Lucas 19 - Nuevo Testamento Toba Maskoy

Jesús kanhan Zaqueo

¹ Apvekho lhnak Jesús na temma Jerico, aplhengamo apiekangvekho lhnak ma'a.

² Apnengkek nak ma'a lhema apkemhama apmanie apkenmaikamok patakkom impuesto ankok ko Roma, nema apketsekama lhnak ma'a enenlhet anak, Zaqueo lhnak apvesai'a.

³ Apmahai'avek na niekhe eiekpelkok Jesús, koka aplhaniek na songke enenlhet'avok, apiakvatema pankek na songkek Zaqueo m'a.

⁴ Ka apketkekho lhnak apmanie apmeiekhelha Jesús ma'a, apkanetvaiakmo lhnak lhema iamet kakpota etak ma'a, sicomoro lhnak akvesai'a m'a iamet.

⁵ Apvaiakmo lhnak Jesús ma'a akietelha apiangkakha neten Zaqueo, ka apvetai'o lhnak ma'a, lhna aptemak apkanemo: —Etiep kolhvave nak Zaqueo, askeltavek alhek apnemakha aknem anak —lhna aptemak ma'a.

⁶ Kolhvavek ankek nak apteiapmak Zaqueo m'a, mpaihekhek ankek nak apvalhok apmamo lhnak na takha Jesús ma'a.

⁷ Koka apkelmaleniosemmakpek nak enenlhet'avok ma'a apkelvetai'o apiantemekho Jesús apnemakha m'a enenlhet apkelanai'a ngkollatsekama.

⁸ Neksa aptaveikokha lhnak ma'a, apkenmekho lhnak neten zaqueo m'a, lhna aptemak: —Apveske, eniailhono sekhe asmak'akha atnek alheianma, allangkok hata nekha atkok qaselha ehenkok metka nak apkelletsekama, asmenielhkeskamakha lhta la enenlhet, altaqhesok hata akvakmo 4 aktaiekho mokhom taiep —lhna aptemak.

⁹ Koka lhna aptemak Jesús apkellanemo enenlhet'avok: —Ka aknem anak ngva'ak apvongkasemmap tep enenlhet anak kakpota nhan apketkak ngkanek apto nhan aptaven neptamen apankek Abraham annenga.

¹⁰ Apva'ak Enenlhet Apketka nak apkelketansema kanhan elvongkesek tep apkellelto nak apketlheneiam —lhna aptemak Jesús.

Nema akmakmesaikama melhamasekha patakkom

¹¹ Nengaqtek nak natemma Jerusalen ma'a, apkellengai'o lhnak Jesús apkeltennaikama enenlhet'avok ma'a, atlheianmo lhnak apvalho'ok angketvai'a aptema Apveske Eniapom Neten.

¹² Ka apkeltennaseiangka lhnak Jesús lhema apietkeskama, lhna aptemak: —Apnengkek nak ma'a lhema enenlhet apto neten apankek apiaspommap, apmaiangkek nak mo'ok apkellavakha kakpota ngkolhek aktemeskeskakmo apiav'akha apveske m'a, kakpota etaqhok mokhom neptamen ma'a.

¹³ Amanie lhnak apmahai'a elhong ma'a, apkankesekho lhnak 10 apkenmakmesaikama, ka apkellaiangko lhnak na moklhem'a 10 patakkom aliaqiema nema altema minas, lhna aptemak apkellanemo: "Enmakmesama ta patakkom anak akvakmo aknem asvaktamo ta mokhom", lhna aptemak apkellanemo m'a.

¹⁴ Netamen nak ma'a, aplhengamo. Koka apkennemolhema apankavek ma'a apkelapaskamo lhnak apkellennengkasekama kakpota eleltennaskakhak apto neten apankek apveske m'a mo'ok apkellavakha meleltemo etneskasokhak apiav'akha apveske apanko'ok ma'a.

¹⁵ Koka nkakhemavek nak apkenmeiekho nema allennengkasekama lhkek ma'a, aptemengkek koka apveske. Netamen aptaqhemo lhnak mokhom apkavakha apankek ma'a, apkellaveiangka lhnak apkenmakmesaikama apkellaikamok alhta patakkom kakpota eihok akvanlha apkennaksepma patakkom ma'a.

