Lucas 11 - Nuevo Testamento Toba Maskoy

Apketlhekmoskama Jesús aktemakha nengenmalhnongkoma

¹ Apeneskangkek nak apkenmalhnonkoma Jesús ma'a, lhnak aptemak lhema apkeltameskama: —Apveske, hengetlhekmos no aktemakha nengenmalhnongkoma, ka aptemakha lhta Juan apketlhekmoskamo apkeltamesaikamok apanko'ok —lhna aptemak.

² Ka apkatemmoiangka lhnak Jesús ma'a, lhna aptemak: —Hai', etnamok hata hengke'e: Eniapom apno m'a neten, ntasek elpokkenek apvesai'a lheiap enenlhet'avok. ¡Elheng, etne ta apiav'akha apveske engankok lheiap! Lhamakho alloma nak nalhepop nkoleliehekho ta mota'a, ka aktemakha nak alloma nak neten alleliehekho nak ma'a.

³ Hengellamok hata nentoma aimelhkelha aknem anak,

⁴ etneskesama ta apankek ma'a mangeleliehekho nak hengellaskamakha lheiap, ka akto nak ennengko'o nelteskesaikama engankavek hennaqtevaskama emmo'ok, hengellaso ta nhan neksa akvai'a la hengeliepkonma —lhna aptemak ma'a.

⁵ Lhna aptemak mokhom apietkeskama: —Malha akto nak la nhan enenlhet apmeiekha pelhasep apankek apnemakha po'ok apnemolhema, kelha etnek hengke'e: "Aliaqmong apkanetolhem'a pan apankok

⁶ kakpota angvangkok amaika'a ehenkok kolhva apvakta', mamma nkek ko'o astoma", kelha etnek ma'a.

⁷ Eniangkok hata haveniapak ankek ma'a, metnek hatelha apaivoma: "Manghelies alhma', sietnek ko'o kolhvave nak ka nhan eietkak, nnek na apakho atong anak, mongvapvankek atnemekhak neten angvangkok aptoma lheiap". Metne ta m'a,

⁸ koka etnemekhak hata neten ma'a kakpota engkesek aptoma lhamakho apteniakha la'a, have nhan aniem'o aptema la po'ok, vanlha koka aniem'o m'a meltemo emangkak napaqtavek apkennemolhema.

⁹ Ka stak na askellano ketlhengkap kolhvave nak: Elelmalhnama ta kakpota ngkolhek allangko m'a. Elketam hata nhan kakpota elvetekhak m'a. Elvenama ta akieto atong kakpota ngkolhek aklekkaso atong ma'a.

¹⁰ Apkellelto la apkelelmalhnekama, ngkolhek hata allangko m'a. Apkellelto la apkelketansema, elvetekhak hata m'a. Apkellelto la nhan apkelvenekama akieto atong, ngkolhek hata nhan anmaieskaso atong m'a.

¹¹ Apkelelmalhnengka la'a apketkak kelasma, ¿ellangko nlho menasma?

¹² Nlho ka la apkelelmalhnengka la'a tape'e appok, ¿ellangko nlho iettaha'?

¹³ Niekhe meliamolhma nak ketlhengkap apvanka'ak koka ellangkok qaselha altaqmelo apketkak ketlhengkap. Koka Apkeliapma'ak anak ketlhengkap neten anak tep ankek apiamolhma apanko ie, haveniapak ankek hata ellangkok Espíritu Santo apkellelto la apkelelmalhnekama m'a —lhna aptemak Jesús apkellanemo m'a.

Ngkolatsekama aplhenammap Jesús

¹⁴ Apnengkek nak ma'a lhema enenlhet kasekapok av'alhok akmaikama, metka apaivoma lhnak ntemeskeskamak ma'a, ka aptepkeskamo lhnak Jesús kasekapok av'alhok ma'a, aptaqmelekhek nak enenlhet, ntepekhek nak na apaivoma m'a. Nkeliemaskangkek nak apvalho'ok apkelvetai'o m'a,

¹⁵ koka moklhem'a enenlhet nak apkelmaleniosemmakpok mok apankavek ma'a, lhna aptaiangkok: —Amhama amanie kasekapok av'alho'ok akvesai'a nak Beelzebu aikamok apmopvana Jesús kakpota eniapvanak elentepkesek altemo lheme nak ma'a —lhna aptaiangkok ma'a.

