Lucas 13 - Nuevo Testamento Toba Maskoy

Neniaqmongkasekha mo'ok envalhok

¹ Moklhem'a enenlhet nak apkeleltennaskekhak ania'a Jesús aktemakha akvetammalhka m'a. Apmamo lhnak Pilato ema ankok apnaqtoskama moklhem'a Galileos apkennapekamok kakpota ellangkok apkenmahai'akha la ellangkok ma'a. Ka apiepetkasekho nhan ema apanko'ok enenlhet Galileos ma'a, lhna ntemak akvetammalhka m'a.

² Ka apkatemmoiangka lhnak Jesús, lhna aptemak: —Nketlheianme mota apvalho'ok ketlhengkap ma'a aptekioma aniem'o nhan asongkek akiavai'a nkek apkellanekamok ngkollatsekama enenlhet'avok anak, neten apankavek apkennemolhema nak ma'a, ntema mota atlheianma apvalho'ok ketlhengkap ma'a.

³ ¡Koka have niekhe m'a! Ketlhengkap hata nhan eletsepok meliaqmongkasakho la mo'ok apvalho'ok.

⁴ Kotlheianvakho no apvalho'ok ketlhengkap apkeletsepmo lhnak nanek 18 enenlhet ko Jerusalen, allapekho lhnak pa'at akiavai'a metaimong alanemmalhka' akieto natemma Siloe. Nketlheianmek apvalho'ok ketlhengkap ma'a apkellelto neten apankavek meliamolhma' apieseksek apkennemolhema m'a.

⁵ ¡Koka have m'a! Ketlhengkap hata nhan eletsepok meliaqmongkasakho la mo'ok apvalho'ok —lhna aptemak Jesús apkellanemo.

Iamet higuera metka akielhna

⁶ Lhnak aptemak Jesús apkeltennaiangka apietkeskama: —Lhema enenlhet nak apkanmak iamet higuera akieto aniep apankok, lhennenga lhna ntemak aptenengvekho apteniai'a niekhe' akielhna, mang noka nkoielhnemak ma'a.

⁷ Lhna aptemak apkanemo apmakmesaikama: "Hanetolhem'a iantelhkapa ntak astenengvektamo mota asteniangvekta akielhna, moka nkoielhnemak ma'a. Ntasek hata eiaqtemenek, aqhemo amhamo m'a aniep anak", lhna aptemak.

⁸ Ka apkatemmoiangka lhnak apmakmesaikama m'a: "Apveske, eniangkono' sekhek nkotnemok mokhom iantelhkapa nak, aliepvateskesek hata sekhek avhak anak lhepop, annengkenek hata nhan nkelhtek

⁹ kakpota nkoilhek kelhaha, koka mankoilho la'a, ntasek aniaqtemenekhak hata", lhna aptemak ma'a.

Aptaqmelkasekha Jesús lhema ngkelvana aknem nennekhelha

¹⁰ Apketlhekmoskangkek nak Jesús akieto apkaqnekhelha judios aknem sabado nennekhelha.

¹¹ Nnengkek nak na m'a ngkelvana akmaska aiempek, 18 iantelhkapa lhnak ngvaiakmok aktema akhema m'a. Mankavankek nak nkopeivekhak ma'a aniem'o kasekapok av'alhok ngkolatsekama.

¹² Apvetai'ak nak Jesús ma'a, ka apkaveiangka lhnak, lhna aptemak apkanemo: —Ataqmelkasekha ta lheia' —lhna aptemak.

¹³ Ka apnengkanmo lhnak apmeiok takhalhet ma'a, akpeivekho lhnak akhema m'a, ampai'o lhnak akiavenkaskesaikama apvesai'a Eniapom Neten ma'a.

¹⁴ Koka mang na ngkeskamak aknatheskama apkemhama apmanie nemaknekhelha m'a, ngkanek Jesús aptaqmelkasekho ngkelvana nak aknem sabado nennekhelha, lhna aptemak ma'a: —¡Aknem sabado nennekhelha aknem anak, metka nemmakmekamaha, mo'ok aknem koka elelhiem kakpota ngkolhek aktakmelkasakho anmaska apiempeiok! —lhna aptemak ma'a.

¹⁵ Ka apkatemmoiangka lhnak Apveske, lhna aptemak: —¡Hengiennengkeskama niapma'ak ketlhengkap! Apkenmakmema nhan aknem sabado nennekhelha la'a, apkel·hatsoskeskakhe mota tama apnaqtoskama buey, iama malekka nhan kakpota elaqlakhak ellangkongvakhak iemmen.

¹⁶ Ko'o nhan nkaimelhkak alekkesek akmaska aiempek ngkelvana nak aptaven neptamen Abraham, 18 iantelhkapa ntemak malha aktetema Satanas, ntasek astaqmelkasakho aknem sabado nennekhelha nak —lhna aptemak Jesús apkellanemo m'a.

¹⁷ Ka apkenmangkangvekho lhnak apkellelto apkellammelhma apkellengai'o aktakha apaivoma Jesús ma'a, koka napokha enenlhet nkelpaihekhek nak apvalho'ok ma'a aniem'o qaselha mongvetai'o.

