemo lhnak Satanas Judas Iscariote apvalhok ma'a, apto lhnak na lhema apieseksek apkeltamesaikamok Jesús.

⁴ Apmeiekhek nak apkakhangkelha apkelemhama apmaniaie' sacerdotes kakpota nhan apkelveskaie apkellanekama atong Eniapom Neten apnemakha, apkelpaqmetkeskaiakmo lhnak ma'a, apkellanekho lhnak na aptangkolha m'a kakpota elpathetek Jesús.

⁵ Nkelleklemavek nak apvalho'ok apkelemhama apmaniaie m'a, apketlheianmo lhnak ellangkok patakkom Judas ma'a.

⁶ Ka apkempai'akha lhnak Judas apkeliaikama aktaqmelakha la'a metkelha la temma kakpota elpathetek Jesús.

Hengetlhekmoskama aktemakha nentoma aktaqmanma

⁷ Ngvaiakmek nak aknem aktaqmelaikama lhma judios apanko'ok aptoiangkolha lhna mota pan metka apiepheskama, apkennapmakha lhna mota nepkesek apketkok Pascua ankok ma'a.

⁸ Ka apkellaveiangka lhnak Jesús Pedro kakpota nhan Juan, lhnak aptemak: —Enmeiakha ta apmaniaie m'a kakpota elpenesok nentavekhak ankok aktaqmelaikama lhma' Pascua —lhna aptemak Jesús. Ka apkellatemmoiangka lhnak ma'a, lhna aptaiangkok:

⁹ —¿Ko la kietelha angellanengvakhak ma'a, he? —lhna aptaiangkok.

¹⁰ Ka apkatemmoiangka lhnak mokhom Jesús: —Enmeiakha apiav'akha nak temma ha'e, elvetangvakhak hata m'a lhema enenlhet apiaiam ietangvalhva nema akmakmesaikama. Elieplakha ta m'a akvakho apnemakha apveske apankok ma'a.

¹¹ Eleltennes hata m'a apveske apankok, hata etnangkok ellanak hengke'e: "Hengetlhekmoskama lhkek apmak'ak eihok aktaqmelakha la etavokhak lhemek apkeltamesaikamok Pascua ankok", hata etnangkok ellanak ma'a.

¹² Ka enenlhet anak ma'a elvetaskesek hata akieto neten av'alhok pa'at akiavai'a nema akpeneskamo m'a, elpeneso ta m'a lhamakho aimelhkelha la'a kakpota antavokhak ma'a —lhnak aptemak Jesús apkellanemo m'a.

¹³ Ka apkenmeiekho lhnak ma'a apkelvetangvekho lhnak lhamakho aktemakha aplheianma Jesús. Apkelpeneskamo lhnak na lhamakho aktaqmelaikama lhma' ankok nentavekha' m'a.

¹⁴ Netamen nak ma'a, akvaiakmo lhnak hora apnaiakmo Jesús kanhan apkelapaskamo apankok nekha asota,

¹⁵ lhnak aptemak Jesús apkellanemo m'a: —Avanhek askeltemo atavekhok lhemek ketlhengkap aktaqmelaikama lhma nak ankok Pascua amanie aslengaiangko ta akientalhnema.

¹⁶ Motavekhek hata lheme mokhom ketlhengkap aktaqmelaikama lhma nak akvakmo nentavokho ta mokhom ma'a akvo'o ta aptaiekha apveske Eniapom Neten —lhna aptemak Jesús.

¹⁷ Ka apmamo lhnak nohaikok vino, aptemo lhnak na gracias Eniapom Neten ma'a, apkellaiangko lhnak na apkeltamesaikamok, lhnak aptemak apkellanemo: —Enma einamok mok atkeietsek la'a,

¹⁸ moinekhek hata lhemek vino mokhom ketlhengkap akvakmo ta aknem aptaiekha ta apveske Eniapom Neten —lhna aptemak.

¹⁹ Ka apmamo lhnak na pan, aptemo nhan gracias Eniapom Neten, apkeliapto nhan, apkellangko apkeltamesaikamok. Lhnak aptemak: —Koka hengke'e ehepetek, allangkok hata henaqtevaksek kakpota elvongkasakpok tep ketlhengkap, kolietnekho ta mota apaqto'ok ko'o apkellanengko la'a neksa aktaqmelaikama lhma' nak ketlhengkap —lhna aptemak Jesús apkellanemo apkeltamesaikamok.