¹⁶ Napokha enenlhet noka apkeleltemo ellanak Jesús qaselha mongenatkeskama m'a apkenmahai'a eliepkonek noka m'a.

¹⁷ Koka apiamavek noka Jesús aktemakha atlhenaikama apvalho'ok, lhnak aptemak apkellanemo: —Lhema apkellavakha apkennapekpo la'a, apnaqtevasekpe pankavek ma'a akvakho apkakhaiangkolha la m'a.

¹⁸ Nnavek na m'a Satanas mmaskek akno akmovana nhan ma'a annapelhko la annemolhema. Ka alheno nak ko'o aniem'o lhkek hetlheianma ketlhengkap asmopvana alentepkesek kasekapok av'alho'ok aniem'o akmovana Beelzebu.

¹⁹ Mankolietok aptangkolha apketlheianma ketlhengkap, vanlha apkenmahai'avek hetselhnana. Apkeliave niekhe ketlhengkap apkelieplekama nak apkelentepkeskangkek na kasekapok av'alho'ok aniem'o Eniapom Neten apmopvana m'a, etlhenekhak hata apankavek apketselhnanemmap ketlhengkap apkelieplekama apanko'ok anak.

²⁰ Ko'o nhan askelentepkasak kasekapok av'alho'ok aniem'o apmopvana Eniapom Neten, apkelvetak iokhalhmek ankek ketlhengkap akvo'o aktemakha apveske Eniapom Neten hengke'e.

²¹ Apnek enenlhet apiennaktema apkelanekama apnemakha aknema apsekama, aptaqmelkeskama nhan lhamakho qaselha apanko'ok aknaikamok ma'a konne.

²² Koka evak hata po'ok enenlhet neten apankek apiennaktema, etneskasekhak hata koneng ankek ma'a, el·hatsoskasekhak hata apmaikama anmoma kakpota nhan qaselha apanko'ok, etnekha apankok apanke.

²³ Enenlhet manghetno la alhelhma, koka apto heiammelhma m'a, enenlhet manghepasmoma la nhan askangkesekha', enielhpankeskak koka m'a —lhna aptemak.

Aktaqhemo netamen kasekapok av'alhok akpaiseiam

²⁴ —Ka aktepo la lhema kasekapok av'alhok akpaiseiam apvalhok enenlhet, nkoloka ta m'a akieto metkelha temma akteniaikama akiamposammalhkelha la m'a. Ka mankotaqho la m'a, nkolhenek av'alhok: "Ntasek hata ataqhok asnemakha lhta lhennenga, hata alhnakhak ma'a", hata ngkotnek aklheianma av'alhok ma'a.

²⁵ Nkotaqhok netamen alhta mokhom apvalhok enenlhet, ka akvetangvaktamo la malha pa'at alhnasemmalhka konne kanhan nema aktaqmelkeskamo qaselha aknaikamok ma'a.

²⁶ Kolhvavek anke nkoniakhak ma'a nkolaqlosengvakha 7 kasekapok atlhelhma'ak alto neten ankavek ngkolatsekama. Ka alentalhnengvaktamo la apvalhok enenlhet anak ma'a, mangkolhek hata sekhek anke lhta aktevaskama, koka tep ankek hata ngkotnek aktevaskama m'a —lhna aptemak Jesús apkellanemo m'a.

Aktemakha aktaqmelakho nkek

²⁷ Nnengkek nak lhema ngkelvana apieseksek enenlhet'avok ma'a, akpaiheiangka lhnak atong, lhna ntemak: —Aktaqmelakho nke ntemak ngken lheiap aiangko mota neme nkok —lhna ntemak.

²⁸ Koka apkatemmoiangka lhnak Jesús, lhna aptemak: —Koka neten ankek ma'a aktaqmelakho enenlhet apkelelto apkellailhemo Eniapom Neten kakpota nhan apkeleliehekho —lhnak aptemak ma'a.

