Lucas 21 - Nuevo Testamento Toba Maskoy

Lhentampe metka atsekama akpekkanma patakkom

¹ Apnengkek nak Jesús konne Eniapom Neten apnemakha, apvetai'o lhnak nema apkelletsekama apnengkenaiangkok patakkom apanko'ok nemakha akheskamakha patakkom iamet aiseksek.

² Akvai'o lhnak na lhema ngkelvana lhentampe metka atsekama m'a, allaiangko lhnak ketsek hanet patakkom aliaqiema m'a akvesai'a blancas.

³ Ka apvetai'o lhnak Jesús ma'a, lhna aptemak: —Have niapak lhentampe nak metka atsekama malha tep ankek aikamok patakkom, mangkolhnok po'ok enenlhet.

⁴ Nsavhavek ankek niekhe akteniai'a la aktoma, koka ngkeskama lhkek apkelletsekama nkelaimommalhkek nak patakkom apanko'ok ma'a —lhna aptemak Jesús.

Aplheianma Jesús etvasakpok hata Eniapom Neten apnemakha

⁵ Apkelpaqmeiasmek nak moklhem'a enenlhet ma'a apketlheianmo lhnak aktaqmanma metaimong alanemmalhka Eniapom Neten apnemakha, kakpota nhan alienmoma altakmanma, koka lhna aptemak Jesús:

⁶ —Nkotvasalhkak hata lhamakho nke nak, mankaimalhkek hata takhalhet mo'ok metaimong —lhna aptemak.

Akmak'akha ta nkotnek amanie aktemongvanlha ta nnelha aknem

⁷ Ka apkelelmalhneiangka lhnak apkeltamesaikamok: —¿Se lha aknem nkova, niehek hata ngkotnek qaselha mongenatkeskama kakpota angeliohok ennengko'o akmak'akha ta nkotnehek, he? —lhna aptaiangkok.

⁸ Koka lhna aptemak Jesús apkellatemmoiangka m'a: —Aplhaniek hata enenlhet apkelvai'a, hata etnangkok hengke'e: ¡Ko'o nak Cristo! Etlhenek hata nhan akvai'a aknem aktema nnelha' alhma nkek ham. ¡Koka melieplav ankek ketlhengkap ma'a, mellanko nkek na ngkolhek aliennengkasengka!

⁹ Elleng'ak hata ania'a apkennapekpelha', apkennapommap nahan, koka mellaga nkoie' ngkanek mankovakmok mokhom aknem annelha. Lhamakho akientalhnema nak ngkotnek hata amanie aktema nnelha' aknem alhma nkek ham.

¹⁰ Ellammelhakpok hata moklhem'a apkellavakha la'a,

¹¹ ngkotnek hata akiavai'a akievhekama lhepop, mek, nemmaskema lhamakho apkellavakha. Elvetak hata nhan neten qaselha nengai'o kanhan akiavai'a qaselha mongenatkeskama.

¹² Amanie apmak'akha ngkotnek akientalhnema nak, ngkolhek hata anmenlhenangka ketlhengkap, elpathetakpok hata. Ngkolhek hata allangkongvakmo apkelemhama apmaniaie' apkaqnekhelha judios kakpota ngkolhek aknaktemo' nemmammalhkelha' aniem'o asvesai'a ko'o.

¹³ Hata hetlhenek na asvesai'a napaqtavek apkelemhama apmaniaie m'a.

¹⁴ Moltama nkek apvalho'ok elteniangkok amanie nkek apkellasennekha la'a.

¹⁵ Ko'o ta allangkok ngkeskama apkeliangveiakmo apkellasennammap la ankok kakpota nkollapvanak apkellatemmoikama, mangkolhek hata alieko'o ketlhengkap ma'a.

¹⁶ Koka etselhnanakpok hata ketlhengkap aniem'o apnemolhema apankek apnemakha, ngkana'ak, apkelialheng'a, kakpota nhan apkeltema po'ok nengaqte, ematong hata nhan.

¹⁷ Eltaknevakpok hata ketlhengkap aniem'o helieplekama,

¹⁸ koka mangkolhek hata aktakha ketlhengkap ma'a, ko'o ta altakmelkesek aplhamakho nak apkeliokha.

¹⁹ ¡Apkeliennakkek hata nkek ketlhengkap neksa akvai'a akientalhnema kakpota etlhevangkok apkelvaiam tep ma'a!