²⁰ Ka apkelpeneskamo lhnak aptaveikokha m'a, apmakho lhnak na mokhom nohaikok Jesús ma'a, lhnak aptemak apkellanemo: —Ka nohaikok anak vino akto ema ehenkok, nkolanak hata alhnankok annemo mo'ok apvalho'ok apkenmahai'akha ta etnangkok ma'a. Ka heng ema nak nkoiangkenalhkak hata kakpota nkoltaqmelkeskesek apkellangiemhaikama ketlhengkap.

²¹ Koka heselhnanak hata lhema enenlhet apnek hengke'e nenieseksa nak.

²² Ngva'ak qaselha aklhenammalhka ngkotnek hata takhaplhet Enenlhet Apketka nak, ¡koka enenlhet laie apto apselhnanongkoma m'a! —lhnak aptemak Jesús.

²³ Ka apkelpaqmetkesammakpo lhnak mok apankavek apkeltamesaikamok ma'a, lhnak aptaiangkok: —¿Se lha enenlhet apmak'o nak eselhnena Jesús ke, he? —lhna aptaiangkok ma'a.

Neten ankek aktaqmanma angeltok hengasennama mota emmo'ok

²⁴ Apkellatemommakpo lhnak mok apankavek apkeltamesaikamok ma'a apketlheianmo lhnak apkenmahai'a niekhe etnangkok neten apankavek apieseksek ma'a.

²⁵ Koka aplengai'ak nak Jesús ma'a, lhnak aptemak apkellanemo: —Apieseksek metnangko nak judios apkelientalhnesakpave mota apkelveskaie m'a, apketlhenammakpo pankave aktaqmanma apkellanekamok qaselha apieseksek enenlhet, koka aqhemo m'a.

²⁶ Metnamo nkek ketlhengkap aptaiangkolha nak ma'a, koka apto la neten apankek apieseksek anak ketlhengkap, etnek hata koneng ankek ma'a. Apto la nhan apkemhama apmanie apieseksek anak ketlhengkap, etne toka apkellasennaikama apketlhelhma'ak anak.

²⁷ Apieseksek la enenlhet'avok apto apnema nak nekha asota apto nhan neten apankek ma'a, koka apto la nema annengkasekama nak koneng apankek ma'a, ko'o koka hellasennama mota ketlhengkap.

²⁸ Helieplekama mota ketlhengkap neksa asvetai'a heiepkonma,

²⁹ ka ngkanek atneskesangko ta ketlhengkap apkelveskaie, ka kto nak Tata hetneskeskangke apveske ko'o.

³⁰ Hata antavokhak ma'a, anienangkok nahan nelpasmekha akieto ta m'a astakhelha ta apveske, eniaqhengvomok hata nhan ma'a apkeltanema apkelveskai'e kakpota eleliekpelkoho apkeltemakha m'a 12 apkelpasmekha apketkak neptamen Israel —lhna aptemak ma'a.

Aplheianma Jesús Pedro elhenek hata meiekpelkemo

³¹ Lhnak aptemak Apveske apkanemo Pedro: —Simon, etaqmelkaso no apkailhemo, nkeltavek Satanas nkolievhesama ketlhengkap malha aptemo nak trigo nema akievhesaikama nak.

³² Ko'o koka askenmalhneskasak Eniapom Neten kakpota mankomaskengvomek mei'askeiam lheiap. Netamen hato ka m'a eiennekhok hata mokhom ma'a, kakpota mokhom elpasmekhak na apketlhelhma'ak anak eliennekhok hata nhan ma'a —lhna aptemak Jesús apkanemo Pedro.

³³ Koka lhna aptemak Pedro: —¡Ma', moieniekhek lheiap! Nkaqhok hellaklhengkesek lhemek lheiap kakpota hengellaqhek nahan, moieniekhek koka lheiap —lhna aptemak.

³⁴ Koka lhnak aptemak Jesús apkanemo Pedro: —Have niapak ankek asmak'akha nak atnek angvanak lheiap, amanie akpaivoma ta tape'e, hanetolhema ta ngkotnek aplheianma lheiap mangheiekpelkema —lhna aptemak Jesús.

Akvai'a nengaqte hengiepkonma

³⁵ Netamen Jesús lhnak aptemak apkellanemo apkeltamesaikamok: —Kotlheianvakho no apvalho'ok askellapaso lhta elpaiaksek ania'a aktaqmanma, askelto lhta nhan melletsevek patakkom, aptekamok kakpota nhan mo'ok apnakteto apmanko'ok. ¿Nkaimelhke nlho lhta qaselha ketlhengkap ma'a, he? Ka apkellatemmoiangka lhnak ma'a: —Ma', mamma' lhta aimommalhka —lhna aptaiangkok apkeltamesaikamok.

