Lucas 15 - Nuevo Testamento Toba Maskoy

Apietkeskama Jesús nepkesek aplheneiam

¹ Apkelteteskai'o lhnak enenlhet apkenmaikamok anak patakkom impuestos ankok, kakpota nhan enenlhet apketlhenammap apkellanekamok ngkollatsekama apnakha Jesús ma'a, kakpota ellailhok apkeltennaikama m'a.

² Apkelvetai'ak nak fariseos ma'a kanha escribas, ka apkelmaleniosemmakpo lhnak mok apankavek ma'a, lhna aptaiangkok: —Apalhakvakme nak Jesús enenlhet anak apkellanekamok ngkollatsekama kanhan aptavokhek lheme —lhnak aptaiangkok ma'a.

³ Koka aplengai'ak nak Jesús ma'a, apkeleltennaseiangka lhnak lhema apietkeskama, lhna aptemak:

⁴ —Apiangko la 100 nepkesek enenlhet, netamen elhnanmok kelha lhema aphapak apketkok. ¿Have nlho niapak elieniekhak sekhek 99 nepkesek ma'a kakpota eliangvakhak lhema lhkek aplheneiam nepkesek apketkok, he?

⁵ Ka apvetakho la m'a, nkopaihekhak hata apvalhok, epatmentak hata neplatane.

⁶ Apvakhek hata nkek apnemakha m'a, ellavama ta apkennemolhema kanhan apkeltaiangkolha apketlhelhma'ak nengaqte, hata etnek: "Mpaihakhek ko'o evalhok, asvetakhek lhek nepkesek apketkok alhta aplheneiam, kolpaihekha ta nhan apvalho'ok ketlhengkap", hata etnek ma'a.

⁷ Nnavek na m'a avanhek hata ngkotnek akpaihekha apvalhok neten anak apvet'o la lhema enenlhet apkelanai'a ngkollatsekama apiaqmongkasekha mo'ok apvalhok, aselhtek ma'a akpaihekha apvalhok apkellanei'o 99 enenlhet apkellelto apkelpeivomo metka alaimommalhka' nak apkeliaqmongkasekha mo'ok apvalho'ok ma'a —lhna aptemak Jesús.

Patakkom akiaqiema akteiam

⁸ Mo'ok apietkeskama: —Lhema ngkelvana kelha nhan ngkoitek 10 patakkom aliaqiema dracmas, nkotiemok kelha lhema. ¿Have nlho niapak kolhvavek ankek nkoliama apommatkeskama la'a kakpota nhan nkalhnasama konne' aknemakha kakpota nkotekhak ma'a, he?

⁹ Netamen akvetakho la patakkom ankok, nkollavama ta annemolhema kanhan altaiangkolha atlhelhma'ak nengaqte, hata ngkotnek: "Kolpaihek hata lhemek ko evalhok, asvetakhek lhek patakkom dracma akteiam alhta", hata ngkotnek ma'a.

¹⁰ Nnavek na m'a ángeles apkellapaskama Eniapom Neten nkolpaihekhak hata apvalho'ok apiaqmongkasakho la mo'ok apvalhok lhema enenlhet apkelanai'a ngkollatsekama —lhna aptemak Jesús.

3

¹¹ Apkeltennaiangka lhnak Jesús mokhom apietkeskama m'a, lhnak aptemak: —Lhema enenlhet nak apqanet apketkak ma'a,

¹² apselhiek apketka lhnak apkenmalhnekama lhema nekha atkok qaselha apanko'ok apiapom, ka apkennaskekho lhnak apanko'ok apiapom, apkellaiangkok apqanet apketkak ma'a.

¹³ Ka apiamasmo lhnak nema akianmoma apketsekama apselhiek ma'a apkaikamok lhek apiapom, apkenmamo patakkom akiavai'a, aplhengamo lhnak ma'a apmaiangko mo'ok apkellavakha. Ka aptevaskeiakmo lhnak patakkom apankok ma'a apvaianlha aniem'o qaselha ngkollatsekama apvanengvaiam ma'a.

¹⁴ Mek nak na nietnemak ma'a, mamma lhnak nentoma m'a, ka aqhangveiakmo lhnak na mek apketkok ma'a.

¹⁵ Apteniaiangka lhnak na apmakmekama, apvetekho aptaqmelkeskama ietapomap ma'a lhema iokhalhma.

¹⁶ Apmahai'avek na niekhe etvok aptoma ietapomap teves ma'a, mang noka elhkaiak.

