Lucas 14 - Nuevo Testamento Toba Maskoy

Aptaqmelkasekha Jesús lhema enenlhet akiephema apoktong kanhan apio'ok

¹ Aknem nennekhelha sabado lhna ntemak ma'a apkanemmakpo lhnak Jesús etasemok apnemakha lhema apkemhama apmanie fariseo m'a. Apkelemhaseiangka lhnak na apaqto'ok aplhamakha fariseos ma'a.

² Apnengkek nak na lhema enenlhet aliephema apoktengok kakpota nhan apio'ok, apteteskai'o lhnak apnakha Jesús ma'a.

³ Ka apkelelmalhneiangka lhnak Jesús hengetlhekmoskama ley Moises kakpota nhan fariseos, lhna aptemak: —¿Nkeltemave nlho ley Moises antakmelkasekha akmaska apiempek aknem sabado nennekhelha la'a, he? —lhna aptemak.

⁴ Koka mang nak ellatemmoikama m'a, ka aptaqmelkasekho lhnak Jesús akmaska apiempek, apkeltemo lhnak na etaqhekhak ma'a.

⁵ Netamen apkelelmalhneiangka lhnak mokhom Jesús fariseos ma'a: —¿Mel·hatsosanke nlho ketlhengkap apvaivengko la apketka nlho ka la buey apankok konne malhek akiavai'a nkaqhok aknem sabado nennekhelha la'a, he? —lhna aptemak.

⁶ Koka mang nak nkonmahai'ak ellatemmoma m'a.

Apkellanemmap lhema aliemhapma

⁷ Apvetai'o lhnak Jesús apkellelto apkellanemmap eltasemok aktommalhka' m'a apkelteniaiangka lhnak altaqmelakha la lhma apkakhaiangkolha m'a, lhna aptemak apkellanemo:

⁸ —Apkanekpo la lheiap etasemok aktommalhka aliemhapma ato', meteniamankek aktakmelakha la lhma ngkanek evak hatelha alhaie' enenlhet apto neten apanke' apiaspommap ma'a melhnok lheiap.

⁹ Netamen apto apankok ma'a etepkesek hata lheiap ma'a, enianak hata elhnakhak mokhek ketsek ma'a, nkotno aktakmelakha lhma, emangkak hata lheiap ma'a.

¹⁰ Koka apkanekpo la lheiap aliemhapma, elhnem hata m'a akieto nkotno neten ankek akiaspommalhka m'a, netamen apto apankok eltok hata eteteskamok akieto apnakha m'a, ngkolhek hata ak'o lheiap ma'a napaqtavek enenlhet'avok.

¹¹ Nkanek enenlhet la aptemeskesammakpo la neten apankek apiaspommap, koneng apankek hata ngkolhek aktemeskesakho m'a. Koka enenlhet la aptemeskesammakpo apankek meientalhnemo, neten apankek hata ngkolhek aktemeskeso m'a —lhna aptemak Jesús apkellanemo.

¹² Netamen lhna aptemak Jesús apkanemo apto apnemakha: —Apkelan'o la lheiap aktaqmelaikama lhma, mellanesongkek apkellanema apkennemolhema panke, apkelialheng'a apanke kakpota nhan apkeliekpelkemelha la'a enenlhet, nlho ka la nhan enenlhet nema nak apkelletsekama ngkanek elailhek hata lheiap ma'a apkeliaqmongkasekha apkellaikamok.

¹³ Koka ntasek ellanak lheiap elpasengvak metka nak apkeletsekama, anmaska apiempeiok, meliennaktema, apkeliakteikamaha, kakpota nhan metka apaqto'ok.

¹⁴ Ka enenlhet'avok anak ma'a mankollapvankek eliaqmongkasekha lheiap apkellanema la'a eltasemok, koka aktaqmelakho nke ta nkotnek lheiap akvo'o ta aknem apnaklhatekhangveianlha apieseksek apkenmaskengvaiakmo apkellelto apkelpeivomo, hata nhan nkotaqmelek lheiap ma'a —lhnak aptemak Jesús apkanemo apto apankok ma'a.

Akiavai'a aktaqmelaikama lhma aktommalhka

¹⁵ Aplengai'ak nak na lhema enenlhet ma'a aktemakha apkeltennaikama Jesús, lhnak aptemak: —Aktaqmelakho nkek enenlhet apkellelto ta apkelpasengvaiam aktaqmelaikama lhma' akieto nak ma'a aptemakha nak apveske Eniapom Neten —lhna aptemak.

¹⁶ Ka apkeltennaseiangka lhnak Jesús lhema apietkeskama m'a, lhnak aptemak: —Lhema enenlhet nak apkelanai'ak akiavai'a aktaqmelaikama lhma, ka apkapaskamo lhnak apkennengkasekama kakpota eleltennasangkok elpasengvomok enenlhet apentalhnema m'a.