³⁶ Koka lhnak aptemak mokhom Jesús apkellanemo m'a: —Koka kolhvave nak ka stak askellano ketlhengkap, nietnek hata nkek patakkom, elletsav hata, kakpota nhan aptekamok. Mankoietno la pelettav akvenaktema apanko'ok, elieniav hata qaselha apanko'ok kakpota enmok ma'a.

³⁷ Helheianmek ko'o Eniapom Neten apaivoma ntemak hengke'e: «Nne lhta aktemeskeso malha enenlhet meihamolhma», ntemak ma'a. Haveniapak ankek ngkotnek hata kolhvave nak asiaihekama —lhna aptemak Jesús.

³⁸ Lhnak aptaiangkok apkeltamesaikamo apkellanemo: —Apveske', ka hanet pelettav alvenaktema hengke'e —lhna aptaiangkok ma'a. —Vanlha' —lhna aptemak apkatemmoiangka Jesús ma'a.

Apkenmalhnonkoma Jesús akieto Getsemani

³⁹ Apteiapmek nak Jesús na temma m'a, apmaiangko lhnak metaimong akhaiam akvesai'a Olivos aptemakha lhna mota m'a, apkelieplekhek nak na apkeltamesaikamok ma'a.

⁴⁰ Ka apkelvekho lhnak ma'a, lhnak aptemak Jesús apkellanemo apkeltamesaikamok: —Elelmalhnama ta kakpota mankopalesemmek aliepkonma ta —lhna aptemak Jesús.

⁴¹ Ka apkelieniekho lhnak tep atketsek ma'a, apkelteklhekvaiakmo lhnak aptapno'ok lhepop ma'a, lhna aptemak apkenmalhnongkomo m'a:

⁴² —¡Ta! Heiekes hata akientalhnema nak akmak'o na nkovak, malha asnaqsepma ta akmaska. Koka momak'ak atnehek asmak'akha atnehek, vanlha apkelto la apmak'akha etnek lheiap —lhna aptemak.

⁴³ Mpelapkeskankek nak apiephongvai'o lhema ángel apkeniem'o neten apkeltemo lhnak eiennekhok Jesús ma'a.

⁴⁴ Avanhek ankek nak aplengaiangko akientalhnema m'a, koka niangveiakmek nak apkenmalhnonkoma Jesús ma'a, akteiapmo lhnak na apiemes ma'a malha ema lhna ntemak ma'a.

⁴⁵ Ka apkenmekho lhnak neten Jesús ma'a apmeiekho lhnak apkakhangkelha apkeltamesaikamok, apkelvetangvekho lhnak apnakteianma m'a, aniem'o lhnak anmaiosak'a apvalho'ok, aliamposkama nhan ma'a.

⁴⁶ Lhnak aptemak Jesús: —Se lha akto apnakteno nak ke, enaklhatakha, elelmalhna nhan kakpota mankopalesemmek aliepkonma —lhna aptemak.

Apathetammap Jesús

⁴⁷ Nheklhek nak apkelpaqmetkesaiangka Jesús apkeltamesaikamok ma'a, akpelapkeskamo nhan apkelvai'a enenlhet'avok ma'a. Judas nak na m'a aplaqloiam, apto lhnak na lhema aphapak apieseksek 12 apkeltamesaikamok Jesús, ka apteteskai'o lhnak, apetseskamo nhan Jesús ma'a.

⁴⁸ Koka lhnak aptemak Jesús: —Judas, apetseskek lheiap Enenlhet Apketka nak kakpota eselhnana —lhna aptemak Jesús.

⁴⁹ Ka apkelvetai'o lhnak apkeltamesaikamok Jesús ma'a, apkelelmalhneiangka lhnak ma'a: —Apveske, ¿angeltaniemo i'e akieplomo pelettav akvenaktema enganko'ok, he? —lhna aptaiangkok ma'a.

⁵⁰ Lhema aphapak nak apiaqtemanmak akiennakha apaikok apkennengkasekama apiav'akha sacerdote m'a,

⁵¹ koka lhnak aptemak Jesús: —¡Vanlha, mennapap! —lhna aptemak. Ka apmangveiakmo lhnak apaikok enenlhet lhek ma'a, aptaqmelekho nhan.

⁵² Lhna aptemak Jesús apkellanemo apkelemhama apmaniaie sacerdote kakpota nhan apkelemhama apmaniaie Eniapom Neten apnemakha, kakpota nhan metno apketko'ok apkellelto apkenmahai'a elpathetek, lhna aptemak Jesús: —Selha akto apkelvo'o nak akieplomo pelettav akvenaktema kakpota nhan iamet apmeio'ok, malha enenlhet apmenielhma nak heltemeskasak ketlhengkap.