Apkeltammap Jesús elana qaselha mongenatkeskama

²⁹ Apvakhengvai'ak nak enenlhet apentalhnema napokhav'ak Jesús ma'a, lhnak aptemak Jesús apkellanemo: —Ngkollatsekama apkellanekamok enenlhet apkaktengaikamok nenvanlha nak, vanlha mota apkenmahai'a elvetak qaselha mongenatkeskama. Koka vanlha toka elvetak ma'a qaselha mongenatkeskama aktemo lhnak nanek apkaniemhaikama Jonás.

³⁰ Ka aktemakha lhnak nanek apkaniemhaikama Jonás, ntaiekhek apkaniemhaikama qaselha mongenatkeskama apieseksek enenlhet'avok ko Nínive m'a, hata nha ngkotnek na m'a Enenlhet Apketka nak ngkotnek hata nhan qaselha mongenatkeskama apkelvetai'a enenlhet'avok kolhva apkaktengaikamok nenvanlha nak.

³¹ Hata akvo'o ta aknem aliekpelkammalhkelha nentaiangkolha kolhva apkaktengaikamok nenvanlha nak, nkovak hata nhan ma'a aveske ngkelvana lhnak nanek nkoniemak hata m'a akieto nak apkelhkaianlha pieiam, nkotlhenek hata nhan m'a meliamolhma apankavek ketlhengkap ngkanek heltaknevakke'. Ampai'o lhnak nanek mokhek ankek ma'a ngkelvana nak ailhemo lhnak nanek apketlhekmoskama aknema apiamo panke' apveske Salomón, koka kolhvave nak mankonmahai'ak hellailhok ketlhengkap, ko'o asto niekhe neten apankek asiaspommalhka, koneng ma'a Salomón annenga.

³² Hata akvo'o ta aknem aliekpelkammalhkelha nentaiangkolha kolhva apkaktengaikamok nenvanlha nak, elvak hata nhan enenlhet'avok ko Nínive lhnak nanek, etlhenek hata apketselhnanemmap ketlhengkap ma'a ngkanek apkellengai'a niekhe asketlhekmosekamok, koka meliaqmongkasekhak mo'ok apvalho'ok ketlhengkap. Koka apkeliaqmongkasekhe lhnak nanek mo'ok apvalho'ok ko Nínive apkellengai'o apkeltennaikama ania'a niapom Jonás ma'a, ko'o asto niekhe neten apankek asiaspommalhka, koneng ma'a Jonás.

Engaqto'ok anak malha talha alhankok neniokha nak

³³ —¿Nengaleivaskek hata nkek talha alhankok envanke i'e ampekkenek koneng asota, he? Ma', neten nelhanmak ma'a kakpota nkotsaskese lhma' apkellelto apkelentalhnema la'a konne' pa'at.

³⁴ Ka apaqto'ok anak malha talha alhankok apommatkeskama apiokha lheiap, nkeltasek hata nkek apaqto'ok, nietnek na apommatma apiokha. Koka ngkollatsekama la'a apaqto'ok, ienaqteskama lhma nhan apiokha.

³⁵ Etaqmelkes apvalhok anak, meniangko nkek nkospana apommatma.

³⁶ Apommato la'a apvalhok lheiap, mangkolhek ienaqteskama lhma', etak alhnakho nkek lheiap malha talha alhankok atsaskeskama na lhma'.

Apkeliamenaikama Jesús escribas kanhan fariseos

³⁷ Netamen Jesús apsavhomo lhnak apkeltennaikama m'a, ka apkeltemo lhnak lhema fariseo etasakhak lhemek apnemakha m'a kakpota eltavokhak ma'a, ka apnaiakmo lhnak Jesús ma'a.

³⁸ Avanhek nak akpelapkeskama apvetai'a fariseo m'a meleklemo apmeio'ok iemmen Jesús amanie aptavekha', aptaiangkolha apankave lhnak ma'a.

³⁹ Koka lhnak aptemak Apveske apkanemo: —Ketlhengkap fariseos nkeltameiangkek apkelieniesekamok apto'ok nohaikok kakpota nhan aphak av'alho'ok. Koka konne' apvalho'ok anak ketlhengkap nkelpaiseiakmek anke, nkellanei'avek ngkolatsekama, apkelmenielhma nhan.

⁴⁰ Mamma apqatko'ok, mankollapvankek koka eliennengkesek Eniapom Neten nkanek apkeliekpelkek apvalho'ok aniem'o apkellanai'a m'a.