¹⁶ Ka apvekho lhnak napaqtek ma'a lhema aphapak apmakmesaikama, lhna aptemak: "Apveske, 10 patakkom aliaqiema minas aktaiekho mokhom tep asnaqsepma patakkom hepekkenkasekha lhta lheiap", lhna aptemak.

¹⁷ Koka lhna aptemak apveske apkatemmoiangka: "Ntasek anko ie', lheiap apto heliehekho, ketse lhta niekhe aspekkenkasekha patakkom, apvankek koka etaqmelkesek lheiap. Kolhvave nak atneskesek hata apveske 10 natemma lheiap", lhna aptemak ma'a.

¹⁸ Ka apvektamo lhnak na mokhom po'ok apmakmesaikama, lhna aptemak: "Apveske, 5 patakkom aliaqiema minas aktaiekho mokhom tep asnaqsepma patakkom hepekkenkasekha lhta lheiap", lhna aptemak.

¹⁹ Koka lhna aptemak mokhom apveske apkanemo: "Kolhva lheiap atneskesek hata apveske 5 natemma", lhna aptemak.

²⁰ Ka apvai'o lhnak mokhom po'ok apmakmesaikama, lhna aptemak ma'a: "Apveske, ema patakkom apanko lhta aliaqiema mina, askeltaqmelkaskaske lhta askelpelhketke lhta ietamopai'a m'a.

²¹ Askak'ave lhta lheiap ngkanek apto hengiatekamo anmakmama kakpota enaksepok patakkom aniem'o apiempek apmakmesaikama po'ok", lhna aptemak.

²² Koka lhna aptemak apveske apkanemo: "Mangkolatsema apkelanai'a lheiap, aktevasekhankek apaivoma lheiap. Apiavek niekhe lheiap asto asiatekamo mota asmakmesaikama kakpota anaksepok patakkom aniem'o apiennaktema asmakmesaikama.

²³ Apvanke lhta niekhe lheiap eniaqheskakhak patakkom ehenkok banco kakpota nkovanamok ankek ma'a", lhna aptemak.

²⁴ Ka apkellaveiangka lhnak apveske po'ok apmakmesaikama, lhna aptemak: "El·hatsoskasekha patakkom aliaqiema mina enenlhet anak ham, ellangkokha aplhamesekha lhkek 10 patakkom aliaqiema minas aktaiekho lhkek apnaksepma", lhna aptemak.

²⁵ Koka apkellatemmoikama lhnak ma'a: "Ma', selha ntahak, mankaimelhkak ma'a, 10 minas antak aplhamasekha m'a", lhna aptaiangkok.

²⁶ Koka lhnak aptemak apkatemmoiangka apveske: "Have niapak ankek astakha nak askellano, akietno la qaselha lhema enenlhet, ngkolhek hata angkokho mokhom ma'a. Koka metko la qaselha lhema enenlhet, ngkolhek hata aklekkasakho ketsek qaselha apankok la'a.

²⁷ ¡Enmeiakha m'a, eliantengvakha nhan enenlhet'avok apkellelto lhkek askellammelhmakha, meleltemo lhkek atnek apveske! ¡Eliaqtemen hata apiaspo'ok nehaqtek ko'o!" lhna aptemak apveske apkellanemo.

Aptalhnengvekha Jesús Jerusalen aptekho neten apankek

²⁸ Apeneskangkek nak apketlhekmoskama Jesús ma'a, ka apkempakho lhnak mokhom aplhengama akieto Jerusalen,

²⁹ nengaqtek nak ma'a na temma Betfage kakpota nhan Betania, nekha lhnak metaimong akhaiam akvesai'a Olivos ma'a. Lhna aptemak apkellanemo apqanet apkeltamesaikamok:

³⁰ —Enmeiakha no ha'e na temma nak, elvetangvomok hata m'a malekka atkok metka nkoltamaksek, aktetemmalhka m'a. Elel·hatsoskes hata aktetemmalhka, eliantementa ta.

³¹ Hata apvet'o ta otep ma'a, apkelelmalhnengka la'a apkenmahai'a etnangkok, eleltennes hata m'a apveske lhkek aptema, hata eltehek ellanak ma'a —lhna aptemak Jesús apkellanemo.

³² Ka apkenmeiekho lhnak ma'a, apkelvetangvekho lhnak aktakha aplheianma lhkek Jesús.