Apietkeskama Jesús mostaza aktek

¹⁸ Lhna aptemak na mokhom Jesús: —Ko la atnek aietkesek ko aktemakha aptema Apveske nak Eniapom Neten.

¹⁹ Aietkese kto nak malha mostaza nak aktek apkanma la enenlhet aniep apankok, ntektepkek ma'a, ngvanenie', ntek iamet akiavai'a, nkolpaklhenek na anata tko'ok aktengok ma'a —lhna aptemak Jesús.

Apietkeskama Jesús harina apiepheskama

²⁰ Lhna aptemak mokhom Jesús: —Ko la atnek aietkesek mokhom aktemakha aptema Apveske nak Eniapom Neten.

²¹ Aietkesek malha akto nak ketsek harina apiepheskama lhema ngkelvana nkoipetkesek hanetolhem'a alietkeskama harina kakpota eiephekhak ma'a —lhna aptemak Jesús.

Atong atkok

²² Neksa apmeiekha lhnak Jesús Jerusalen ma'a, apketlhekmoseiangkek nak aplhamakho apiav'akha temma kakpota nhan temma apketkok apkeliekangvakhelha la'a.

²³ Lhna aptemak lhema enenlhet apkenmalhneiangka: —Apveske', ¿apkanet apankave nlho ta elvongkasakpok tep enenlhet, he? —lhna aptemak. Ka apkatemmoiangka lhnak Jesús ma'a, lhna aptemak:

²⁴ —Elienlhanmamok ketlhengkap elentalhnengvom atong atkok, mang hata nte niekhe enenlhet'avok apkenmahai'a niekhe elentalhnengvomok ma'a, koka mankollapvankek hata m'a.

²⁵ Apto apnemakha apkapakho la atong ma'a, ketlhengkap apkellelto apkelanvai'a akieto atong iokhalhma, hata eltehek hengke'e: "¡Apveske, Apveske hengelmaieskes no atong anak!", hata etnangkok ma'a. "¡Ma', moliekpelka ketlhengkap!", hata etnek apto apnemakha m'a.

²⁶ Hata etnangkok mokhom ellana ketlhengkap apto apankok pa'at: "Nentaveikokhek lhta lhemek lheiap, apketlhekmoskangke mota lheiap akieto amai kakpota nhan nellavakha", hata etnangkok ma'a.

²⁷ Koka hata etnek ellana: "Enmeiakha m'a, melioholhma ketlhengkap, moliekpelkak", hata etnek apto apnemakha m'a.

²⁸ Netamen eliapqalhek hata m'a, elelpelhiennemok hata nhan apkelvetangvakmo ta m'a apkelieihengka'a apankavek ketlhengkap Abraham, Isaak, Jacob, kakpota nhan aplhamakho apkeleltennasemmap ania'a nnenga, koka menmakpeta takha ketlhengkap ma'a akieto aptemakha nak apveske Eniapom Neten.

²⁹ Elvomok hata m'a enenlhet apkelleniem'o alhma nkek ham kakpota elpasengvomok aktaqmelaikama lhma' m'a akieto nak aptemakha m'a apveske Eniapom Neten.

³⁰ Moklhem'a enenlhet apkellelto meliaspommap kolhvave nak, hata eltemengvomok neten apankavek ma'a. Koka moklhem'a enenlhet apkellelto neten apankavek apkeliaspommap nengvanlha nak, koneng apankavek hato ka etnokhak ma'a.

Akmaiose apvalhok Jesús aniem'o natemma Jerusalen

³¹ Apkelvai'ak nak fariseos apnakha Jesús ma'a, lhnak aptaiangkok: —Jesús, etaqhekha ta, Herodes lhek apmak'ak eniaqhek lheiap —lhna aptaiangkok.

^32-33 Apkatemmoikama lhnak Jesús ma'a: —Maleng ma'a Herodes, eleltennaskakha ta alentepkesek hata kasekapok av'alho'ok, altakmelkasekhak hata nhan anmaska apiempeiok aknem anak, sosekha kanhan mo'ok sosekha, netamen apenaksek hata asmakmekama. Alhong mokhom alhengama akieto Jerusalen, koka m'a aptekiomakha lhna mota apkeleltennasemmap ania'a m'a.

³⁴ ¡Aii, ketlhengkap laie' ko Jerusalen! Vanlha mota apkeliaknekamok metaimong apkennapeiangko apkeleltennasemmap ania'a kanhan apketsekama ania'a apkellelto Eniapom Neten apkellapaskama. Mante niekhe asmahai'a aleltakmelkesek ketlhengkap aktemo nak tape'e allaklava alapkeskama alhempankok atko'ok, koka mellasekhai'ak ketlhengkap.

³⁵ Ka ngkanek nkoieniolhkak hata apkellavakha nak, mamma ta nkotaqmelkesek, manghelvetekhek hata mokhom akvakmo aknem aptangko ta hengke'e: "Nema aktaqmelkeskeskama apkaniemhaikama apto aplheiam apkapaskama Apveske", hata etnangkok ketlhengkap ma'a.