⁴¹ Nkaimelhkek ellangkok qaselha apanko'ok anak metka nak apkelletsekama kakpota nkollalhnekhak apvalho'ok ketlhengkap.

⁴² ¡Ketlhengkap la ie fariseos! Vanlha apkeleliehekho mankotno neten ankek akiaspommalhka henganemakha nak Moises, ka kto nak ellangkok lhema nekha 10 anak akielhna aniep panko'ok, ruda, menta kakpota nhan nentoma nak ava'. Koka meleliehekhok akto nak neten ankek akiaspommalhka henganemakha, ka kto nak akietemo nak nellanei'o emmo'ok kanhan nengasekhai'o Eniapom Neten. Ntasek na etnangkok aktakha nak hengke'e alheianma, kakpota nhan ma'a diezmo lhkek.

⁴³ ¡Ketlhengkap la ie fariseos! Vanlha apkeleltemo etnangkok neten apankavek, apkeleltavek eniakhengvomok apkakhaiangkolha la apkelemhama apmaniaie' akieto apkaqnekhelha la'a enenlhet, vanlha mota apteniaikamok ellahok enenlhet elpaivesangkok apkeltanio la amai.

⁴⁴ ¡Ketlhengkap la ie fariseos! Malha nemakha aknengkanveianlha enghapak, apkellelteianmakhavek enenlhet'avok takhalhet neksa meliamo —lhna aptemak Jesús apkellanemo Fariseos.

⁴⁵ Apnengkek nak na lhema hengetlhekmoskama ley Moises ma'a, lhna aptemak apkanemo: —Hengetlhekmoskama, ¿ennengko'o nak hengetlhenak ma na ngkolatsema apaivoma lheiap, he? —lhna aptemak ma'a.

⁴⁶ Ka apkatemmoiangka lhnak na Jesús: —¡Ketlhengkap la ie hengetlhekmoskama ley Moises! Apkellanei'a mota henganemakha akientalhnema angeliehekhok, koka meleliehekhok ketlhengkap ma'a, melteniaiangkok apiempeiok ketsek la'a elieplavkesek ma'a.

⁴⁷ ¡Ketlhengkap la ie! Apkellanai'a mota apnengkanveianlha aphapavok apkeleltennasemmap ania'a annenga apkeletsepmakha, apkelieihengka'a lhnak nanek na apkennapma m'a.

⁴⁸ Ketlhengkap na alleklemo apvalho'ok aptaiangkolha lhnak na nek apkelieihengka'a, apkennapekamok lhnak nanek ma'a, kolhva koka ketlhengkap apkeltakmelkeskamavek niekhe taphaplhet'ok apkeletsepma.

⁴⁹ Apiamavek nak nanoka Eniapom Neten apmak'akha ngkotnek, lhnak na nek aptemak ma'a: "Allapaksek hata askeleltennaskama ania'a ehenkok kakpota nhan askelapaskamo, moklhem'a ta ngkolhek annapakho, po'ok hata nhan ngkolhek akmenlhenangka", lhnak na ne aptemak Eniapom Neten ma'a.

^50-51 Eniapom Neten hata elelmalhnekho ketlhengkap aniem'o nema annapekha apkeleltennasemmap ania'a annenga, ampai'osekha nkek Eniapom Neten apkellanai'a lhamakho qaselha alhma nkek ham. Ampai'o nhan Abel apmatnama lhnak nanek apmanie nkek, akvakmo nhan ma'a Zacarias apkennapmo lhnak nanek malamong Eniapom Neten apnemakha kakpota nhan alvanlhemmalhkelha qaselha.

⁵² ¡Ketlhengkap la ie' hengetlhekmoskama ley Moises! Apkeliamavek niekhe aktemakha nemmahai'a aniekpelkok Eniapom Neten, mang koka elteniaiangkok apiempeiok kakpota eliekpelkok, meleltemak na eliekpelkok enenlhet ma'a —lhna aptemak Jesús ma'a.

⁵³ Ka aptepekho lhnak Jesús fariseo apnemakha m'a, apkelemhaikokho lhnak escribas kakpota nhan fariseos, nkennatkeskamavek nak ma'a, apkenmahai'o lhnak elelmalhnama

⁵⁴ akientalhnema, apmahai'a etselhnanak kakpota elpathetek Jesús ma'a.