¹⁷ Netamen nak ma'a akmokhetmo lhnak nentoma, apkapasekho lhnak mokhom apkennengkasema kakpota elaqlosengvakhak apkellelto apkellanemmap.

¹⁸ Koka apketlheianmek na apankavek aknema aliasekamo lhma m'a, mannoka nkoliakvaiakmok ma'a, lhnak aptemak lhema phapak: "Momak ko aniakhak ma'a, mankovankok asmama lhepop ehenkok, asmak'ak atienengvakho", lhna aptemak lhema aphapak ma'a.

¹⁹ Lhnak na aptemak po'ok: "Momak'ak ko aniakhak ma'a, mankovankok ko askenmama 10 buey kakpota alkakkesek, asmak'ak aiepkonkesamaha".

²⁰ Lhnak na aptemak po'ok: "Momak'ak aniakha', mankovankok ko'o heliemhapma", lhna aptemak ma'a.

²¹ Netamen, aptaqhemo lhnak nema annengkasekama apkeltennaskekho lhnak ania'a apveske apankok ma'a. Man na ngkeskamak aknatheskamo m'a, lhna aptemak: "Eniakha kolhvave nak amai apieseksek temma apvalhok anak, eliantementa ta enenlhet metka nak apkeletsekama, meliennaktema, metka apaqto'ok, kakpota nhan enenlhet apkeliakteikama nak", lhna aptemak.

²² Ka apmeiekho lhnak nema annengkasekama m'a, aplaqlosengvekho lhnak enenlhet'avok ma'a, ka aptaqhemo neptamen, lhnak aptemak: "Apveske askelan'ak apkeltakha lhkek alana', avanhek lhma mokhom aplhamo la enenlhet", lhna aptemak.

²³ Ka apkapaskamo lhnak mokhom apveske apankok, lhna aptemak: "Eniakha ta mokhom kolhvave nak nepiava temma, eleltennasamok hata enenlhet apkelvet'akha la'a ellana ta elelhiemok hengke'e kakpota elanok asnemakha nak.

²⁴ Moltok ko mokhom elelhiemok ma'a apmaniaie lhkek askeltema elpasengvatak nentavekha nak", lhna aptemak.

Akientalhnema anieploma Jesús

²⁵ Mang nantek enenlhet apkelieploma apmeiakhelha Jesús ma'a, ka apengkammakpo lhnak neptamen ma'a, lhnak aptemak:

²⁶ —Apkenmak'ak hata nkek eltek ketlhengkap askeltamesaikamok, nkaimelhkek eltehek neten apankavek hellamelaiam, mankolhno m'a apkellamelaiam anak apiapma'ak anak, ngkana'ak, apketkak, apkelialheng'a, kakpota nhan mankolhno apkellamelammakpo apankave nak ketlhengkap. Mang hata nkek etnangkok ketlhengkap ma'a, mankollapvankek na etnangkok askeltamesaikamok.

²⁷ Enenlhet mankonmahai'a la epatmok akientalhnema malha iamet aktenneskama apankok, heieplok na ko'o, mankoietok etnek askeltameskama.

²⁸ Nkaimelhkek sekhek nkolietnama apaqto'ok amanie apkenmahai'a etnangkok helieplekama, malha enenlhet apmahai'a la ellanak pa'at akiavai'a, amanie sekhe nkoietnama apaqtek akvanlha akianmoma la patakkom.

²⁹ Apkempo la apkelanai'a apkakheskama ietaphaimakkok, aksavhelhko la patakkom apankok, netamen ngkolhek hata akvannangka m'a,

³⁰ ngkolhek hata nhan altangko metka apqatek aniem'o mepeneskama apkelanai'a apnemakha m'a.

³¹ Malha nhan apiav'akha la apveske apnema 10.000 soldados apanko'ok, amanie sekhek nkoietnama apaqtek kakpota apvankek hatelha eniammelhek po'ok apveske apno la 20.000 soldado apanko'ok.

³² Ka mankapvanko la eniammelhek ma'a, eniapaksek apkennengkasekama eltok hata mennapakpek ma'a.

³³ Ka stak ko askellano mokhom ketlhengkap kolhvave nak, apkelmak'ak hata nkek etnangkok askeltamesaikamok, nkaimelhkek sekhek amanie nkek eniaqhesokha qaselha apanko'ok.

Mangasennek iasek akmasko la akmaska

³⁴ —Iasek akto aktaqmanma nkek nenmaikama, koka akmasko la akmaska m'a, mmaskek na nemmangka m'a.

³⁵ Nelhakkek nahan ngkanek mmaskek nenmangka nengankaiekha lhepop aktek aniep la'a kanhan nkelhtek la nengankaiekha ¡Eltaqmelkaso no apkellailhemo apaiko'ok anak! —lhna aptemak apkellanemo Jesús ma'a.