²⁰ Hata apkelvet'o ta kempokhakme' apkel·halhiengkangvai'a natemma Jerusalen, eliohok hata nkanketva'ak aknem aktevasemmalhka m'a.

²¹ Apkakhangkek hata nkek ketlhengkap iokhalhma Judea, ¡enieniamok hata akieto akhaiam metaimong! Apkakhangkek hata nkek natemma Jerusalen, ¡elentep hata m'a! Apkellava la iokhalhma apankok, ¡meltaqho nkek natemma!

²² Nkovak hata akientalhnema aklheianmo lhnak nanek Eniapom Neten apaivoma, hata eiaqmongkasekhak apkeltemakha meliamolhma enenlhet'avok ma'a.

²³ Aiosak'ak hata nkotnangkok ngkelvana la nlosave' kakpota nhan nlaklava'ak. Avanhek hata apkellengaiangko enenlhet'avok ma'a, nema akiaqmongkasekha akiavai'a apkeltemakha meliamolhma enenlhet'avok ma'a.

²⁴ Moklhem'a ta etekio'ok pelettav akvenaktema, po'ok hata ngkolhek aliantemo apkenmammap mo'ok apkellavakha. Netamen apkellelto metnangko nak judios elientalhneskasangkok hata apkelvetai'a akientalhnema m'a natemma Jerusalen, koka nkomaskengvomok hata akientalhnema nak akvo'o ta aknem ma'a aktemakha nema aklheianma av'alhok.

Apvektanlha ta Enenlhet Apketka

²⁵ —Nkolvetalhkak hata qaselha mongenatkeskama aknem neten anak, pelten, kakpota nhan piav'a, nkolievhama ta m'a. Meliehek hata aptangkolha enenlhet'avok, enmenangkok hata m'a aniem'o apkellengai'a alhtengioma aiempek iemmen alakhaiam alvata.

²⁶ Nkopalesemma ta apvalho'ok aniem'o apkellai'a m'a nkanek meliehek hata aptangkelha' aniem'o alievhai'a qaselha aliennaktema nkek neten anak.

^27-28 Koka moltama nkek apvalho'ok ketlhengkap apkelvet'o ta akientalhnema nak ma'a, eleliennekho toka ngkanek nengaqte nkaimelhkak nemakha al·hatsoskektanlha ketlhengkap ma'a. Elvetak hata apkelhiaiam Enenlhet Apketka nak lhema iephopai'a takhalhet akieplomo apmopvana kakpota nhan apkapommatma'.

²⁹ Ellailhono asietkeskama nak, ka apkelvet'o la ketlhengkap iamet higuera kakpota nhan aplhamakho iamet anak

³⁰ aktaiekha alhnanko'ok ava', nkotlhenek hata apvalho'ok kanketva'ak aknem aliepvoi'akha m'a.

³¹ Nnavek hata apkelvet'o ta aktakha apkelvetai'a akientalhnema, nkotlhenek apvalho'ok kanketva'ak aptema Apveske Eniapom Neten.

³² Have niapak ankek ngkotnek hata amanie apsavhommap apkeletsepma apkaktengama nak kolhvave nak enenlhet.

³³ Nkomaskok hata neten kakpota nhan nalhepop, koka aspaioma nak mankomaskengvomek hata, have niapak anke.

^34-35 Ellaho ta ketlhengkap nkoliennak apvalho'ok aniem'o apkellanekamok ngkollatsekama, apienaikamok anmen kakpota nhan aleltaikama apvalho'ok, ngkanek nkoplapkesek hata akvai'a nnelha aknem alhma nkek ham takhaplhet'ok ketlhengkap. Ka kto nak nel·hanma nak, nkoplapkesek akmama qaselha nevhak.

³⁶ Ntasek elel·halhnama ketlhengkap, vanlha elelmalhnamo mota Eniapom Neten kakpota apvanka'ak enieniangkok aiseksek akientalhnema nak, kakpota elvakhak ma'a napaqtek Enenlhet Apketka nak —lhna aptemak Jesús apkellanemo apkeltamesaikamok.

³⁷ Apketlhekmoskangkek na mota aknem anke Jesús ma'a akieto Eniapom Neten apnemakha, pelhasep noka apmaiangkok akieto metaimong akhaiam Olivos.

³⁸ Lhamakho sosekhek nak apkenmeiekha mota enenlhet'avok Eniapom Neten apnemakha kakpota ellailhok apkeltennaikama m'a.