Lucas 17 - Nuevo Testamento Toba Maskoy

Metka neniatekamok emmo'ok elanak ngkolatsekama

¹ Lhnak aptemak Jesús apkellanemo apkeltamesaikamok: —Apne mota enenlhet apiatekamok po'ok ellanangkok ngkolatsekama. ¡Koka lheiap la aie apiatekamok la po'ok! Etak hata akiavai'a nkek akientalhnema apiaihekama.

² Ntase niekhe ngkolhek akteto apiaspok tama lhema metaimong akiavai'a akteklhemmalhka ankok kakpota eieniokpok nemmen alvata.

³ ¡Ka ngkanek ntase mota ellahok ketlhengkap ma'a! Ka aptevasko'o la apialheng lheiap, ei'ok hata eltennasekho ta m'a. Ka apiaqmongkasakho la mo'ok apvalhok, eniasekhekho ta mokhom ma'a.

⁴ Niekhe 7 aktaiekho lhema aknem aptevasemmap lheiap, koka netamen apkelhiakmo la apmahai'a elanekhak aptakha apkellanei'o m'a, ntasek hata nhan eniasekhekhok lheiap ma'a —lhna aptemak Jesús.

Mongiaskeiam aknema akmovana

⁵ Lhnak aptaiangkok apkellanemo apkelapaskamo Apveske: —Apveske, hengeliavenkeskasamok hata mongeliaskeiam anak —lhna aptaiangkok.

⁶ Koka lhna aptemak Apveske apkellatemmoiangka: —Niekhe ketsek la meliaskeiam ketlhengkap malha akto nak mostaza nak aktek, apvanka'ak etnek ellanak iamet anak sicomoro nkotnengvakha aiseksek anak alvata', nkotnengvakhak hata m'a.

Apkanemmakpelha etnehek nema akmakmesaikama

⁷ —Nema apmakmesaikama la'a evakhak apnemakha apveske apankok netamen apeneskama apmakmekama vakka, kakpota nhan aniep, meltehek koka apveske apankok kakpota elhek etavekhak ma'a apnemakha.

⁸ Amanie koka eltok epeneskasok aptoma apveske apankok kakpota etvok, einek nahan, netamen eniangkok apaivoma apmakmesaikama lhkek kakpota etavekhak na alhaie m'a.

⁹ Mankaimelhkak na etnek gracias apveske apankok ma'a ngkanek nietavek etnek apmakmesaikama m'a.

¹⁰ Nnave niekhe nhan ngkotnek ketlhengkap ma'a, ka apkeleliahakho la aknakha akto allano, hata etnangkok hengke'e: "Nema hengenmakmesaikama iama neltaqmanma ennengko'o, ngkanek nellan'ak lhek vanlha neleltalhkelha angellanho".

Apkeltaqmelkasekha Jesús 10 enenlhet lepra ato'ok

¹¹ Ka apkempekho lhnak mokhom aplhengama Jesús apeivomo amai apmaiangko Jerusalen. Apiekangvekho lhnak ma'a iokhalhma Samaria kakpota nhan Galilea.

¹² Apvekho lhnak lhema natemma m'a, apkeltetesaiakmo lhnak 10 enenlhet nemmaskema lepra ato'ok ma'a. Apkelanvei'o lhnak mokhek ketsek ma'a.

¹³ Lhnak aptaiangkok apkelveneiangka akiennaktema nkek ma'a: —¡Jesús hengetlhekmoskama, elietnoho nengaqta'a ennengko'o! —lhna aptaiangkok.

¹⁴ Ka apkelvetai'o lhnak Jesús ma'a, lhnak aptemak: —Enmeiakha Eniapom Neten apnemakha kakpota elvetak sacerdotes ma'a —lhna aptemak. Neksa apketlhengama lhnak nalhet amai ma'a, alalhnekho nhan apiempeiok ma'a.

¹⁵ Lhema aphapak noka apiekpelkangveiakmo alhnekho apiempek neksa aplhengama m'a, ka aptaqhengveiakmo lhnak neptamen ma'a apnakha Jesús. Avanhek ankek nak na apiavenkaskesaikama apvesai'a Eniapom Neten ma'a.

¹⁶ Apkeltangvekho lhnak na aptapno'ok napaqtek Jesús, aphalhentamo nhan apteklheklhemo napa'at lhepop, aptemo nhan gracias ma'a. Ko Samaria lhnak enenlhet anak ma'a.

¹⁷ Neksa apvetai'a lhnak Jesús ma'a, lhnak aptemak apkellanemo apkeltamesaikamok: —¿10 anlho lhkek enenlhet alalhnekha apiempeiok, he? Manak eltaqhengvakmok 9 lhkek,

¹⁸ vanlha nak aptaqhengvakmo enenlhet anak metno judio kakpota eiavenkaskesama apvesai'a Eniapom Neten —lhna aptemak Jesús apkellanemo apkeltamesaikamok.