³³ Ka apkel·hatsoskesaiangko lhnak aktetemmalhka tama malekka tkok ma'a, koka lhna aptemak apkellanemo otep: —¿Se lha ntak apkel·hatsoskasengko nak tama ie malekka atkok anak, he? —lhna aptemak.

³⁴ —Apveske lhkek apkeltema —lhna aptaiangkok ma'a.

³⁵ Ka apkeltaqhemo lhnak mokhom apnakha Jesús ma'a apkeliantengkasekho nhan malekka tkok ma'a. Apkelleltankesekho lhnak apkelaqlammap ma'a, apkelpasmo lhnak na Jesús apkelkanetkeskamo malekka tkok.

³⁶ Ka apkelempekho lhnak mokhom akieto m'a Jerusalen, manna ntek enenlhet'avok apkakhesekamok apkelaqlammap takhalhet amai apmeiekhelha Jesús ma'a.

³⁷ Apkelvekho lhnak ma'a nengaqtek metaimong akhaiam akvesai'a Olivos, apkelempekho lhnak mokhom apketlhengama akieto Jerusalen. Nkelpaihekhek nak apvalho'ok aplhamakho apkeltamesaikamok Jesús ma'a, apkeliavenkaseiangka lhnak apvesai'a Eniapom Neten ma'a ngkanek apkelvetai'o lhnak qaselha hempelapkeskama apkellanai'a Jesús ma'a.

³⁸ Apkelvenekama lhnak akiennaktema nkek ma'a, lhnak aptaiangkok ma'a: —¡Nema aktaqmelkeskeskama apkaniemhaikama hengke'e apiav'akha Apveske na apto aplheiam apkapaskama Apveske! ¡Nengeltavek ngkoitek aktaqmelaikama lhma neten, nengai'o nhan ma'a neten! —lhna aptaiangkok ma'a.

³⁹ Koka apkellomaka lhnak na moklhem'a fariseos ma'a, lhna aptaiangkok apkellanemo Jesús: —Hengetlhekmoskama, eniana no elvanmak apkeltamesaikamok anak lheiap.

⁴⁰ Koka lhna aptemak Jesús apkatemmoiangka: —Ka apkelvanmo la enenlhet anak, metaimong hata nkolvenama m'a —lhna aptemak.

⁴¹ Apkanketkeskangkek nak natemma Jerusalen ma'a, ka apkammelhmo lhnak natemma Jesús, apvenemo lhnak ma'a,

⁴² lhna aptemak: —Askeltavek niekhe nkoihangvomhok lheia' aknem anak kakpota ngkoitek aktaqmelaikama av'alhok ham, mang koka nkoihangveiakmoho'.

⁴³ Nkovak hata akientalhnema takhalhet lheia', elvak hata alammelhmakha, ellanangkok hata apkelkanantaikamok ankok lhamakho nekhav'ak akhalhtemommalhka nak lheia'.

⁴⁴ Nkosavhalhkok hata aktevasemmalhka lheia' kanhan atkak, mankaimalhkek hata takhalhet mo'ok metaimong ngkanek mankolheianvakhok av'alhok aptemo amaika'a Eniapom Neten aiseksek anak ham —lhna aptemak Jesús.

Malha apkalhnasekha Jesús Eniapom Neten apnemakha

⁴⁵ Netamen aptalhnemo lhnak Jesús Eniapom Neten apnemakha m'a, apkelentepkeskamo lhnak enenlhet apkelhaikamok qaselha apanko'ok apteniaikamok patakkom,

⁴⁶ lhnak aptemak Jesús: —Ka ntemak aktalhesammalhka Eniapom Neten apaivoma hengke'e: «Ko'o asnemakha ngkotnek hata apkaqnekhelha enenlhet'avok lhamakho apkellavakha kakpota nhan apkelelmalhnongkomakha mota» Ketlhengkap koka apkeltemeskasak apkelielhanmomakha enenlhet apkenmenielhma —lhnak aptemak ma'a.

⁴⁷ Lhamakho knem nak apketlhekmoskama Jesús ma'a Eniapom Neten apnemakha, koka apkelveskai'e sacerdotes, escribas kakpota nhan apkelemhama apmaniaie apkellavakha nak apkelleliaikama lhnak ania'a kakpota ellaqhek ma'a.

⁴⁸ Mang noka nkollapvanka'ak ma'a ngkanek avanhek ankek nak aptaikamok nengaqtek aplhamakho enenlhet'avok apketlhekmoso la Jesús ma'a.