Lucas 16 - Nuevo Testamento Toba Maskoy

Nema akmakmesaikama apielhammakpo

¹ Apkeleltennasekama lhnak Jesús mokhom apietkeskama apkeltamesaikamok, lhna aptemak: —Lhema enenlhet nak ngkeskama patakkom apankok, apnengkek nak na lhema apkeltakmelkeskeskama qaselha apankok. Aplengai'o lhnak na ania'a apveske aptevaskeskama qaselha apanko'ok ma'a.

² Ka apkaveiangka lhnak, lhna aptemak apkanemo: "Asleng'ak lhta ko'o aptevaskama qaselha ehenko'ok lheiap, helaneskaso no vakkahak aptalhesaikamok qaselha ehenkok alvesai'a alianmoma aptalhesaikama mota apkelhakhama kanhan apkeliaqmoikamok la enenlhet, atepkesek hata lheiap", lhna aptemak apveske apankok apkanemo m'a.

³ Ntaikama lhnak apvalhok apmakmesaikama m'a ngkanek mankapvanak emakmama mo'ok aktemakha apmakmekama, ka kto nak nemmetama malhek, mang nak na nkomahai'ak emongkalhnama m'a, aklheianmo lhnak apvalhok emangkak hata m'a.

⁴ Ka alketansemo lhnak apvalhok ma'a, lhna ntemak: "Ntase nak allavama apkellelto apkeliaqmoikamok apveske ehenkok kakpota hellamelama kelhaha, kakpota henmekhak kelha henmakmesama akieto apkakhaiangkolha hetepkeso ta apveske ehenkok", lhna ntemak alketansema apvalhok.

⁵ Ka apkaveiangka lhnak lhema aphapak sekhe, lhna aptemak: "¿Se lha ngvaiakmok patakkom apkeliaqmoma apveske ehenkok lheiap ke, he?".

⁶ Ka apkatemmoiangka lhnak ma'a: "100 alhano'ok aceite", lhna aptemak. Ka apkatemmoiangka lhnak mokhom: "Hai, koka etalhes no vanlha 50 alhano'ok", lhna aptemak apkanemo.

⁷ Ka apkaveiangka lhnak mokhom po'ok, lhna aptemak apkanemo: "¿Se lha ngvaiakmok patakkom apkeliaqmoma apveske ehenkok lheiap ke, he?". Ka apkatemmoiangka lhnak ma'a, lhna aptemak: "10 mil kilos alena apaktek", lhna aptemak. Apkatemmoiangka lhnak mokhom: "Hai', etalhes akvanlha 8 mil kilos", lhna aptemak.

⁸ Aplengai'ak nak ania'a apveske apankok, aklhenaiangka lhnak apvalho'ok aptemakha apmakmesaikama apmopvana akietnaikama apaqtek apmak'akha la etnek. Have niapak ankek enenlhet apkellelto la melelieplekama Eniapom Neten, neten apankavek apkellelto apkenmopvanka'a alietnaikama apaqtek apkenmak'akha la etnangkok, mangkolhnok ma'a apkellelto nak apkelieplekama Eniapom Neten.

⁹ Ka stak ko'o askellano ketlhengkap, enmama ngkeskama nak netsekama nkolietemo kakpota etnangkok apkeltaiangkolha apketlhelhma'ak nengaqtek, neksa aksavhommalhka ta m'a ngkeskama nak netsekama, ngkolhek hata anmo takha ketlhengkap ma'a apkakhaiangkolha mangkotnengvaiam annelha.

¹⁰ Enenlhet apmopvana la eltaqmelkesek ketsek la qaselha nema akpekkenkasekha, apvankek na eltaqmelkesek akiavai'a la qaselha. Koka enenlhet mankomopvana nak eltaqmelkesek ketsek la qaselha nema akpekkenkasekha, mankapvankek na eltaqmelkesek akiavai'a la qaselha.

¹¹ Mang hata nkek eltaqmelkasengkok ketlhengkap ngkeskama nak apkelletsekama nkolietemo, metlhevangkek hata nhan ngkeskama apkelletsekama alietemo nkek.

¹² Ka meltaqmelkasenko la qaselha mankotno apanko'ok, metlhevangkek hata nhan qaselha apanko'ok.

¹³ Mongapvankek angellasennama apqanet la apveske' engankok, ngkanek angasekho, angeliehekhok na lhema aphapak, koka antaknevak ma'a po'ok, mongeliehekhek nahan. Mangapvankek angasennama Eniapom Neten kanhan aveske patakkom Mamon —lhna aptemak Jesús apketlhekmoskamo m'a.

¹⁴ Apkelvannaikama lhnak fariseos apkellengai'o m'a aptemakha apketlhekmoskama Jesús ngkanek apteniaiangkek na mota ngkeskama patakkom apanko'ok ma'a.

¹⁵ Koka lhna aptemak Jesús apkellanemo: —Nkeltase niekhe napaqta'a ketlhengkap napaqtavek enenlhet, koka meliennengkasak Eniapom Neten apto apiekpelkemo apkelvalho'ok. Koka heng qaselha akto neten ankek akiaspommalhka' napaqtavek enenlhet'avok, aptaqnevakkek koka Eniapom Neten ma'a.