¹⁹ Ka aptemo lhnak apkanemo Jesús enenlhet anak: —Etnemekha neten, etaqhekha', aptaqmelakhek lheiap aniem'o mei'askeiam —lhna aptemak Jesús ma'a.

Aktemakha akvai'a ta aptema Apveske Eniapom Neten

²⁰ Moklhem'a fariseos nak apkelelmalhnekama Jesús apkenmahai'a eliohok aknem nkovak aptaiekha ta apveske Eniapom Neten, koka lhna aptemak Jesús: —Mankollapvankek hata elvetak aplhamakho enenlhet'avok akvo'o ta m'a aknem aptaiekha ta apveske Eniapom neten.

²¹ Metnangkek hata nke'e: "Ngva'ak ma'a, ngva'ak na hengke'e". Metnangkek ma'a ngkanek ngvai'ak kolhvave nak hengke'e aptema nak Apveske Eniapom Neten —lhna aptemak Jesús apkellanemo m'a.

²² Netamen lhnak aptemak apkellanemo Jesús apkeltamesaikamok: —Nkovak hata aknem ketlhengkap apkenmahai'a elvetak lhema aknem ankek Enenlhet Apketka nak, melvetiek hato ka m'a.

²³ Ellengata ketlhengkap moklhem'a enenlhet etnangkok apketlheianma hengke'e: "Apva'ak hengke'e". Po'ok hata nhan etnek: "Ka apva'ak ha'e", hata etnangkok ma'a. ¡Koka menmamonkek ketlhengkap ma'a!

²⁴ Hato ka apvaktamo ta Enenlhet Apketka nak, malha apkelienmaiam anak akvekho nav'a aksavhekho alhma nkek ham.

²⁵ Amanie koka sekhek ennangkok hata akiavai'a aplengaiangko, eltaqhesok hata nhan enenlhet'avok nenvanlha nak.

²⁶ Neksa apvekta ta mokhom Enenlhet Apketka nak, hata ngkotnek aktemo lhnak nanek apnema Noé nnenga.

²⁷ Nheklhek noka antemak apkeliaihekama enenlhet'avok ma'a, aptoiangkek aptekamok, apienaiangkek nahan, nkeliemhapeiangkek m'a. Netamen Noé aptalhnemo lhnak nanek konne' loma nemmen akiavai'a, ka apkapaskamo Eniapom Neten akmamai'a aklanekha' akiavai'a halhmankek ham. Apkelvaiveiangko nhan enenlhet, apkeletsepmo lhnak na m'a.

²⁸ Lhnak nanek na ntemak na temma Sodoma, nheklhek noka nhan aktemakha apkeliaihekama enenlhet'avok ma'a. Aptoiangkek nak aptekamok, apienaiangkek nahan, apkenmaiangkek qaselha apankok kakpota nhan apkelhaikamok, apkenaikokhek nahan, apkellaneiangkek na apkakhaiangkelha pa'at, lhnak na ne ntemak apkeliaihekama m'a.

²⁹ Ka apteiapmo lhnak nanek Lot na temma m'a, akpalleiakmo lhnak talha kakpota nhan azufre alleniem'o neten, apkeletsepmo nhan aplhamakho enenlhet'avok ma'a.

³⁰ Nkolhok hata nhan ma'a apvaktamo ta pelapkeskama Enenlhet Apketka nak.

³¹ Koka akvo'o ta aknem anak ma'a, apnek hata nkek enenlhet takhalhet apnemakha, metalhnengvakha nkek apnemakha evakhak qaselha apanko'ok. Aploka ta nkek enenlhet nalhma, metaqho nkek apnemakha apvekha la'a qaselha apankok.

³² ¡Ellaho ta m'a! Kotlheianvakho no apvalho'ok aktemo lhnak nanek Lot aptava.

³³ Enenlhet apto la apmahai'a evongkasakpo pankek tep apiokhoho, emaskengvomok hata m'a. Koka enenlhet apto la meniommakpo pankek apiokhoho, evongkasakpok hata tep ma'a.

³⁴ Ka akvo'o ta pelhasep ma'a, apqanet hata enaktenek lheme, lhema aphapak hata ngkolhek akiantengvaktamo, po'ok hata elhnekhak ma'a.

^35-36 Hanet hata nhan ngkelvana'ak nkolteklheiok nteklheklhema m'a, lhema ta ngkolhek akiantemakho, nkolhnekhak hata mo'ok —lhna aptemak Jesús apkellanemo m'a.

³⁷ Ka apkelelmalhneiangka lhnak apkeltamesaikamok ma'a: —¿Apveske ko la akietelha akmak'akha ngkotnek lhamakho aplheno nak, he? —lhna aptaiangkok. Ka apkatemmoiangka lhnak Jesús ma'a, lhna aptemak: —Malha ta nkotnek ma'a mama nak apkelieihakha la neten, ka nietnak na qaselha apak atsepma m'a —lhna aptemak Jesús ma'a.