¹⁷ Ka alketansemo lhnak apvalhok apketkok anak, lhnak ntemak aklhenaikama apvalhok: "Mantek aptekamok apkenmakmesaikama tata netamen alhta aniep apankok, ko'o koka mek heiaqha ngvai'ak hengke'e.

¹⁸ Ntasek hata ataqho netamen alhta kakpota altennaksek: Tata, mangkolatsema askelanai'a napaqtek Eniapom Neten kakpota nhan lheiap,

¹⁹ mangheietok atnek apketka lheiap, ntasek hetneskasekhak apmakmesaikama lheiap", lhna ntemak mota aklhenaikama apvalhok apketkok anak.

²⁰ Ka aptaqhemo lhnak neptamen ma'a, apkanketkeskekho lhnak apnemakha apiapom. Mokhek nak apvetai'ak apiapom apkelhiaiakmo apketka, apietnai'avek nak napa'at, ka apketkaiangko lhnak aptangieiakmo m'a, apathetmo lhnak na m'a, apetsesmo lhnak nahan.

²¹ Lhnak aptemak apketkok anak apkanemo apiapom: "Tata, mangkolatsema askelanai'a ko'o napaqtek Eniapom Neten kakpota nhan lheiap, mangheietok atnek apketka lheiap", lhna aptemak apketkok.

²² Koka lhna aptemak apiapom apkellanemo apkenmakmesaikama: "Ellakhetkasama elvakhesek apkelentalhnema apkeltakmanma la hengke'e kakpota nhan apkatkeskama apophek kakpota nhan apnakteto apmankok,

²³ kakpota nhan eliantengvakhak vakka atkok akmelai'a aspokkanma lhta, ennahap hata nhan kakpota angellanangkok akiavai'a aktaqmelaikama lhma.

²⁴ Ngkanek apvaktaniek eietka malha apketsepma lhta aptemak, kolhva koka aphalhnankok mokhom, malha aplheneiam alhta nhan aptemak, kolhva koka asvetakhek mokhom", lhnak aptemak apiapom ma'a. Ka apkelempai'o lhnak apkellanekhak apkeltakha aktaqmelaikama lhma' ankok ma'a.

²⁵ Apetma lhnoka aplomaka mokhom aniep apmakmekama, netamen aptaqhemo lhnak apnemakha. Neksa aplhengama lhnak aplengai'o akpaivoma iompat aktaqmelaikama lhma m'a,

²⁶ ka apkenmalhneiangka lhnak apmakmesaikama apiapom, lhna aptemak: "¿Se lha akietno aie, he?", lhna aptemak.

²⁷ "Apvaktaniek lhek apialheng, avanhek akpaihekha apvalhok apiapom apvet'o aphalhnankok, ka apkelaneskaso nak aktaqmelaikama lhma, apkaqho nhan vakka atkok akmelai'a apokkanma lhta", lhnak aptemak apmakmesaikama apiapom ma'a.

²⁸ Mang na ngkeskama aploma apetma m'a, mang nak na nkomahai'ak etalhnengvomok konne pa'at ma'a. Ka apteiapmo lhnak apiapom apkelienlhaneiakmo lhna niekhe apkeltemo etalhnengvomok akietnakha aktaqmelaikama lhma m'a.

²⁹ Koka lhna aptemak apketka metno apketkok: "Nlhamakmek iantelhkapa asmakmesaikama lheiap, askeliehekho motaha, mang koka heiaiangkok lhema ieta'ai apketkok kakpota alanak aktaqmelaikama lhma ieplomo askeltemo lheme nengaqtek apketko'ok.

³⁰ Koka apvaktamo apketka nak lheiap meihamolhma, aptevaskeskangkek na lheiap patakkom apankok ma'a apkaikamo lhta, ngkelvana'ak allanaktema apkellankongvaiakmok ma'a. Apmakhek koka takha mokhom lheiap, apkaqhaskeso nhan vakka atkok akmelai'a apokkanma lhta, apkelaneskaso nhan aktaqmelaikama lhma", lhna aptemak ma'a.

³¹ Koka lhna aptemak apkatemmoiangka apiapom: "Hai', asiavek ko'o mota heiasekhai'o lheiap, alhelhma mota nhan lheiap, ka ehenkok anak lhamakho lheiap na apanko'ok.

³² Koka ntasek na angellanak aktaqmelaikama lhma, nkolpaihekhak na engvalho'ok apvaktaniek apialheng. Malha lhta apketsepma aptemak ma'a, aphalhnankok koka nelvetakhak mokhom, malha alhta aplheneiam na aptemak, koka nelvetakhek mokhom" lhna aptemak apiapom ma'a.