Ley kanhan aptema apveske Eniapom Neten

¹⁶ —Ngvai'ak aknem aktema nnelha m'a ley kanhan ania'a apankok apkeleltennasemmap ania'a apvai'o m'a Juan. Netamen na m'a ampai'o ania'a aktaqmanma aklhenammalhka aknem aptaiekha apveske Eniapom Neten, mantek enenlhet'avok apteniaiangko apiempeiok apkenmahai'a etnangkok apkennemolhema m'a.

¹⁷ Nkomaskok kelha niekhe neten kakpota nhan nalhepop, hatoka ley anak ngkotnek hata nema alieplavkeskama aklhamakho alkama aktalhesammalhka nak m'a.

Apketlhekmoskama Jesús aktemakha metka neniamasma entava

¹⁸ —Lhema enenlhet apieniavo la aptava, emekhak mo'ok, koka aptevaskek aliemhapma lhta. Apmakho la nhan po'ok enenlhet apiamasma lhta aptava m'a, aptevaskakmek na aliemhapma m'a.

Enenlhet nema apketsekama kanhan Lazaro

¹⁹ —Apnengkek nak lhema enenlhet ngkeskama apketsekama, apmennave lhnak apkelentalhnema, apkeltakmanma nhan. Vanlha lhna mota apkelanai'a akiavai'a aktaqmelaikama lhma.

²⁰ Apnengkek nak na nekha atong apnemakha m'a lhema enenlhet metka apketsekama apvesai'a Lazaro. Vanlha lhna mota apkasnekama qaselha apanko'ok nema apketsekama m'a, al'ok nak apiempek ma'a,

²¹ nkelteteskai'ak na mota semheng alpetsesvai'o al'ok apankok. Mek nak nkaqhema mota m'a, apmahai'avek na niekhe etvok akpalleiam aptoma nekha atkok koneng asota apankok ngkeskama apketsekama m'a.

²² Apketsepmek nak enenlhet metka apketsekama m'a, ángeles nak apkelletsekhak neten ma'a akieto apnakha Abraham annenga kakpota etavekho lhemek ma'a. Netamen apketsepmo lhnak na ngkeskama apketsekama enenlhet, apkatonnammakpek nak ma'a.

²³ Avanhek ankek nak aplengaiangko akientalhnema m'a akieto ngkolatsenkolha apkeletsepmakha, ka apkammelhmo lhnak neten, apvetai'o lhnak Abraham kakpota nhan Lazaro apnemo lhnak lhemek ma'a,

²⁴ ka apveneiangka lhnak ma'a, lhna aptemak: "Seta nnenga Abraham, heietno no neha'at, eltennes no Lazaro kakpota elavkesek apophek iemmen, eiaskeskatak hata ehelhkok anak, avanhe aslengaiangko hengke'e aniem'o talha", lhna aptemak.

²⁵ Koka lhna aptema Abraham apkatemmoiangka: "Etaven, kolheianvakho no apvalhok ntase lhta apnemo lheiap nalhepop, Lazaro lhtoka mangkolatsekama apnemo m'a. Kolhva koka avanhe akpaihekha apvalhok hengke'e, mangkolhnok lheiap, avanhek aplengaiangko akientalhnema ham.

²⁶ Mangapvankek ennengko'o angeliokha apnakha nak lheiap, mankapvankek na lheiap eniantak hengke'e, ngkanek tavanne ka nkek ham", lhna aptemak Abraham.

²⁷ Koka lhna aptemak mokhom ngkeskama apketsekama nak: "Heiasekho no Abraham, eniapes no Lazaro asnemakha lhta

²⁸ kakpota eleltennaskakhak 5 elialheng'a aktakha asvetai'a hengke'e, elianmongkesek hata apvalho'ok kakpota melvek hengke'e nenlengaiankolha nak akmaska akiavai'a", lhna aptemak ma'a.

²⁹ Koka lhnak aptemak Abraham apkatemmoiangka mokhom: "Nietnek vakkahak apanko'ok Moises ma'a kakpota nhan apkeleltennasemmap ania'a annenga, ntasek elelietsatangkok, eleliehekhok nahan".

³⁰ Koka apkatemmoiangka lhnak enenlhet anak, lhnak aptemak: "Nkaimelhkek na lhema nenieihengka annenga eniakhak ma'a kakpota elpaqmetkeskakhak eliaqmongkasekhak na mo'ok apvalho'ok, elvatesangkok na apkeltemakha ngkolatsekama m'a", lhna aptemak.

³¹ Koka apkatemmoiangka lhnak mokhom Abraham ma'a: "Meleliahakho la ley Moises kakpota nhan vakkahak apanko'ok apkeleltennasemmap ania'a, kakpota nhan meleliehekhek hata nhan ma'a lhema aphapak apmaskengvaiam apmeiakho la m'a apkakhangkelha", lhna aptemak Abraham.