⁵³ Lhamakho aknem alhta niekhe asketlhekmoskama Eniapom Neten apnemakha napaqtavek ketlhengkap, mang koka helpathetmak ma'a. Kolhva koka helpathetak ketlhengkap ngkanek ngva'ak aknem ankok akmovana ienaqtesa lhma —lhna aptemak apkellanemo Jesús ma'a.

Aplheianma Pedro meiekpelkema Jesús

⁵⁴ Ka apathetammakpo lhnak Jesús ma'a, apkeliantemekho lhnak apnakha apiav'akha sacerdote, apkelielhanmeiangkek nak na Pedro m'a apieplomo Jesús.

⁵⁵ Ka apkelvekho lhnak akieto avhak pa'at, nekha talha lhnak na apkakhaiangkok enenlhet ma'a, apnaiakmo lhnak na Pedro m'a.

⁵⁶ Ka akvetai'o lhnak lhema ngkelvana, apiav'akha sacerdote lhnak apkennengkasekama, nkeltameskamavek nak alanei'o Pedro m'a, lhna ntemak: —Ka enenlhet anak hengke'e aplhelhma lhta nhan Jesús —lhna ntemak.

⁵⁷ —Have ko'o m'a, moiekpelkak ko'o enenlhet anak —lhnak aptemak apkatemmoiangka Pedro.

⁵⁸ Po'ok enenlhet nak na apiekpelkemak Pedro m'a, lhnak aptemak: —Hai, lheiap alhta nhan apto apieplekama Jesús. —Have ko'o m'a —lhna aptemak apkatemmoiangka mokhom Pedro m'a.

⁵⁹ Netamen akiekai'o lhnak lhema hora kelhaha, apto nhan po'ok enenlhet lhna aptemak: —Have niapak enenlhet anak apto apieplekama Jesús, apto nhan ko Galilea ham —lhna aptemak.

⁶⁰ —Ma', apmopvana ania'a lheiap —lhnak aptemak Pedro apkatemmoiangka. Nheklhek nak apaqmeteiangka Pedro m'a, ka akpaivomo lhnak tape'e.

⁶¹ Apkammelhekhek nak Apveske apkenmangkelha Pedro m'a, aklheianvekho lhnak apvalhok aptemakha apaivoma Apveske eiennengkesek hanetolhem'a amanie akpaivoma tape'e.

⁶² Netamen nak ma'a aptaqhekho lhnak Pedro, mang na ngkeskama apvenemo m'a.

Nema akvannaikama Jesús

⁶³ Enenlhet apkellelto apkellanekama Jesús apkelvannaikama lhnak ma'a, kakpota nhan apkeltekpoikama,

⁶⁴ apkelapmo lhnak na apaqto'ok ma'a, lhna aptaiangkok: —Eihonoho, he ¿selha aktekpongo nak ke? —lhna aptaiangkok.

⁶⁵ Avanhek nak na apkellaikamok ngkollatsekama apatno'ok apkellanei'o m'a.

Jesús napaqtavek apkelientalhnakha apkelveskai'e

⁶⁶ Lhema aknem na ntemak akiekai'a m'a, apkaknekho lhna metno apketko'ok judios, escribas, kakpota nhan apkelemhama apmaniaie sacerdotes, apkeliantemekho lhnak Jesús ma'a napaqtavek apkelientalhnakha apkelveskai'e, apkelelmalhneiangka lhnak ma'a:

⁶⁷ —¿Lheiap anlho Cristo, he? —lhna aptaiangkok. Ka apkatemmoiangka lhnak Jesús ma'a, lhna aptemak: —Ka sto la hai, heliaskamok hata ketlhengkap,

⁶⁸ ka askelelmalhnengka la lhema qaselha ketlhengkap, manghellatemmoma ta nhan.

⁶⁹ Koka kolhvave nak Enenlhet Apketka nak elhnemok hata lheme neten akieto akiennakha Eniapom Neten apto akietnema apmopvana —lhna aptemak Jesús.

⁷⁰ Koka lhna aptaiangkok apkelemhama apmaniaie m'a: —¿Lheiap anlho Eniapom Neten apketka, he? —lhna aptaiangkok. Ka apkatemmoiangka lhnak Jesús: —Ka aptangkelha nak apkelpaqmeiasma ketlhengkap —lhnak aptemak.

⁷¹ Lhnak aptaiangkok mokhom apkelpaqmetkesammakpo mok apankavek ma'a: —Kolhva nelleng'ak ennengko'o aplhenammakpo panke apto Eniapom Neten apketka enenlhet anak, meniaimekpo enenlhet apvetaiangko la'a apkelanai'a ngkolatsekama kakpota eselhnanakpok ha'e enenlhet anak —lhna aptaiangkok apkelemhama apmaniaie m'a.